ဆေးဖက်ဝင် ဝဥသုပ်

ဝါတွင်းကာလမှာ ဥပုသ်သီတင်းဆောက်တည်သူတွေအတွက် သားသတ်လွတ် ဟင်းတစ်ခွက် ပြောပြချင်ပါတယ်။ ဒါကတော့ ပြုလုပ်ရလွယ်ကူပြီး

ဆေးဖက်လည်းဝင်တဲ့ ဝဥသုပ်လေးပါ။ ရှောက်ရွက်နံ့ သင်းသင်းလေးနဲ့ အရသာကောင်းတာမို့ ခံတွင်းတွေ့ကြမှာ အသေချာပါပဲ။

ပါဝင်ပစ္စည်းတွေကတော့ – ဝဥ ၊ ကြက်သွန်နီ ၊ သံပုရာသီး ၊ ရှောက်ရွက် ၊ ငရုတ်သီးမှုန့် ၊ ဆား ၊ ဆီချက် ၊ ဟင်းခတ်မှုန့် နဲ့ ပဲအကျက်မှုန့်တို့ဖြစ်ပါတယ်။

ပြုလုပ်နည်းအဆင့်ဆင့်ကို ပြောပြပါမယ်။

• ကြိုထားပြီးသား ဝဥကို ပါးပါးလှီးပြီး အနေတော်အချောင်းလေးတွေလှီးပါ။

• ဒယ်အိုးထဲမှာ ဆီအနည်းငယ်ထည့်ပြီး ဝဥကို လှော်ပေးပါ။ ဝဥထဲက ထွက်လာတဲ့ ရေ ခန်းသွားမှ မီးပိတ်ပြီး အအေးခံထားပါ။

• ဇလုံထဲမှာ ဝဥ ၊ ရှောက်ရွက် နဲ့ ကြက်သွန်နီ ပါးပါးလှီးထားတာ ရောထည့်ပြီး ဆား ၊ ဆီချက် ၊ ပဲအကျက်မှုန့် ၊ ဟင်းခတ်မှုန့် တို့ဖြူးပြီး သုပ်ပါ။ ချဉ်ချဉ်စပ်စပ် အရသာ အတွက် သံပုရာရည်ညှစ် ၊ ငရုတ်သီးအကျက်မှုန့်ထည့်သုပ်ပြီး အပေါ်ကရှောက်ရွက်ဖြူးပါ။

• အရသာအပေါ့အငံမြည်းပြီးရင်တော့ ချဉ်ချဉ်စပ်စပ်အရသာ ဝဥသုပ်ရပါပြီ။

ဝဥရဲ့ ကျန်းမာရေးအကျိုးကျေးဇူးတွေကတော့ အစာချေစနစ်ကို ကောင်းမွန်စေသလို အဆီပါဝင်မှုနည်းတဲ့အတွက် ကိုယ်အလေးချိန် တက်မှာ ပူစရာမလိုပါဘူး။ သွေးလည်ပတ်မှုကို ကောင်းမွန်စေလို့ နှလုံးသွေးကြောကို သန့်စင်စေပြီး ဗီတာမင် C ကြွယ်ဝစွာပါဝင်လို့ အရွယ်မတိုင်ခင် အိုမင်းရင့်ရော်မှု ကင်းဝေးစေပါတယ်။ အင်ဆူလင်ပမာဏ ပါဝင်မှုနည်းလို့ သကြားဓာတ်ကို လျော့နည်းစေပြီး ဆီးချို သွေးချို ရောဂါ ကာကွယ်ပေးပါတယ်။ ဒီလို အကျိုးကျေးဇူးတွေ များစွာပါဝင်တဲ့ ဝဥသုပ်ကို ဝါတွင်းကာလ ဟင်းလျာမီနူးလ်ထဲမှာ ထည့်သွင်းသင့်ပါကြောင်း နှိုးဆော်လိုက်ပါတယ်။

Alice May (ရိုးရာလေး)

Share this post

ရိုးရာလေးတွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင်မှ ပြန်လည်ကူးယူဖော်ပြခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဤနေရာတွင်ဖတ်ရှုနိုင်ပါသည်။

Leave a Reply

scroll to top