ဇီးသီးလေး ကြိုက်သူလေးတွေရှိလား။ ဒါဆိုရင်တော့ ဇီးသီးစားသုံးပေးတာက ခန္ဓာကိုယ်ကို ကျန်းမာစေနိုင်သလို အသားအရေကိုပါ လှပစေနိုင်ပါတယ်။ ဒီတစ်ခေါက်တော့ ဇီးသီးစားသုံးတာကြောင့် အသားအရေကို ဘယ်လိုအထောက်အကူပြုပေးနိုင်လဲဆိုတဲ့ အကြောင်းလေးကို ပြောပြပေးချင်ပါတယ်။
ဇီးသီးလေး ကပေးတဲ့ အသားအရေကျန်းမာရေး
ချိုချိုချဉ်ချဉ်နဲ့အရသာရှိတဲ့ ဇီးသီးလေးကို စားသုံးပေးတာက
(၁) အသားအရေကို အစက်အပြောက်ကင်းစေနိုင်တယ်
မွမွလေး နဲ့ အရသာရှိတဲ့ ဇီးသီးလေး ကို စားသုံးပေးတာက အသားအရေကို ကြည်လင်စေပြီး အရေပြားပေါ်က အမည်းစက်တွေနဲ့ တင်းတိပ်တွေကို သက်သာစေနိုင်သလို အသားအရောင်မညီတာတွေကိုလည်း သက်သာစေနိုင်ပါတယ်။ စားတာအပြင် ဇီးသီးကို မျက်နှာပေါင်းတင်ဖို့အတွက်လည်း အသုံးပြုပေးလို့ရပါတယ်။
ဘယ်လိုပေါင်းတင်ရမှာလဲ
မှည့်နေတဲ့ အရွယ်တော်ဇီးသီး ၂ လုံး ၃ လုံးလောက်ကို ဇလုံတစ်ခုထဲမှာ ကြိတ်ခြေပါ။ ရလာတဲ့အနှစ်ကို မျက်နှာ နဲ့ လည်ပင်းပေါ်မှာ လိမ်းပေးလိုက်ပါ။ ပြီးရင် မိနစ်လောက် ထားပေးပါ။ ပြီးသွားရင်တော့ ရေနွေးနွေးလေးနဲ့ ဆေးချလိုက်ပါ။ တစ်ပတ်ကို တစ်ကြိမ်လောက်လုပ်ပေးရင်ကို အဆင်ပြေပါတယ်။
(၂) အရေပြားနဲ့ ဆံသားကို နေရောင်ဒဏ်က ကာကွယ်ပေးတယ်
ဓာတ်တိုးဆန့်ကျင်အာနိသင် ကြွယ်ဝစွာပါဝင်နေတာကြောင့် အသားအရေကို နေရာင်ခြည်မှာပါတဲ့ ခရမ်းလွန်ရောင်ခြည်ကြောင့် ထိခိုက်တာမျိုးမဖြစ်အောင် ကာကွယ်ပေးပါတယ်။ ဆံသားတွေကိုလည်း နေရောင်ကြောင့် ပျက်စီးမှုမရှိအောင် အထိရောက်ဆုံး ကာကွယ်ပေးထားပါတယ်။ စားသုံးပေးလို့ရသလို အရေပြားနဲ့ ဆံသားမှာ တိုက်ရိုက်ပေါင်းတင်ပေးလို့လည်း ရပါတယ်။
ဘယ်လိုလုပ်ရမှာလဲ
ဇီးသီးကို ရေနွေးနွေးလေးနဲ့ပြုတ်ပြီး အစေ့ကိုဖယ်လိုက်ပါ။ ရလာတဲ့ အနှစ်ကို မျက်နှာ၊လည်ပင်းနဲ့ ဆံသားတွေမှာ လိမ်းပေးပါ။ ၁၅ မိနစ် ကနေ မိနစ် ၂၀ လောက်ထားပြီး ရေအေးအေးနဲ့ဆေးချလိုက်ပါ။
