ပဲစောင်းလျားသီးကို မြန်မာ့ထမင်းဝိုင်းမှာ ဟင်းချိုထဲခတ်ထားတာ ဒါမှမဟုတ် အတို့အမြှုပ်အဖြစ် တွေ့ရလေ့ရှိပါတယ်။ ပဲစောင်းလျားသီးနုနုလေးတွေကို ရေနွေးဖျော၊ ပါးပါးလှီးပြီး သံပရာသီးလေး၊ ပုဇွန်ခြောက်လေးနဲ့သုပ်စားတာကလည်း လက်ဖက်သုပ်လိုပဲ ရေနွေးကြမ်းနဲ့လိုက်ဖက်တဲ့ မြန်မာ့သရေစာလက်သုပ်တစ်မျိုးဖြစ်ပါတယ်။ ထမင်းဝိုင်းမှာ ငါးပိရည်နဲ့အသီးအရွက်တို့စရာပါဝင်စေတာ၊ သရေစာစားချိန်မှာ အသီးအရွက်တစ်မျိုးမျိုးကိုသုပ်စားတာတွေဟာ နေ့စဉ်အစားအသောက်တွေထဲမှာ အသီးအရွက်တွေကိုအမြဲပါဝင်စေဖို့ ရည်ရွယ်ခဲ့ပုံရတဲ့ ချစ်စရာမြန်မာဓလေ့ပါ။
ပဲစောင်းလျားသီးဆိုတာ ဈေးမှာအမြဲရှိပေမဲ့ အမြဲဝယ်မစားဖြစ်တဲ့အထဲမှာပါဝင်ပါတယ်
ပဲစောင်းလျားသီးဆိုတာ ဈေးမှာအမြဲရှိပေမဲ့ အမြဲဝယ်မစားဖြစ်တဲ့အထဲမှာပါဝင်ပါတယ်။ တစ်ခါတလေမှ စားဖြစ်တတ်တယ်ပေါ့၊ တခုတ်တရဝယ်စားတာမျိုး သိပ်မရှိတတ်ကြပါဘူး။ ဒါပေမယ့် သူ့ရဲ့အကျိုးကျေးဇူးလေးတွေကိုသိလိုက်ရရင် အမြဲမဟုတ်တောင် မကြာမကြာစားမိတော့မှာပါ။
(၁) အရွယ်တင်နုပျိုစေတယ်
ပဲစောင်းလျားသီးမှာ ဗီတာမင် C နဲ့ ဗီတာမင် A ကြွယ်ဝပါတယ်။ ဒီဗီတာမင်နှစ်မျိုးလုံးက ဓာတ်တိုးဆန့်ကျင်ပစ္စည်းတွေအဖြစ်လုပ်ဆောင်ပေးတဲ့အပြင် အရေးအကြောင်းတွေလိုမျိုး အရွယ်မတိုင်မီရင့်ရော်ခြင်းလက္ခဏာတွေကို ကာကွယ်ပေးနိုင်ပါတယ်။
(၂) အသားအရေတင်းရင်းစေတယ်
ဓာတ်တိုးဆန့်ကျင်ပစ္စည်းတွေ ပါဝင်မှုများနေမှတော့ အသားအရေတင်းရင်းပြီး နုပျိုမှာ မလွဲပါဘူး။
(၃) ကယ်လိုရီနည်းတယ်
ပဲစောင်းလျားသီး (၁၀၀) ဂရမ်မှာ (၄၉) ကယ်လိုရီပဲပါဝင်တယ်ဆိုတော့ ဝိတ်ချချင်တဲ့သူတွေအတွက် တစ်ချက်ခုတ်နှစ်ချက်ပြတ်ပါပဲ။ ပဲစောင်းလျားသီးဟင်းချို၊ ပဲစောင်းလျားသီးသုပ်၊ ပဲစောင်းလျားသီးချက် အကုန်သာတွယ်ပေတော့။
(၄) ဗီတာမင် C ကြွယ်ဝတယ်
