အိမ်ဖြူတော်နားမှာ လက်နက်ကိုင်ထားတဲ့ သံသယရှိသူတစ်ယောက်ကို လုံခြုံရေးတပ်ဖွဲ့က ပစ်ခတ်ဖမ်းဆီးခဲ့လို့ စာနယ်ဇင်းရှင်းလင်းပွဲလုပ်နေတဲ့ အမေရိကန်သမ္မတ ဒေါ်နယ်ထရမ့်ကို စင်ပေါ်ကနေ ခေါ်ထုတ်သွားခဲ့ရပါတယ်။ ပြီးခဲ့တဲ့တနင်္လာနေ့မှာ ဒေါ်နယ်ထရမ့်က သတင်းထောက်တွေ မေးမြန်းနေတာကို ဖြေနေတုန်း လုံခြုံရေးတပ်ဖွဲ့ဝင်တစ်ယောက်က စင်ပေါ်တက်လာပြီး ဒေါ်နယ်ထရမ့်ကို တီးတိုးပြောခဲ့တာပါ။ လုံခြုံရေးတပ်ဖွဲ့ဝင်ရဲ့ တီးတိုးစကားကို ကြားချိန်မှာ ဒေါ်နယ်ထရမ့်က ” အိုး . . . ဘာဖြစ်တာလဲ”လို့ ပြောပြီး စာနယ်ဇင်းရှင်းလင်းပွဲ အခန်းထဲကနေ ထွက်သွားခဲ့တာပါ။ ပစ်ခတ်ဖမ်းဆီးမှုဖြစ်ပွားနေချိန်မှာ အိမ်ဖြူတော်တစ်ခုလုံးကိုလည်း ပိတ်ဆို့ထားခဲ့ပါတယ်။
အိမ်ဖြူတော်ရဲ့ မြက်ခင်းပြင်မှာတော့ အနက်ရောင်ဝတ်စုံတွေ ဝတ်ဆင်ထားပြီး မောင်းပြန်ရိုင်ဖယ်တွေ ကိုင်ဆောင်ထားတဲ့ လုံခြုံရေးတပ်ဖွဲ့ဝင်တွေက အပြေးအလွှားလှုပ်ရှားပြီး သစ်ပင်တွေရဲ့အနောက်ဘက်မှာ နေရာယူထားတာ တွေ့ရပါတယ်။ စာနယ်ဇင်းရှင်းလင်းပွဲ အခန်းအပြင်ဘက်မှာ ကင်မရာအဖွဲ့သားတွေ ရှိနေတဲ့ Fox News သတင်းဌာနကတော့ ပစ်ခတ်သံနှစ်ချက်ကြားရတယ်လို့ ဖော်ပြထားပါတယ်။
၉ မိနစ်အကြာမှာတော့ ဒေါ်နယ်ထရမ့်က စာနယ်ဇင်းရှင်းလင်းပွဲအခန်းထဲ ပြန်ရောက်လာပြီး လက်နက်ကိုင်ထားတဲ့ သံသယရှိသူတစ်ယောက်ကို အမေရိကန်လုံခြုံရေးတပ်ဖွဲ့က ပစ်ခတ်ဖမ်းဆီးခဲ့တာလို့ သတင်းထောက်တွေကို ပြောခဲ့ပါတယ်။ ဒီဖြစ်ရပ်အပြီးမှာ သံသယရှိသူကို ဆေးရုံပို့ခဲ့တယ်လို့ ဒေါ်နယ်ထရမ့်က ဆိုပါတယ်။ ဒေါ်နယ်ထရမ့်က လုံခြုံရေးတပ်ဖွဲ့ရဲ့ ပရော်ဖက်ရှင်နယ်ပီသတဲ့ လှုပ်ရှားမှုကိုလည်း ချီးကျူးခဲ့ပါတယ်။ အိမ်ဖြူတော်နဲ့ တစ်လမ်းကျော်ကွာဝေးတဲ့ ၁၇ လမ်းနဲ့ ပင်ဆယ်ဗေးနီးယားလမ်းမကြီးမှာ ပစ်ခတ်မှုဖြစ်ပွားခဲ့တယ်လို့ လုံခြုံရေးတပ်ဖွဲ့က တွစ်တာပေါ်မှာ အတည်ပြုခဲ့ပါတယ်။
Ref: BBC ” Trump exits briefing as man shot near White House”
Nz (ရိုးရာလေး)
