လူတစ်ယောက်ဟာ သင့်တင့်မျှတတဲ့ရေဓာတ်ရရှိမှ ကျန်းမာသန်စွမ်းစွာ နေနိုင်မှာဖြစ်ပါတယ်။ ရေဓာတ်ကုန်ခန်းမယ်ဆိုရင် ပင်ပန်းနွမ်းလျခြင်း၊ ခေါင်းကိုက်ခြင်း၊ အသားရေပြဿနာတွေ၊ ကြွက်သားနာကျင်ခြင်းတွေကဲ့သို့ ကျန်းမာရေး ပြဿနာတွေ ကြုံတွေ့ရနိုင်ပါတယ်။ ရေဓာတ်ပြည့်ဝဖို့အတွက် တစ်နေ့ကို ရေ (၂) လီတာသောက်သုံးဖို့ အရေးကြီးပါတယ်။ ဒါပေမဲ့ လူတော်တော်များများအတွက် တစ်နေ့ကို ရေ (၂) လီတာသောက်သုံးဖို့ရာ ခက်ခဲနေကြပါတယ်။ ဒါကြောင့် သင့်ကိုယ့်ကိုယ်ကို ရေဓာတ်ဖြည့်တင်းပေးဖို့ဆိုရင် သောက်ရေအပြင် ရေဓာတ်ပါဝင်မှုများတဲ့ အသီးနဲ့ ဟင်းသီးဟင်းရွက်တွေရှိပါတယ်။ ရေချည်းသောက်နေရတာ ငြီးငွေ့နေပေမဲ့ ရေဓာတ်ပါဝင်မှုများတဲ့အသီးနဲ့ ဟင်းသီးဟင်းရွက်တွေကိုတော့ စားဖြစ်ကြမှာပါ။ ရေဓာတ်ပါဝင်မှုအများဆုံး အစားအစာတွေကလည်း ဘာတွေလဲဆိုတာ ကြည့်လိုက်ကြရအောင်..။
ဖရဲသီး (ရေဓာတ်ပါဝင်မှု ၉၆ ရာခိုင်နှုန်း)
ကျန်းမာရေးနဲ့ညီညွှတ်တဲ့၊ အရသာရှိတဲ့၊ အရည်ရွမ်းတဲ့ဖရဲသီးက ရေဓာတ်ပါဝင်မှုအများဆုံး အစားအစာတွေထဲမှာ တစ်ခုအပါအဝင်ဖြစ်ပါတယ်။ ဒီရေဓာတ်ပါဝင်မှုများတဲ့ အသီးက အမျှင်ဓာတ်အပြင် ဗီတာမင်စီ၊ ဗီတာမင်အေ၊ မဂ္ဂနီစီယမ်၊ ပိုတတ်စီယမ်ကဲ့သို့ အခြားအရေးပါတဲ့ အာဟာရဓာတ်တွေနဲ့ ပြည့်ဝနေပါတယ်။ ဒါ့အပြင် ဖရဲသီးက ဦးနှောက်သွေးကြောပြတ်ခြင်းနဲ့ ကင်ဆာရောဂါ ဖြစ်ပွားနိုင်ချေ မြင့်မားမှုကနေ ကာကွယ်ပေးနိုင်ပါတယ်။
ဒေါက်ခွရွက် (ရေဓာတ်ပါဝင်မှု ၉၂ ရာခိုင်နှုန်း)
ဒေါက်ခွရွက်က မဂ္ဂနီစီယမ်နဲ့ အခြားအရေးပါတဲ့ ဗီတာမင်ဓာတ်တွေ၊ သတ္တုဓာတ်တွေ မြင့်မားစွာပါဝင်ပါတယ်။ ဒီဟင်းသီးဟင်းရွက်က ရေဓာတ်ပြည့်ဝပြီး ကယ်လိုရီပမာဏ နည်းပါတယ်။ အသားရေ၊ ဆံပင်နဲ့ အရိုးကျန်းမာရေးအတွက် ကောင်းမွန်ပါတယ်။
သခွားသီး (ရေဓာတ်ပါဝင်မှု ၉၅ ရာခိုင်နှုန်း)