အသီးကလုံးဝမချဉ်ပေမဲ့ ဗီတာမင် C ပါဝင်မှုကများတာကြောင့် ကိုယ်ခံအားစနစ်ကိုအားကောင်းစေပါတယ်။ သွေးကြောတွေရဲ့ ကျုံ့ဆန့်နိုင်စွမ်းကိုကောင်းစေပြီး ကင်ဆာရောဂါတချို့ကနေ ကာကွယ်ပေးတဲ့ကောင်းကျိုးတွေလည်းရှိပါတယ်။
(၅) သတ္တုဓာတ်တွေကြွယ်ဝတယ်
ပဲစောင်းလျားသီးမှာ သံဓာတ်၊ မဂ္ဂနိစ်၊ ကယ်လ်စီယမ်၊ ဖော့စဖရပ်စ်တို့လို အရေးပါတဲ့သတ္တုဓာတ်တွေ အများအပြားပါဝင်ပါတယ်။ ဗီတာမင် A ၊ B ၊ E တွေလည်းပါဝင်မှုများပါတယ်။
(၆) ဖောလိတ်ဓာတ် ကြွယ်ဝတယ်
ပဲစောင်းလျားသီးက ဒီအင်န်အေနဲ့ဆဲလ်တွေအတွက် မရှိမဖြစ်လိုအပ်တဲ့ဓာတ်တစ်မျိုးဖြစ်ပါတယ်။ အမျိုးသမီးတွေမှာဆိုရင် ကိုယ်ဝန်ရကာစနဲ့ ကိုယ်ဝန်ဆောင်ချိန်အတွင်း အစာအာဟာရကနေ ဖောလိတ်ဓာတ်ရရှိမှုလုံလောက်အောင် အထောက်အကူပေးနိုင်ပါတယ်။
(၇) ပရိုတင်းကြွယ်ဝတယ်
ပရိုတင်းပါဝင်မှုကိုကြည့်မယ်ဆိုရင် ပဲပိစပ်နဲ့အတူတူပါပဲ။ တခြားပဲတွေလိုပဲ ပဲစောင်းလျားသီး အစေ့ရဲ့ပရိုတင်းပမာဏဟာ ပြောင်းဖူးနဲ့တွဖြက်လိုက်ရင် နွားနို့ကိုမီနိုင်ပါတယ်တဲ့။
(၈) ကယ်လ်စီယမ်ကြွယ်ဝတယ်
ကယ်လ်စီယမ်ပါဝင်မှုမြင့်မားလို့ အရိုးတွေသန်မာစေပြီး နေမကောင်းဖြစ်နေသူတွေ၊ အားနည်းနေသူတွေကို ခွန်အားတိုးစေပါတယ်။
သူ့ရဲ့အကျိုးကျေးဇူးလေးတွေကိုသိလိုက်ရရင် အမြဲမဟုတ်တောင် မကြာမကြာစားမိတော့မှာပါ
အစာလည်းဆေး၊ ဆေးလည်းအစာ ဆိုသလို အစားအသောက်တွေကို ဉာဏ်ရှိသလိုအသုံးချရင်း ကိုယ့်ကျန်းမာရေးကိုစောင့်ရှောက်သင့်ပါတယ်။ အားဆေးတွေချည်းအားမကိုးဘဲ သဘာဝ အသီးအရွက်တွေကနေ အာဟာရဓာတ်တွေ တိုက်ရိုက်ရယူလိုက်ပါ။ ဘေးထွက်ဆိုးကျိုးနဲ့ တာရှည်ခံပစ္စည်းတွေလည်းကင်းစင်စေပါလိမ့်မယ်။
သတင်းအပြည့်အစုံ –
Ref: Hello ဆရာဝန်
ရေးသားသူ Yun Sandi Nan Mon
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win
