ဒီကနေ့ သြဂုတ်လ ၃၀ ရက်နေ့မှာတော့ ကိုရီးယားနိုင်ငံရဲ့နာမည်ကြီးမင်းသားလည်းဖြစ်တဲ့၊ မိန်းကလေးတွေရဲ့သည်းသည်းလှုပ်မင်းသားချောလည်းဖြစ်တဲ့ လီမင်ဟို (Lee Min Ho) နဲ့ MOMOLAND အမျိုးသမီးအဆိုအဖွဲ့ရဲ့အဖွဲ့ဝင်ဟောင်း ယွန်းဝူ (Yeonwoo)တို့ ချစ်သူတွေဖြစ်နေတယ်ဆိုတဲ့သတင်းထွက်ရှိလာခဲ့ပါတယ်။ ဒိတ်ဒိတ်ကြဲကိုရီးယားအနုပညာရှင်တွေတစ်တွဲပြီးတစ်တွဲ ထုတ်ဖော်ပေးနေတဲ့ နာမည်ကြီးသတင်းဌာန Dispatch က ဒီသတင်းကို ထုတ်ပြန်ခဲ့တာပါ။
Dispatch ရဲ့ထုတ်ပြန်ချက်အရ လီမင်ဟိုကို သြဂုတ်လ ၁ ရက်နေ့ ယွန်းဝူရဲ့မွေးနေ့မှာ အတူတူမြင်တွေ့ခဲ့ရတယ်။ မင်ဟိုနဲ့ ယွန်းဝူတို့ အတူတူ ညလယ်ခေါင်ထိ နေပြီး မွေးနေ့ရက်ရောက်ဖို့ မိနစ်တွေ အတူတူရေတွက်ခဲ့ကြတယ်။ သူတို့တွဲနေကြတာ ၅ လရှိပြီ။ ယွန်းဝူရဲ့မွေးနေ့ကို ဆင်နွှဲဖို့လည်း မင်ဟိုက သူ့ရဲ့အိမ်ကို ဖိတ်ခဲ့တယ်။ COVID-19 ရောဂါအခြေအနေတွေကြောင့် သူတို့ရဲ့အိမ်တွေမှာပဲ အမြဲလိုလို ချိန်းတွေ့ကြတယ်။ သူတို့ရဲ့နေအိမ်တွေကို ရောက်ဖို့ ၅ မိနစ်လောက်ပဲ လမ်းလျှောက်ရတယ်လို့ သိရပါတယ်။
မင်ဟိုနဲ့ယွန်းဝူတို့ဟာ ဂိမ်းဆော့တာနဲ့ ရုပ်ရှင်ကြည့်တာလို ဝါသနာတွေလည်း တူကြတယ်။ မကြာခဏ ဂိမ်းအတူတူဆော့ဖြစ်ကြတယ်။ တစ်ခါတလေ တစ်ညလုံးဂိမ်းဆော့ရင် အချိန်ကုန်သွားတယ်။ ရုပ်ရှင်သွားကြည့်ဖို့လည်း မင်ဟိုက ယွန်းဝူကို လာခေါ်လေ့ရှိတယ်လို့ Dispatch က ဆိုထားပါတယ်။
Dispatch က ထုတ်ပြန်တဲ့ ဒီသတင်းနဲ့ပတ်သက်ပြီး လီမင်ဟိုရဲ့အေဂျင်စီက ငြင်းဆိုထားပါတယ်။ လီမင်ဟိုရဲ့အေဂျင်စီ MYM Entertainment ကတော့ “သူတို့တွဲနေကြတယ်ဆိုတာ မဟုတ်ပါဘူး။ သူတို့တွေက မိတ်ဆွေတွေပါပဲ” လို့ တုံ့ပြန်ပြောဆိုခဲ့ပါတယ်။ ထွက်ရှိလာတဲ့ပုံတွေနဲ့ပတ်သက်ပြီးတော့ အေဂျင်စီက “သူတို့နှစ်ယောက်တည်းမဟုတ်ပါဘူး။ အဲဒီအချိန်တုန်းက အခြားသူငယ်ချင်းတွေလည်း ရှိခဲ့တယ်။ အဲဒီပုံတွေက သူတို့ချိန်းတွေ့ကြတဲ့ပုံတွေမဟုတ်ပါဘူး” လို့ ရှင်းလင်းပြောကြားခဲ့ပါတယ်။
Ref: Soompi & Koreaboo “Lee Min Ho’s Agency Denies Dispatch Report That He Is Dating Yeonwoo”
WL (ရိုးရာလေး)
