ကလေးငယ်အတော်များများဟာ အမှောင်ကိုကြောက်ရွံ့ကြပါတယ်။ သူတို့ဟာ သူတို့ရဲ့ ဘီဒိုထဲမှာ၊ အိပ်ရာအောက်မှာ သရဲရှိနေတယ်လို့ ထင်တတ်ကြပါတယ်။ မိဘတစ်ယောက်အနေနဲ့ သင့်ကလေးငယ်ကို ဒီကိုကြောက်ရွံ့မှုတွေကို ကျော်လွှားနိုင်အောင် ကူညီပေးသင့်ပါတယ်။
– ကလေးငယ်တွေရဲ့ အမှောင်ကိုကြောက်ရတဲ့အကြောင်းရင်း
မိဘအတော်များများဟာ ကလေးငယ်တွေက ဘာလို့အမှောင်ကိုကြောက်လဲဆိုတာ မသိရှိကြပါဘူး။ ဒါပေမဲ့ မိဘက အခန်းမီးမှိတ်လိုက်တဲ့အြချိန်မျိုးမှာ ကလေးငယ်က ကြောက်ရွံ့ခြင်းကို ခံစားရတတ်ပါတယ်။ ဒါကြောင့် ကလေးငယ်ဟာ ရုတ်တရက် အမှောင်ကိုကြောက်ရွံ့နေပြီဆိုရင် အကြောင်းရင်းအချို့ရှိနိုင်ပါတယ်။
ကလေးငယ်သန်းပေါင်းများစွာဟာ အမှောင်ထဲမှာ သူတို့ကိုအစိမ်းလိုက်ကိုက်စားနိုင်တဲ့ ထူးထူးဆန်းဆန်းအရာတစ်ခု ရှိနေတယ်လို့ ယုံကြည်ကြပါတယ်။ ကြောက်ရွံ့ခြင်းဟာ လူတိုင်းရဲ့ ဘဝအစိတ်အပိုင်းတစ်ခုဖြစ်ပြီး ကလေးငယ်တွေမှာတော့ ပိုဆိုးကြပါတယ်။ ဒါ့အပြင် ကလေးငယ်တွေရဲ့ ဦးနှောက်ဟာ အပြည့်အစုံဖွံ့ဖြိုးခြင်း မရှိသေးတာကြောင့် သူတို့ဟာ TV programs တွေ၊ စာအုပ်တွေမှာပါဝင်တဲ့ ကြောက်စရာကောင်းတဲ့အရာတွေရဲ့ လွှမ်းမိုးမှုကိုခံရနိုင်ပါတယ်။
– သင့်ကလေးငယ်ရဲ့ အမှောင်ကြောက်ရွံ့မှုကို ဘယ်လိုထိန်းချုပ်မလဲ
မိဘတွေ အရင်ဆုံးလုပ်သင့်တဲ့အရာကတော့ ကလေးငယ်နဲ့ ပိုပြီးဆက်သွယ်မှုပြုဖို့ဖြစ်ကာ ကလေးငယ်ကိုလေးစားပြီး ကလေးဘာတွေ ကြုံတွေ့နေရလဲဆိုတာ နားလည်တယ်ဆိုတာကို ပြသပေးဖို့ပဲ ဖြစ်ပါတယ်။
ကလေးငယ်ဟာ ညဘက်မှာနိုးလာပြီး အော်ဟစ်ကာ သင့်အခန်းထဲပြေးဝင်လာရင်း သူတို့ရဲ့ အတွေ့အကြုံတွေကို ပြောပြတဲ့အခါ ဒေါသမထွက်သင့်ပဲ စိတ်တည်ငြိမ်အောင်ထားသင့်ပါတယ်။ သူတို့ပြောတဲ့အချက်တွေကို သေချာနားထောင်ပြီး သူတို့ကြောက်ရွံ့အောင် ပုံပြင်တွေကို ပုံကြီးချဲ့မပြောမိဖို့လည်း အရေးကြီးပါတယ်။ ဒီအစား ကလေးငယ်အတွက် အန္တရာယ်မရှိဘူးဆိုတာသေချာဖို့ ကလေးအိပ်တဲ့နေရာကို သင်ကသွားကြည့်ပေးမယ်လို့ ကတိပေးသင့်ပါတယ်။
သင်အနားမှာရှိနေတာဟာ အလုံခြုံဆုံးဖြစ်ပြီး သင်ရှိနေစဉ်မှာ ကြောက်စရာမလိုဘူးဆိုတဲ့ခံစားချက်မျိုး ကလေးငယ်ကို ပေးသင့်ပါတယ်။ ဒါအပြင် ကြောက်စရာဆိုတာတကယ်မရှိနေဘဲ အမှောင်ကြောက်တတ်တာက ပုံမှန်သဘောသာဖြစ်ကြောင်း ရှင်းပြပေးသင့်ပါတယ်။ လိုအပ်ရင် ကလေးငယ်အတွက် အမှောင်ထဲမှာကာကွယ်မှုနဲ့ ပံ့ပိုးမှုကိုလည်း ပေးသင့်ပါတယ်။
သူတို့အနေနဲ့ သက်တောင့်သက်သာရှိပြီး လုံခြုံမှုကိုခံစားရအောင် ကိုင်တွယ်စရာတစ်ခုခု ပေးထားသင့်ပါတယ်။ အရုပ်၊ အလင်းရောင်အဖျော့ အစရှိတာတွေက သူတို့ အမှောင်ထဲမှာ ကြောက်ရွံ့နေတတ်ခြင်းကို ထိန်းချုပ်ဖို့ ကူညီပေးနိုင်ပါတယ်။
တကယ်လို့ သင်ဟာ သင့်ကလေးငယ်ကို အပြည့်အဝကူညီဖေးမပေးနေပေမဲ့ သူတို့က ရက်သတ္တပတ် အနည်းငယ်ကြာတဲ့အထိ ကြောက်ရွံ့မှုကိုပြသနေဆဲဆိုရင်တော့ ကလေးငယ်ကို ကလေးဆရာဝန်တစ်ဦးဆီမှာ အထူးကုသမှုကို ခံယူစေသင့်ပါတယ်။
ရေးသားသူ – Dr . Phyu Mon Latt
ဆေးပညာပိုင်းဆိုင်ရာတည်းဖြတ်သူ – Dr. Kaung Thar
(ယခုဆောင်းပါးကို ရိုးရာလေး၏မိတ်ဖက် Hello ဆရာဝန် Facebook စာမျက်နှာမှ ကူးယူဖော်ပြပါသည်)
www.yoyarlay.com
#Team_yyl #Health_yyl #Knowledge_yyl #Hellosayawon