(၃) အသားအရေကို ကြည်လင်စေနိုင်တယ်
ဗီတာမင် C နဲ့ ဓာတ်တိုးဆန့်ကျင်အာနိသင်ကြွယ်ဝမှုက အသားအရေကို ကြည်လင်စေနိုင်သလို အရေပြားပေါ်က အမာရွတ်တွေကိုလည်း သက်သာစေနိုင်ပါတယ်။ အရေပြားဆဲလ်အသစ်တွေကို ဖြစ်ပေါ်စေနိုင်ပြီး သွေးစီးဆင်းမှုကို ကောင်းစေနိုင်ပါတယ်။
ဘယ်လိုလုပ်ရမှာလဲ
ဇီးသီးကိုကြိတ်ခြေပြီး ပျားရည် လက်ဖက်ရည်ဇွန်း ၂ ဇွန်းနဲ့ရောလိုက်ပါ။ ရလာတဲ့အနှစ်ကို သန့်စင်ထားတဲ့ မျက်နှာပေါ်မှာ လိမ်းပေးပြီး ၁၀ မိနစ်လောက်ထားလိုက်ပါ။ စက်ဝိုင်းပုံစံအတိုင်းနှိပ်နယ်ပေးပါ။ ပြီးရင် ရေအေးအေးလေးနဲ့ ဆေးချလိုက်ပါ။
(၄) အရေးအကြောင်းတွေ သက်သာစေနိုင်တယ်
ဓာတ်တိုးဆန့်ကျင် အာနိသင်ကြွယ်ဝမှု၊ ဗီတာမင် E ပါဝင်မှု၊ ဘီတာကယ်လ်ရိုတင်းပါဝင်မှုတွေက အရေပြားရောင်ရမ်းမှုကို သက်သာစေနိုင်သလို မျက်နှာပေါ်က အရေးအကြောင်းတွေကိုလည်း သက်သာစေနိုင်ပါတယ်။ ဆဲလ်တွေကို အပူဒဏ်၊ စိတ်ဖိစီးမှု နဲ့ အခြားအချက်တွေကြောင့် ထိခိုက်ပျက်စီးတာမျိုး မဖြစ်အောင်ကာကွယ်ပေပါတယ်။ ကော်လာဂျင်ထွက်ရှိမှုကို မြှင့်တင်ပေးပြီး အသားအရေကို ကျန်းမာနုပျိုစေနိုင်ပါတယ်။
ဘယ်လိုလုပ်ရမှာလဲ
မှည့်နေတဲ့ ဇီးသီးကို ကြိတ်ခြေပြီး ရလာတဲ့ အနှစ်ကို rose water ဒါမှမဟုတ် သခွားရည်တို့နဲ့ ရောလိုက်ပါ။ ပြီးရင်မျက်နှာပေါ်မှာ လိမ်းပေးပြီး မိနစ် ၂၀ လောက်ထားလိုက်ပါ။ ပြီးရင် ရေဆေးချလိုက်ပါ။ တစ်ပတ်တစ်ကြိမ် ပုံမှန်လုပ်ပေးရင် အဆင်ပြေပါတယ်။
(၅) ဝက်ခြံ သက်သာစေနိုင်တယ်
ဗီတာမင် C နဲ့ ဗီတာမင် A ပါဝင်တာကြောင့် အဆီပြန်တာကို သက်သာစေနိုင်ပြီ အဆီဖု၊ ဝက်ခြံ၊ ဆားဝက်ခြံတွေမဖြစ်အောင်ကာကွယ်ပေးနိုင်ပါတယ်။ အသားအရေကို တင်းရင်းစေနိုင်ပြီး အသားအရေမွဲခြောက်မှုကင်းစေနိုင်ပါတယ်။ အရေပြားပျက်စီးမှု မရှိအောင် ကာကွယ်ပေးသလို ဝက်ခြံမဖြစ်အောင်ကာကွယ်ပေးနိုင်ပါတယ်။ အရေပြားဓာတ်မတည့်မှုတွေကို သက်သာစေပြီး အသားအရေကို နူညံ့စေနိုင်သလို အရေပြားက အဆိပ်အတောက်တွေကို အထိရောက်ဆုံး ဖယ်ရှားပေးနိုင်ပါတယ်။
