ရန်ကုန်၊ အောက်တိုဘာ (၁၉)
ရန်ကုန်တိုင်းဒေသကြီး၊ ရွှေပြည်သာနဲ့ မြောက်ဥက္ကလာပမြို့နယ်တွေမှာ နေထိုင်တဲ့ ပြည်သူတွေကို စားနပ်ရိက္ခာတွေ ထောက်ပံ့ပေးဖို့ စီစဉ်ဆောင်ရွက်နေတယ်လို့ ကုလသမဂ္ဂစားနပ်ရိက္ခာအစီအစဉ် (WFP) က သိရပါတယ်။
“WFP ရဲ့ အဓိကစိန်ခေါ်မှုတွေက အကူအညီလိုအပ်နေသူတွေဆီကို အချိန်မီသွားရောက် ကူညီထောက်ပံ့ခွင့်ရရှိဖို့နဲ့ ပေးအပ်နေတဲ့ အထောက်အပံ့တွေကို ရပ်တန့်မသွားရအောင် လုံလောက်တဲ့ အရင်းအမြစ်တွေ ရရှိဖို့ပါဝင်တယ်” လို့ ပြောပါတယ်။
ဒလမြို့နယ်က အထိခိုက်လွယ်ဆုံးနဲ့ နွမ်းပါးသူ (၁၅၀၀၀၀) ဦးကိုလည်း ပြီးခဲ့တဲ့ စက်တင်ဘာလက ကယ်ဆယ်ရေး စားနပ်ရိက္ခာထောက်ပံ့တွေကို WFP က ဖြန့်ဝေပေးခဲ့ပါသေးတယ်။
ကချင်၊ ချင်း၊ ရခိုင်နဲ့ ရှမ်းပြည်နယ်တွေက ပဋိပက္ခဒဏ်ခံစားနေရသူ လူဦးရေ စုစုပေါင်း (၃၆၀၀၀၀) ဦးကိုလည်း လစဉ် စားနပ်ရိက္ခာတွေကို အထောက်အပံ့ပေးနေတာ ဖြစ်ပါတယ်။
ချင်း၊ ကယား၊ ရှမ်းပြည်နယ်တောင်ပိုင်းနဲ့ စစ်ကိုင်းတိုင်းဒေသကြီးအတွင်း တိုက်ပွဲတွေဖြစ်ပွားနေတဲ့အတွက် ပဋိပက္ခတွေကြောင့် စားဝတ်နေရေးထိခိုက်ခဲ့ရပြီး နေရပ်စွန့်ခွာခဲ့ရသူ ထောင်ပေါင်းများစွာကိုလည်း WFP က ကူညီထောက်ပေးနိုင်ဖို့အတွက် အရေးပေါ်ကြိုးစားဆောင်ရွက်နေတယ်လို့ သိရပါတယ်။
Photo- Social Media
Cherry(ရိုးရာလေး)
