UFC ကြယ်ပွင့် ကိုဗင်တန်က ရန်ပုံငွေလက်ဝှေ့ပွဲမှာ သူနဲ့ယှဉ်ပြိုင်ထိုးသတ်ဖို့ ရက်ပ်အဆိုတော် 50 Cent ကို စိန်ခေါ်လိုက်ပါတယ်။ UFC 245 ပြိုင်ပွဲမှာ ဝယ်လ်တာဝိတ်ချန်ပီယံ ကာမာရူအူစမန်က ကိုဗင်တန်ကို အလဲလဲအကွဲကွဲဖြစ်အောင် ထိုးသတ်အနိုင်ယူခဲ့ပြီး အဲဒီပွဲစဉ်မှာ ကိုဗင်တန်ကို 50 Cent က လှောင်ပြောင်ခဲ့ဖူးပါတယ်။ သမ္မတ ဒေါ်နယ်ထရမ့်ကို ထောက်ခံအားပေးတဲ့ ကိုဗင်တန်က ကာမာရူအူစမန်နဲ့ပွဲစဉ် မတိုင်ခင် ဒေါ်နယ်ထရမ့်အတွက် ဝယ်လ်တာဝိတ်တန်း ချန်ပီယံခါးပတ် ယူပေးမယ်လို့ ကတိပေးခဲ့ပြီး ပြိုင်ဘက်ဖြစ်သူ ကာမာရူအူစမန်က အာဖရိကမျိုးနွယ်ကနေ ဆင်းသက်လာတာကို လှောင်ပြောင်ခဲ့ပါတယ်။ ဒါပေမဲ့ တကယ်တမ်း ထိုးသတ်ချိန်မှာတော့ ချန်ပီယံခါးပတ်မရဘဲ မေးရိုးကျိုးတာပဲ အဖတ်တင်တယ်လို့ 50 Cent က သူ့ရဲ့အင်စတာဂရမ်ပေါ်မှာ ထေ့ငေါ့ခဲ့ပါတယ်။
အမေရိကန်စစ်သည်တွေ ရန်ပုံငွေရစေဖို့အတွက် ကျင်းပမယ့် ရန်ပုံငွေလက်ဝှေ့ပွဲမှာ 50 Cent က သူနဲ့ထိုးမယ်ဆိုရင် လက်တစ်ဖက် နောက်ပစ်ပေးထားပြီး လက်တစ်ဖက်တည်းနဲ့ ထိုးမယ်လို့ ကိုဗင်တန်က စိန်ခေါ်ခဲ့တာပါ။ 50 Cent ဟာ ၂၀၁၇ ခုနှစ်တုန်းကလည်း UFC ကြယ်ပွင့် မက်ဂရီဂေါ်နဲ့ street fight ထိုးဖို့ စိန်ခေါ်ခဲ့ဖူးပါတယ်။ ဒါပေမဲ့ အဲဒီပွဲက တကယ်တမ်း မဖြစ်မြောက်ခဲ့ပါဘူး။
Nz (ရိုးရာလေး)
