ကိုရိုနာကပ်ဘေးကြောင့် အထိနာနေတဲ့ ညဉ့်ငှက်လေးတွေအတွက် အစိုးရအဖွဲ့တွေရဲ့ထောက်ပံ့ကူညီမှု

မီကာလည်း စိုးထိတ်နေတယ်။ ဂျပန်နိုင်ငံရဲ့ ပြည့်တန်ဆာတစ်ယောက်ဖြစ်တဲ့ မီကာဟာ တစ်နေ့ကို ဖောက်သည် ၃၊ ၄ ယောက် ရနေကြပါ။ အခုတော့ ကိုရိုနာကပ်ဘေးနဲ့ ကြုံရပြီ။ လူတွေက အိမ်ထဲမှာပဲ နေကြတော့တယ်။ တစ်ယောက်နဲ့ တစ်ယောက် မထိမိအောင် ရှောင်နေကြပြီ။ ဒါကြောင့် မီကာလည်း ဖောက်သည်မရတော့ ပိုက်ဆံ ပြတ်ပြီပေါ့။ စုထားဆောင်းထားတာလည်း မရှိ၊ တခြားကနေ ငွေဝင်စရာလည်း မရှိတော့ ချေးငှား စားသောက်ရတာပေါ့။ သူက တခြားအလုပ်ရှာဖို့ ကြိုးစားပါသေးတယ်။ ဒါပေမဲ့ စီးပွားရေးအကျပ်အတည်း ကြုံနေတဲ့ အခုလိုအချိန်မှာ ဘယ်သူကမှ အလုပ်မခေါ်ဘူးလေ။ ဒီအတိုင်းဆိုရင် အိမ်ငှားခလည်း ပေးနိုင်မှာမဟုတ်ဘူး။ မရှိမဖြစ်လိုတဲ့ပစ္စည်းတွေလည်း မဝယ်နိုင်တော့ဘူး။ လောလောလတ်လတ် ချေးထားတဲ့ အကြွေးတွေလည်း မပေးနိုင်လောက်ဘူး။

” နေစရာရော ရှိပါ့မလား၊ ဝမ်းရေးအတွက် ပိုက်ဆံရမယ့်အလုပ်ရော ရပါ့မလားဆိုတာ စိတ်ပူမိတယ်။ ကျန်းမာရေးကို စိုးရိမ်ပေမဲ့ ဘယ်လိုရှင်သန်ရမလဲဆိုတာ ပိုပြီးစိုးရိမ်ပါတယ်” လို့ မီကာက ပြောပါတယ်။ ကမ္ဘာလုံးဆိုင်ရာ ကပ်ရောဂါအဖြစ် ကြေညာထားရတဲ့ ကိုရိုနာဗိုင်းရပ်စ်ကြောင့် ဂျပန်နိုင်ငံမှာ ပိတ်ဆို့မှုတွေ၊ ကန့်သတ်မှုတွေ လုပ်ထားလို့ ပြည့်တန်ဆာတွေ အကျပ်ရိုက်ကုန်ကြတယ်။ ဂျပန်တစ်နိုင်ငံလုံး အရေးပေါ်အခြေအနေ ကြေညာထားပြီး လုပ်ငန်းတော်တော်များများကို ပိတ်ခိုင်းထားပါတယ်။ လူတွေကိုလည်း အိမ်ပြင်မထွက်ကြဖို့ အကြံပြုထားတယ်။ ဂျွန်ဟော့ကင်းတက္ကသိုလ်ရဲ့ အချက်အလက်တွေအရတော့ ဂျပန်နိုင်ငံမှာ COVID-19 ကူးစက်ခံရသူ အနည်းဆုံး ၁၀,၇၉၇ ယောက်ရှိပြီး သေဆုံးသူ ၂၃၆ ယောက် ရှိနေပါတယ်။

စီးပွားရေးထိခိုက်မှု သက်သာစေဖို့ ဗဟိုအစိုးရက ယန်းငွေ ၁၀၈ ထရီလျံ (အမေရိကန်ဒေါ်လာ ၉၈၉ ဘီလျံ) တန်ကြေးရှိတဲ့ ငွေကြေးထောက်ပံ့မှု စီမံချက် ဖော်ဆောင်လိုက်ပါပြီ။ အငြင်းပွားစရာတွေ ဖြစ်ခဲ့ပြီးနောက်မှာတော့ သတ်မှတ်ချက်တွေနဲ့ ကိုက်ညီရင် ပြည့်တန်ဆာတွေလည်း ထောက်ပံ့ကူညီမှု လျှောက်ထားခွင့်ရမှာပါ။ ဒါဟာ လူမှုရေးဒဏ်ရာဒဏ်ချက်တွေ ကာလရှည်ခံစားခဲ့ရတဲ့ ပြည့်တန်ဆာလုပ်ငန်းအတွက် တိုးတက်မှုတစ်ရပ်ဖြစ်တယ်လို့ တက်ကြွလှုပ်ရှားသူတချို့က ချီးကျူးခဲ့ပါတယ်။ ဒါပေမဲ့ ပြည့်တန်ဆာ တော်တော်များများအတွက်တော့ ငွေကြေးထောက်ပံ့မှုစီမံချက်က စိတ်အေးစရာ မဖြစ်စေပါဘူး။ လျှောက်ထားခွင့်ရမယ့် စည်းမျဉ်းတွေကလည်း ရှင်းရှင်းလင်းလင်းမရှိဘဲ တင်းတင်းကျပ်ကျပ် ဖြစ်နေပါတယ်။ တချို့တွေကတော့ သူတို့ကိုယ်သူတို့ ပြည့်တန်ဆာဆိုတာ လူသိရှင်ကြားမဖော်ပြဘဲ အကျိုးခံစားခွင့် လျှောက်ထားလို့ ရပါ့မလားဆိုတာ ဇဝေဇဝါဖြစ်နေကြပါတယ်။

