ကလေးတစ်ယောက်ကြောင့် ဟောင်ကောင်က KKPlus အရုပ်ဆိုင်မှာ ပြထားတဲ့ လူခန္ဓာကိုယ်အရွယ်အစားလောက်ရှိတဲ့ ရွှေရောင်တယ်လီကျူဘီအရုပ်ကြီး ကွဲသွားခဲ့ပါတယ်။ ဆိုင်ဝန်ထမ်းက ကလေးဟာ အရုပ်ကိုကန်လိုက်တာကြောင့် ကွဲသွားတာလို့ ပြောတဲ့အတွက် ကလေးရဲ့ဖခင်က အဲဒီအရုပ်အတွက် လျော်ကြေးငွေ စင်ကာပူဒေါ်လာ ၅၈၇၉. ၅၂ ပေးလိုက်ရပါတယ်။ ကွဲကြေပျက်စီးနေတဲ့ ရွှေရောင်တယ်လီကျူဘီအရုပ်ကြီးနားမှာ မတ်တပ်ရပ်နေတဲ့ သူတို့မိသားစုရဲ့ဓာတ်ပုံတွေကလည်း ဖေ့စ်ဘွတ်ခ်မှာ ပျံ့နှံ့သွားခဲ့ပါတယ်။
![](https://yoyarlay.com/wp-content/uploads/2022/05/25-5-2022-yyl-15.jpg)
အစကတော့ မေလ ၂၃ ရက်နေ့မှာ KKPlus အရုပ်ဆိုင်က ဒီမတော်တဆဖြစ်ရပ်ကို ဖြေရှင်းပြီးသွားပြီဆိုတဲ့အကြောင်း ဖေ့စ်ဘွတ်မှာ ထုတ်ပြန်ခဲ့ပါတယ်။ ကွဲသွားတဲ့အရုပ်ကြီးက ၂၀၂၁ခုနှစ် နိုဝင်ဘာလကတည်းက အဲဒီနေရာမှာပဲ ရှိနေခဲ့ပြီး ဖောက်သည်တွေကို အဆင်မပြေဖြစ်စေခဲ့တာမျိုးမရှိခဲ့ဖူးဘူးလို့လည်း ထုတ်ပြန်ချက်မှာ ရေးထားပါတယ်။ နောက်တော့ ဒီထုတ်ပြန်ချက်ကို ဖျက်ပစ်ခဲ့ပါတယ်။
တစ်ရက်အကြာမှာတော့ KKPlus ရဲ့မိခင်ကုမ္ပဏီ Kidsland International က လျော်ကြေးငွေပေးလိုက်ရတဲ့ ကလေးရဲ့မိသားစုကို တောင်းပန်တဲ့ နောက်ထပ်ထုတ်ပြန်ချက်တစ်စောင် ရေးသားခဲ့ပါတယ်။ လျော်ကြေးငွေကို ကလေးရဲ့မိသားစုကို အပြည့်အဝပြန်ပေးခဲ့ပြီးပြီဆိုတဲ့အကြောင်းနဲ့ အလားတူဖြစ်ရပ်မျိုးမဖြစ်လာဖို့ ဆောင်ရွက်သွားမယ်ဆိုတဲ့အကြောင်းလည်း ထုတ်ပြန်ခဲ့ပါတယ်။
![](https://yoyarlay.com/wp-content/uploads/2022/05/25-5-2022-yyl-16.jpg)
ကလေးလေးက အရုပ်ကြီးကို မကန်ခဲ့ဘဲ ဖြည်းဖြည်းလေးမှီလိုက်တာနဲ့ အလွယ်တကူလဲကျသွားတယ်ဆိုတာကို စီစီတီဗီမှတ်တမ်းမှာ တွေ့ရပါတယ်။ အဲဒီနောက်မှာတော့ ကမြင်းတဲ့ကလေးလေးလို့ ပြောခဲ့တဲ့ လူမှုကွန်ယက်အသုံးပြုသူတွေက အရုပ်ဆိုင်ကို ပြန်ပြီးဝေဖန်ပြောဆိုခဲ့ကြပါတယ်။ လူမှုကွန်ယက်အသုံးပြုသူတွေက ၁.၈ မီတာ ရှည်တဲ့အရုပ်ကို ဘာလို့ ပိုပြီးခိုင်အောင်၊ ထိခိုက်မခံရအောင် မထားတာလဲလို့ မေးခွန်းထုတ်ခဲ့ကြပါတယ်။ အဲဒီနောက်မှာ KKPlusရဲ့ မန်နေဂျာကလည်း ကြိုပြီး ကာကွယ်တဲ့အနေနဲ့ ၁ မီတာ ကျော်တဲ့ အရုပ်တွေအားလုံးကို ဆိုင်ကနေ ဖယ်ပစ်ခဲ့ပြီး မတော်တဆဖြစ်ရပ်နဲ့ပတ်သက်ပြီး ပြန်လည်သုံးသပ်သွားမယ်လို့ ဆိုပါတယ်။
Ref: Mothership “Toy store refunds S$5,800 to father of boy who broke golden Teletubby after public backlash”
WL ( ရိုးရာလေး )