ဘောလိဝုဒ်လောကမှာ သရုပ်ဆောင်ပြောင်မြောက်လှတဲ့ မင်းသားကြီး ရှရွတ်ခန်းဟာ မွမ်ဘိုင်းမြို့၊ ခါးဒေသမှာ ရုံးဖွင့်ထားတာဖြစ်ပါတယ်။ အခုဆိုရင် အဲဒီရုံးနေရာကို COVID-19 လူနာတွေအတွက် အထူးကြပ်မတ်ကုသဆောင်အဖြစ် ပြောင်းလဲပစ်ခဲ့တယ်လို့ Filmfare သတင်းဌာနက ထုတ်ပြန်ခဲ့ပါတယ်။
ဧပြီလအစောပိုင်းတုန်းကတော့ ရှရွတ်ခန်းနဲ့ သူ့ဇနီး ဂေါ်ရီခန်း (Gauri Khan) တို့ဟာ သူတို့ရဲ့ရုံးနေရာကို Brihanmumbai Municipal Corporation အကူအညီနဲ့ COVID-19 လူနာတွေအတွက် Quarantine Facility အနေနဲ့ ပြောင်းလဲခဲ့တယ်လို့ ကြေညာခဲ့ဖူးပါတယ်။ အဲဒီနောက် ဇူလိုင်လအလယ်မှာတော့ အထူးကြပ်မတ်ခန်းတစ်ခုအနေနဲ့ ပြုပြင်ပြောင်းလဲမှု တွေလုပ်ခဲ့ပြီး Quarantine ခံယူခဲ့တဲ့လူနာတွေကို နေရာပြောင်းရွှေ့ခဲ့တယ်ဆိုတဲ့ သတင်းထွက်ရှိခဲ့ပါတယ်။
![](https://yoyarlay.com/wp-content/uploads/2020/08/11-8-2020-yyl-006.jpg)
မင်းသားကြီးရှရွတ်ခန်းက သူ့ရဲ့Meer Foundation, Hinduja Hospital, the BMCတို့ရဲ့အကူအညီနဲ့ သြဂုတ်လ ၈ရက်နေ့ကတည်းက ကုတင် (၁၅) ခုပါဝင်တဲ့ အထူးကြပ်မတ်ခန်းအဖြစ် လူနာတွေကို ကုသပေးနေခဲ့တယ်လို့ သတင်းတွေအရသိရပါတယ်။
“အသက်အန္တရယ် စိုးရိမ်နေရတဲ့ လူနာတွေအတွက် အသက်ရှုစက်တွေ၊ အောက်စီဂျင်ပိုက်တွေ၊ အသက်ရှုလမ်းကြောင်းဆိုင်ရာ အောက်စီဂျင်စက်တွေနဲ့ အောက်စီဂျင်ဘူးတွေကို တပ်ဆင်ထားပါတယ်။ ဒီဝန်ဆောင်မှုက BMCရဲ့ လမ်းညွှန်မှုအောက်မှာ Hinduja Hospital က ဆောင်ရွက်သွားမှာဖြစ်ပါတယ်”လို့ Hinduja Hospitalရဲ့ ဆရာဝန် အန်ဗီနက်ချ်ဆူပီက ပြောခဲ့ပါတယ်။
![](https://yoyarlay.com/wp-content/uploads/2020/08/11-8-2020-yyl-007.jpg)
အရင်က မင်းသားကြီးရှရွတ်ခန်းရဲ့ ရုံးနေရာမှာ လူနာ (၆၆) ဦး Quarantine ခံယူခဲ့ပါတယ်။ (၅၄) ဦးက ရောဂါပိုးမတွေ့ရှိဘဲ ပြန်လည်ကောင်းမွန် လာတဲ့အတွက် ဆင်းသွားခဲ့ပြီး အထူးကြပ်မတ်ခန်းအဖြစ် မပြုပြင်ခင်မှာ (၁၂) ဦးကို အခြားနေရာမှာ ပြောင်းရွှေ့ထားခဲ့ရတယ်လို့ သိရပါတယ်။
Ref: Tribune “Shah Rukh Khan’s office turned into ICU for Covid-19 patients”
WL (ရိုးရာလေး)