မူးယစ်ဆေးဝါးအထူးသတင်းတိုင်ကြားရေးဌာန စတင်ဖွင့်လှစ်ဆောင်ရွက်ခဲ့သည့် ၂၀၁၈ ခုနှစ်၊ ဇွန် ၂၆ ရက်မှ ၂၀၁၉ ခုနှစ်၊ စက်တင်ဘာ ၂၁ ရက်အထိ ပေးပို့တိုင်ကြားချက်များကို စုံစမ်းဖော်ထုတ်ချက်များအရ အမှုပေါင်း ၇၆၁ မှု ဖွင့်လှစ်အရေးယူခဲ့ပြီး တရားခံပေါင်း ၁၂၀၀ ခန့်ကို ဖမ်းဆီးရမိခဲ့သည်ဟု နိုင်ငံတော်သမ္မတရုံးမှ ထုတ်ပြန်ထားသည်။
အဆိုပါတရားခံများတွင် ကျား ၉၉၉ ဦး၊ မ ၁၈၄ ဦး ဖမ်းဆီးရမိခဲ့ခြင်းဖြစ်ပြီး ဘိန်းဖြူ၊ ဘိန်း၊ အဆင့်နိမ့်ဘိန်း၊ ဘိန်းစာမှုန့်၊ ဘိန်းစာရွက်၊ ဘိန်းစာရည်၊ ဘိန်းရည်၊ ဘိန်းဆီခဲ၊ ဘိန်းစေ့၊ ICE ၊ စိတ်ကြွဆေးပြား၊ ဆေးခြောက်၊ Ecstasy အကြေများအပြင် လက်နက်မျိုးစုံ ၁၈ လက်၊ ကျည်မျိုးစုံ ၂၅၇ တောင့်နှင့် လက်ပစ်ဗုံး ၁ လုံးတို့ကိုလည်း သိမ်းဆည်းရမိခဲ့သည်။
မူးယစ်ဆေးဝါးနှင့် စိတ်ကိုပြောင်းလဲစေသည့် ဆေးဝါးအန္တရာယ် တားဆီးကာကွယ်နှိမ်နှင်းရေးအတွက် ပြည်သူလူထုထံမှ ပေးပို့တိုင်ကြားလာသည့် သတင်းအချက်အလက်များကို စနစ်တကျလက်ခံရယူနိုင်ရန် ယင်းဌာနကို ဖွင့်လှစ်ခဲ့ခြင်းဖြစ်ပြီး မူးယစ်ဆေးဝါးသတင်းများနှင့် ပတ်သက်၍ ဖော်ထုတ်ဖမ်းဆီးအရေးယူမှုများကို အရှိန်အဟုန်မြှင့် ဆောင်ရွက်လျက်ရှိသည်။
KST (ရိုးရာလေး)
