အိမ်ငှား ရှုပ်ပွထားခဲ့တဲ့ အမှိုက်သရိုက် (၄) တန်ကို မြင်ပြီး အိမ်ရှင် ဆွံ့အသွားခဲ့ရ

အသက် ၅၆ နှစ်အရွယ် လီ လော့ခ်ကီး ဆိုတဲ့ အိမ်ရှင်အမျိုးသားဟာ ယခင်အိမ်ဌား ပြောင်းရွှေ့သွားပြီးတဲ့နောက် နေအိမ်ကိုပြန်လာခဲ့ပါတယ်။ အိမ်ငှားထားတဲ့ နေအိမ်ကို ပြန်မလာဖြစ်တာ ၅ နှစ်ရှိပါပြီ။ အခု ပထမဆုံးအနေနဲ့ ပြန်လာတော့ သူ့ရဲ့တိုက်ခန်းမှာ တောင်လိုပုံနေတဲ့ အမှိုက်ပုံကြီး၊ မှိုတက်နေတဲ့အစားအစာတွေနဲ့ ကြောင်မစင်တွေ စုပုံနေတာကို မြင်တွေ့သွားတဲ့အချိန်မှာ လော့ခ်ကီး တုန်လှုပ်သွားခဲ့ရတယ်။

ရှုပ်ပွနေတာတွေ ရှင်းဖို့အတွက် စရန်ငွေ ပေါင် ၄၀၀ ကို ယူထားဖို့ အိမ်ငှားအမျိုးသားပြောတုန်းက လော့ခ်ကီးဟာ ဒီလောက်အထိ ဆိုးရွားမယ်လို့ မထင်ခဲ့မိဘူး။ ရှုပ်ပွနေတာတွေကို ရှင်းဖို့က စရန်ငွေ ပေါင် ၄၀၀ ရာဂဏန်းထက် ထောင်ချီကုန်ကျနိုင်ဖွယ်ရှိပါတယ်။လော့ခ်ကီးက သူ့အိမ်ကို လာတဲ့အချိန်မှာ သူ့ခွေးလေးကို ခေါ်လာခဲ့တာပါ။ အိမ်တံခါးဖွင့်လိုက်တာနဲ့ အနံ့တွေ နံဟောင်နေတာပါပဲ။ လှေကားအတက်အဆင်းက အမှိုက်သရိုက်တွေကို တစ်ချက်ကြည့်လိုက်ပြီး တံခါးကို ပြန်ပိတ်လိုက်ပါတယ်။ ပြီးတော့ သူ့ခွေးလေးကို အိမ်ထဲ ဝင်ခွင့်မပေးတော့ဘဲ ကားထဲ ပြန်ထည့်ခဲ့ပါတယ်။

အိမ်ရဲ့အခန်းတိုင်းကလည်း အမှိုက်တွေ၊ အဝတ်ဟောင်းတွေ၊ အစားအစာတွေ၊ ပုလင်းခွံ၊ ဗူးခွံတွေ စုပုံနေတာပါ။ လော့ခ်ကီးက ဒီအခြေအနေမျိုးနဲ့ အိမ်ဌားက ဘယ်လိုများ အိပ်ခဲ့လဲဆိုတာကို နားလည်ရခက်နေပါတယ်။ အိမ်နီးနားချင်းတစ်ဉီးကတော့ အိမ်ငှားကို အိမ်ထဲကနေမွေ့ရာ ယူသွားတာတော့မြင်တယ်လို့ ပြောပါတယ်။

လော့ခ်ကီးက အိမ်အတွက် ရေချိုးခန်း၊ မီးဖိုချောင်နဲ့ ကောဇောတွေကို အသစ်ပြန်လဲသွားရမှာပါ။ မီးဖိုချောင်က ကြောင်ချေးတွေ၊ ဆွေးမြည့်နေတဲ့အစားအစာဗူးတွေ၊ မှိုတက်နေတဲ့နွားနို့ဗူးတွေနဲ့ အဆိုးရွားဆုံးပါပဲ။ ရေချိုးခန်းထဲမှာလည်း ကြောင်ချေးတွေ စုပုံနေပြီး အိမ်သာကလည်း ပလတ်စတစ်အိတ်အဟောင်းတွေ၊ အစားအစာအထုပ်အပိုးတွေနဲ့ ညစ်ပတ်နေပါတယ်။

လော့ခ်ကီးက အိမ်ငှားသဘောတူစာချုပ်ကို စီမံဖို့ အေးဂျင့်ကုမ္ပဏီ John Francis ကို အပ်ထားခဲ့တာပါ။ အဲဒီကုမ္ပဏီကို စိတ်ပျက်မိတယ်လို့ လော့ခ်ကီးက ပြောပါတယ်။ လော့ခ်ကီးက သူ့အိမ်ကို ငှားရင် အိမ်မွေးတိရစ္ဆာန်မပါလာရဘူး၊ ငှားရမ်းနေထိုင်မယ့်သူအားလုံးကို စစ်ဆေးဖို့ ပြောထားခဲ့တာပါ။

“ရှင်းလင်းရမယ့် အမှိုက် အနည်းဆုံး (၃) တန်ကနေ (၄) တန်ရှိတယ်။ အဲဒါနဲ့ ကျွန်တော်ခက်ခဲနေပြီ။ လူတွေက စိတ်ပိုင်းဆိုင်ရာကျန်းမာရေးအခြေအနေနဲ့ ရုန်းကန်ရနိုင်တယ်ဆိုတာ ကျွန်တော်နားလည်တယ်။ သန့်ရှင်းရေးကို ဉီးစားပေးလုပ်ဆောင်ရတာက သူတို့အတွက် ခက်ခဲနိုင်တယ်။ ပြီးတော့ သူတို့အတွက် ကျွန်တော် ခံစားမိပါတယ်။ ဒါပေမဲ့ John Francis က ဒီအခြေအနေမျိုးဖြစ်အောင် ခွင့်ပြုခဲ့တယ်။ ငါးနှစ်လောက် ကျွန်တော့်ရဲ့အိမ်ကို စီမံဖို့ သူတို့ကို ခွင့်ပြုပေးခဲ့မိတဲ့အတွက် ကျွန်တော် တကယ် စိတ်ပျက်ပြီး ဒေါသထွက်တယ်။ ငါးနှစ်မှာ သူတို့က VAT အခွန် ၁၂ ရာခိုင်နှုန်းကျော်ယူခဲ့တယ်။ အခုတော့ သူတို့က ကျွန်တော့်ကို မပြီးပြတ်မရောရာတဲ့အခြေအနေနဲ့ ထားခဲ့တယ်”လို့ လော့ခ်ကီးက ပြောပါတယ်။

John Francis ကုမ္ပဏီရဲ့ပြောရေးဆိုခွင့်ရှိသူကတော့ ဖောက်သည်ရဲ့တိုင်ကြားချက်မှန်သမျှကို အလွန်အလေးအနက်ထားဆောင်ရွက်တယ်၊ အိမ်ရှိဆီက တရားဝင်တိုင်ကြားချက်ကို လက်ခံရရှိပြီး လက်ရှိစုံစမ်းစစ်ဆေးနေပါတယ်၊ ပြဿနာတွေကို ဖြေရှင်းဖို့ အိမ်ရှင်နဲ့ တိုက်ရိုက်ညှိနှိုင်းပေးပါမယ်တဲ့။

Ref: Metro “Tenant left four tonnes of rubbish and told landlord ‘take care of the mess’”

Team ( ရိုးရာလေး )