Peaky Blinders စီးရီးမှာ ဒေးဗစ်ဘက်ခမ်း ပါဝင်လာမလားဆိုတာ ပရိသတ်တွေ သိလိုစိတ်ပြင်းပြနေကြပါတယ်။ Peaky Blinders စီးရီးဟာ ၁၉ ရာစုက ဘာမင်ဂမ်မြို့မှာ ပေါ်ပေါက်ခဲ့တဲ့ Peaky Blinders ဂိုဏ်းအကြောင်း ဇာတ်အိမ်ဖွဲ့ပြီး ရိုက်ကူးထားတာပါ။ Season 5 အထိ ထွက်ရှိထားတဲ့ ဒီစီးရီးဟာ ကမ္ဘာတစ်ဝန်းက ပရိသတ်တွေကို ဖမ်းစားနိုင်ခဲ့ပြီး ကမ္ဘာကျော်သရုပ်ဆောင်တွေဖြစ်တဲ့ ဆမ်မြူရယ်ဂျက်ဆင်၊ ဘရက်ဒ်ပစ်၊ ဂျူလီယာရောဘတ်၊ ကမ္ဘာကျော်ရက်ပ်အဆိုတော် စနုဒေါ့၊ ချဲလ်ဆီးအသင်းခေါင်းဆောင်ဟောင်း ဂျွန်တယ်ရီတို့ကလည်း လူမှုကွန်ရက်ပေါ်မှာ ဒါမှမဟုတ် အင်တာဗျူးဖြေဆိုချိန်မှာ Peaky Blinders စီးရီးကို နှစ်သက်တယ်လို့ ပြောခဲ့ဖူးပါတယ်။ လန်ဒန်ကို ရောက်လာချိန်မှာ စနုဒေါ့ တွေ့ဆုံချင်တဲ့ လူ ၂ ယောက်အနက် တစ်ယောက်ကတော့ Peaky Blinders စီးရီးကို ရိုက်ကူးတဲ့ ဒါရိုက်တာ စတီဗင်နိုက်ပါပဲ။
ကမ္ဘာတစ်ဝန်းမှာရှိတဲ့ ပရိသတ်တွေက Peaky Blinders စီးရီး Season 6 ထွက်လာမယ့်ရက်ကို စောင့်မျှော်နေကြပါတယ်။ ဒီလိုအချိန်မှာ ဗြိတိန်သရုပ်ဆောင် ပေါလ်အန်ဒါဆန် (Peaky Blinders စီးရီးထဲမှာ သောမတ်စ်ရှယ်ဘီရဲ့အစ်ကို အာသာရှယ်ဘီဂျူနီယာအဖြစ် သရုပ်ဆောင်)က Season 6 ကျရင် ဒေးဗစ်ဘက်ခမ်း ပါဝင်လာနိုင်တယ်လို့ အရိပ်အမြွက်ပြခဲ့ပါတယ်။ ပေါလ်အန်ဒါဆန်က စီလီယန်မာဖီ( သောမတ်စ်ရှယ်ဘီ)နဲ့အတူ ဂါရစ်ဆန်အရက်ဆိုင်(Peaky Blinders စီးရီးထဲမှာ ရှယ်ဘီမိသားစုပိုင်ဆိုင်တဲ့ဆိုင်)မှာ အရက်သောက်နေတဲ့ ဓာတ်ပုံကို သူ့ရဲ့အင်စတာဂရမ်ပေါ် တင်ခဲ့ပြီး ” ဟယ်လို၊ စမောဟိသ်ရဲ့ တစ်နေရာမှာတော့ Season 6 အတွက် အသင့်ဖြစ်နေပုံပဲ”လို့ ရေးသားခဲ့ပါတယ်။ အဲဒီပို့စ်မှာ ဒေးဗစ်ဘက်ခမ်း၊ ဒါရိုက်တာ ဂိုင်းရစ်ချီ၊ သရုပ်ဆောင်မင်းသား လူးကပ်စ်ဟက်စ်၊ Twilight ဇာတ်ကားရဲ့မင်းသမီး ဘယ်လာသွန်းတို့ကို Tag တွဲခဲ့ပါတယ်။ အဲဒီနောက်မှာတော့ Peaky Blinders စီးရီးရဲ့ Season 6 မှာ ဒေးဗစ်ဘက်ခမ်း ပါဝင်လာမယ်လို့ သတင်းထွက်ခဲ့တာပါ။
ဘက်ခမ်းဟာ Peaky Blinders စီးရီးရဲ့ အမာခံပရိသတ်တစ်ယောက်ဖြစ်ပြီး Season 5 မှာ ရိုက်ကွင်းအထိ သွားရောက်ကြည့်ရှုခဲ့ပါတယ်။ ဒေးဗစ်ဘက်ခမ်းနဲ့ ပေါလ်အန်ဒါဆန်က သူငယ်ချင်းတွေပါ။ ဒေးဗစ်ဘက်ခမ်းက Peaky Blinders တွေ ဝတ်ဆင်တဲ့ ဝတ်စုံ၊ ဦးထုပ်တွေနဲ့ ဓာတ်ပုံရိုက်ပြီး လူမှုကွန်ရက်မှာ ဝေမျှခဲ့ပါသေးတယ်။ ဒါပေမဲ့ Peaky Blinders စီးရီးမှာ ပါဝင်သရုပ်ဆောင်ဖြစ်မလားဆိုတာကိုတော့ ဒေးဗစ်ဘက်ခမ်းက အတည်ပြုခြင်းမရှိသေးပါဘူး။ Peaky Blinders စီးရီးရဲ့ Season 6 ကို ၂၀၂၁ ခုနှစ်မှာ ထွက်ရှိဖို့ စီစဉ်ထားပေမဲ့ ကိုရိုနာဗိုင်းရပ်စ် ကပ်ရောဂါကြောင့် ဗြိတိန်နိုင်ငံမှာ ပိတ်ဆို့မှုလုပ်ခဲ့လို့ ပြီးခဲ့တဲ့မတ်လက ရိုက်ကူးရေးအစီအစဉ်တွေကို ရပ်နားခဲ့ရပါတယ်။ ဒါပေမဲ့ အခုအခါမှာတော့ ဗြိတိန်အစိုးရက ပိတ်ဆို့မှုစည်းမျဉ်းတွေကို ဖြေလျှော့လိုက်လို့ လာမယ့်လတွေမှာ ရိုက်ကူးရေး စတင်ဖို့ ရှိနေပါတယ်။
Nz (ရိုးရာလေး)