သခွားသီးရဲ့ သဘာဝရေဓာတ်ပါဝင်မှုက သင့်ကို ရေဓာတ်ကုန်ခန်းခြင်းကနေ ကာကွယ်ပေးနိုင်ပါတယ်။ သင့်ကို ရေဓာတ်ပြည့်ဝနေစေတာအပြင် အာဟာရဓာတ်များလည်း ပြည့်ဝပါတယ်။ ဒါ့အပြင် ကယ်လိုရီပါဝင်မှုလည်း နည်းပါးတာကြောင့် ကိုယ်အလေးချိန် ချနေတဲ့သူတွေအတွက် သင့်တော်ပါတယ်။
ခရမ်းချဉ်သီး (ရေဓာတ်ပါဝင်မှု ၉၄ ရာခိုင်နှုန်း)
ခရမ်းချဉ်သီးက အာဟာရဓာတ်၊ ဗီတာမင်ဓာတ်၊ အန်တီအောက်စီဒန့်ဓာတ်တွေ ကြွယ်ဝပါတယ်။ ဒီအသီးက သင့်ကို ရေဓာတ်ပြည့်ဝနေစေရုံသာမက အမျိုးမျိုးသောရောဂါဘယတွေကလည်း ကာကွယ်ပေးပါတယ်။ သင့်ခန္ဓာကိုယ်ကို ရေဓာတ်ထိန်းပေးဖို့ဆိုရင် ခရမ်းချဉ်သီးကို သုတ်စားတာ၊ ပဲပင်ပေါက်ထဲ ထည့်စားတာတွေလုပ်လို့ရပါတယ်။
လိမ္မော်သီး (ရေဓာတ်ပါဝင်မှု ၈၈ ရာခိုင်နှုန်း)
လိမ္မော်သီးက ဗီတာမင်စီနဲ့ ပိုတတ်စီယမ်ဓာတ်တွေ ကြွယ်ဝပြီး နှလုံးကျန်းမာရေးနဲ့ ကိုယ်ခံစွမ်းအားစနစ်တို့ကို မြှင့်တင်ပေးနိုင်ပါတယ်။ ရောဂါဖြစ်ပွားမှုကို တိုက်ဖျက်ပေးတဲ့ အန်တီအောက်စီဒန့်ဓာတ်တွေ ကြွယ်ဝစွာပါဝင်တာကြောင့် ဆဲလ်ပျက်စီးမှုတွေကို ကာကွယ်ပေးနိုင်ပါတယ်။
စတော်ဘယ်ရီသီး (ရေဓာတ်ပါဝင်မှု ၉၁ ရာခိုင်နှုန်း)
စတော်ဘယ်ရီသီးရဲ့ ၉၁ ရာခိုင်နှုန်းက ရေတွေချည်းပါပဲ။ ဒီအသီးကို နေ့စဉ်စားသုံးပေးမယ်ဆိုရင် တစ်နေ့တာ ရေသောက်သုံးမှုပမာဏကို ထိန်းညှိပေးပါလိမ့်မယ်။ စတော်ဘယ်ရီအသီးက အမျှင်ဓာတ်၊ ရောဂါဖြစ်ပွားမှုကို တိုက်ဖျက်ပေးတဲ့ အန်တီအောက်စီဒန့်ဓာတ်၊ ဗီတာမင်ဓာတ်နဲ့ သတ္တုဓာတ်တွေ ကြွယ်ဝစွာ ပါဝင်တာကြောင့် စားသုံးပေးသင့်ပါတယ်။
သခွားမွှေး (ရေဓာတ်ပါဝင်မှု ၉၀ ရာခိုင်နှုန်း)
သခွားမွှေးက ရေဓာတ်နဲ့အာဟာရဓာတ်တွေ မြင့်မားစွာပါဝင်ပြီး သခွားမွှေးသီးတစ်ပန်းကန်မှာ ရေဓာတ် ၉၀ရာခိုင်နှုန်းပါဝင်ပါတယ်။ ဒါတင်မကသေးပါဘူး။ သခွားမွှေးသီးက ဗီတာမင်အေ၊ ဗီတာမင်စီဓာတ်တွေ ကြွယ်ဝတာကြောင့် ကိုယ်ခံစွမ်းအားစနစ်ကို ကောင်းမွန်စေပါတယ်။
Ref: 7 most hydrating foods on the planet
WL (ရိုးရာလေး)