ဘယ်လိုလုပ်ရမှာလဲ
ကြိတ်ခြေထားတဲ့ ဇီးသီးအနှစ် တစ်ခွက်စာကို သခွားရည်နဲ့ရောစပ်ပြီး ရလာတဲ့အနှစ်ကို မနက်ခင်းတိုင်း မျက်နှာပေါ်မှာ လိမ်းပေးရုံပါ။ ၁၀ မိန်စလောက်ထားပြီးရင်တော့ ရေနွေးနွေးလေးနဲ့ ဆေးချလိုက်ပါ။
(၆) ဆံသား ကျန်းမာစေနိုင်တယ်
ဓာတ်တိုးဆန့်ကျင် အာနိသင်ကြွယ်ဝမှုက အပူဒဏ်၊ ချွေး နဲ့ ဖုန်မှုန့်တွေကြောင့် ဆံသားခြောက်သွေ့ ပျက်စိးတာမျိုးမဖြစ်အောင် အထိရောက်ဆုံးကာကွယ်ပေးနိုင်ပါတယ်။ ဗီတာမင် A ပါဝင်နေမှုက ဆံသားကို အရင်းကနေ အဖျားထိအားဖြည့်ပေးပြီး ဆံပင်ကျွတ်တာမျိုးမဖြစ်အောင် ကာကွယ်ပေးနိုင်မှာပါ။ ဗောက်ထတာ၊ ဆံသားကျိုးပျက်တာ၊ ဆံသားမွဲခြောက်ခြောက်ဖြစ်တာတွေကို သက်သာစေဖို့လည်း အသုံးပြုပေးလို့ရပါတယ်။
ဘယ်လိုလုပ်ရမှာလဲ
မှည့်နေတဲ့ ဇီးသီးတစ်လုံးကို ကြိတ်ခြေလိုက်ပါ။ ပြီးရင် ဒိန်ချဉ်၊ သံပရိုရည်တို့နဲ့ ဆတူရောပြီး အနှစ်ဖြစ်အောင် မွှေပါ။ ရလာတဲ့ အနှစ်ကို ဆံသားမှာလိမ်းပေးပြီး တစ်ပတ်ကို ၂ ကြိမ် ပေါင်းတင်ပေးပါ။ ၁၀ မိနစ်လောက်ထားပြီးရင် ခေါင်းကို ပုံမှန်လျှော်နေကျအတိုင်း လျှော်ချလိုက်ပါ။
(၇) မျက်လုံးအောက်မှာ မျက်အိတ်ဖောင်းတာတွေကို သက်သာစေနိုင်ပါတယ်
ဇီးသီးက မျက်လုံးအောင်မှာ ရှိတဲ့ နူးညံ့တဲ့ အသားအရေကိုလည်း အကောင်းဆုံးကာကွယ်ပေးနိုင်ပါတယ်။ မျက်ကွင်းညိုသူတွေအတွက်လည်း အဆင်ပြေပါတယ်။
ဘယ်လိုလုပ်ရမှာလဲ
ဇီးသီးကို ခပ်ပါးပါးလေးလှီးပါ။ ရလာတဲ့ အလွှာလေးတွေကို မျက်လုံးအောက်မှာ ၁၀ မိနစ် ကနေ ၁၅ မိနစ်လောက်ကပ်ပေးပါ။ ပြီးရင် ရေအေးအေးလေးနဲ့ ဆေးချလိုက်ပါ။
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win
ရေးသားသူ Aye Thi Mon
Ref : hellosayarwon
Team (ရိုးရာလေး)
