ဆီးဂိမ်းပြိုင်ပွဲ ကျင်းပနေတဲ့ ဖိလစ်ပိုင်နိုင်ငံမှာ တိုင်ဖွန်းမုန်တိုင်း ကမ်မူရီ(Kammuri)ဝင်ရောက်တိုက်ခတ်မယ့် အခြေအနေကြောင့် အနည်းဆုံး အားကစားနည်း(၈)မျိုးရဲ့ ပွဲချိန်ဇယား အပြောင်းအလဲဖြစ်ခဲ့ပါတယ်။ ကမ်မူရီမုန်တိုင်းရဲ့ တောင်ဘက်ဗဟိုချက်ကြောင့် မြောက်ပိုင်းဆာမာပြည်နယ်မှာ မိုးသက်လေပြင်း ကျရောက်နေတယ်လို့ ဖိလစ်ပိုင်နိုင်ငံ မိုးလေဝသဗျူရို(PAGASA)ရဲ့ ဒီဇင်ဘာလ ၂ ရက်နေ့ ညနေ ၅ နာရီအချိန် ထုတ်ပြန်ချက်မှာ ဖော်ပြထားပါတယ်။
ဒီဇင်ဘာလ ၃ ရက် နံနက်ပိုင်းကနေ ညနေပိုင်းအထိ လူဇွန်ကျွန်းအလယ်ပိုင်းနဲ့ မြို့တော်မနီလာမှာ မိုးသည်းသည်းထန်ထန် ရွာသွန်းလိမ့်မယ်လို့ PAGASA က ခန့်မှန်းထားပါတယ်။ အကြိမ်(၃၀)မြောက် ဆီးဂိမ်းပြိုင်ပွဲကို လူဇွန်ကျွန်းပေါ်မှာရှိတဲ့ မနီလာ၊ ကလက်၊ ဆူဘစ် စတဲ့ ဒေသ(၃)ခုမှာ ကျင်းပနေပါတယ်။ ရာသီဥတုဆိုးရွားတဲ့အတွက် သောင်ပြင်ဘောလီဘော၊ ရေလှိုင်းစီး၊ modern pentathlon၊ triathlon/dualthlon၊ ရွက်လှေ/လေလှိုင်းစီး၊ ပန်ကြပ်ဆီလက်၊ မွေထိုင်း၊ ကနူး/ကယက်/ရိုးရာလှေ စတဲ့ အားကစားပြိုင်ပွဲတွေရဲ့ ပွဲချိန်ဇယားကို ရွှေ့ဆိုင်းခဲ့ပါတယ်။
ဒီဇင်ဘာလ ၂ ရက်ကနေ ၄ ရက်ကြား ယှဉ်ပြိုင်မယ့် ရွက်လှေပြိုင်ပွဲနဲ့ လေလှိုင်းစီး ပွဲစဉ်အားလုံးကို ဖျက်သိမ်းခဲ့ပါတယ်။ ရာသီဥတုဆိုးရွားလို့ မနီလာနိုင်ငံတကာလေဆိပ်ကိုလည်း ပိတ်ထားရပါတယ်။ ဖိလစ်ပိုင်နိုင်ငံမှာ ပျမ်းမျှအားဖြင့် နှစ်စဉ်နှစ်တိုင်း မုန်တိုင်းအလုံး ၂၀ ဝင်ရောက်တိုက်ခတ်လေ့ရှိပါတယ်။ ၂၀၁၃ ခုနှစ်က တိုက်ခတ်ခဲ့တဲ့ စူပါတိုင်ဖွန်းမုန်တိုင်း ဟိုင်ယန်ကတော့ လူသေဆုံးမှုအများဆုံးပါပဲ။ သေဆုံးသူနဲ့ ပျောက်ဆုံးသူ ၇၃၀၀ ကျော် ရှိခဲ့ပါတယ်။
Nz (ရိုးရာလေး)