” အစိုးရက လူတိုင်းကို ကူညီပေးမယ်လို့ ရှင်းရှင်းလင်းလင်း မပြောပါဘူး။ အလုပ်မရှိလို့ စားဖို့၊ သောက်ဖို့၊ အသက်ရှင်သန်ဖို့ အခက်တွေ့နေသူ အများကြီးပါ” လို့ မီကာက ပြောပါတယ်။ ဂျပန်နိုင်ငံမှာ ပြည့်တန်ဆာလုပ်ငန်း ဒါမှမဟုတ် အခကြေးငွေယူပြီး လိင်ပျော်ပါးမှုကို ပြစ်မှုအဖြစ် သတ်မှတ်ထားပါတယ်။ ဒါပေမဲ့ တရားဝင်တဲ့ လိင်လုပ်ငန်းတွေလည်း ရှိပါတယ်။ ဂျပန်နိုင်ငံရဲ့ လိင်လုပ်ငန်းဟာ တစ်နှစ်ဝင်ငွေ အမေရိကန်ဒေါ်လာ ၂၄ ဘီလျံရှိတယ်လို့ ကမ္ဘာလုံးဆိုင်ရာ မှောင်ခိုဈေးကွက်ကို သုတေသနလုပ်နေတဲ့ Havocscope အဖွဲ့အစည်းက ဖော်ပြပါတယ်။ မီကာကတော့ တရားဝင်ခွင့်ပြုထားတဲ့ လိင်လုပ်ငန်းမှာ အလုပ်လုပ်သူပါ။ delivery health လို့ အမည်ပေးထားတဲ့ ဒီအမျိုးအစားဟာ ပြည့်တန်ဆာတွေကို ခေါ်ဆိုတဲ့နေရာ အရောက်ပို့ပေးတဲ့ ပုံစံပါ။ နောက်ထပ်တရားဝင် လိင်လုပ်ငန်း အမျိုးအစားတစ်ခုကတော့ fashion health လို့ ခေါ်ပါတယ်။ အနှိပ်ခန်းတွေမှာ လိင်ဝန်ဆောင်မှုပေးတဲ့ ပုံစံပါ။ ဂျပန်အစိုးရက ဘဏ္ဍာရေးထောက်ပံ့မှုအစီအစဉ်ကို စတင်အကောင်အထည်ဖော်ချိန်မှာ လိင်လုပ်ငန်း၊ ဖျော်ဖြေရေးလုပ်ငန်းတွေမှာ တရားဝင် အလုပ်လုပ်နေသူတွေကို ချန်ရစ်ခဲ့ပါတယ်။

ဒီလုပ်ရပ်က ” အလုပ်အကိုင်ခွဲခြားမှု” ဖြစ်တယ်လို့ တက်ကြွလှုပ်ရှားသူတွေနဲ့ အတိုက်အခံ လွှတ်တော်အမတ်တွေက ဆိုကြပါတယ်။ Sex Work And Sexual Health (SWASH) အဖွဲ့အစည်းကတော့ ” ထောက်ပံ့ငွေပေးအပ်မယ့်သူထဲမှာ ပြည့်တန်ဆာတွေကို ချန်မထားကြပါနဲ့။ ပြည့်တန်ဆာတွေနဲ့ သူတို့ရဲ့သားသမီးတွေကိုလည်း တခြားအလုပ်သမားတွေနဲ့ သားသမီးတွေလိုပဲ ကာကွယ်ပေးစေလိုပါတယ်” လို့ ဂျပန်အစိုးရထံ စာရေးသားပေးပို့ခဲ့ပါတယ်။ အဲဒီနောက်မှာတော့ အစိုးရက ဦးတည်ချက်ပြောင်းလဲခဲ့ပြီး လိင်လုပ်ငန်းမှာ တရားဝင်အလုပ်လုပ်နေသူတွေ ပါဝင်ခွင့်ရမယ့် အစီအစဉ်တစ်ရပ် အဆိုပြုခဲ့ပါတယ်။ စည်းမျဉ်းမူကြမ်းတွေအရ ကျောင်းတွေပိတ်ထားချိန်မှာ ကလေးတွေကို စောင့်ရှောက်ဖို့ အိမ်မှာနေရတယ်ဆိုရင် ပြည့်တန်ဆာအေဂျင်စီတွေနဲ့ ပြည့်တန်ဆာတွေက ထောက်ပံ့မှုခံစားခွင့်ရနိုင်တယ်လို့ ဆိုပါတယ်။ ဒါ့အပြင် ပြည့်တန်ဆာတွေဟာ ကိုရိုနာဗိုင်းရပ်စ်ကြောင့် ဝင်ငွေဆုံးရှုံးရသူတွေအတွက် သတ်မှတ်ထားတဲ့ ငွေသားထောက်ပံ့မှုစီမံချက်မှာလည်း ပါဝင်လျှောက်ထားခွင့် ရှိပါတယ်။

ဒါပေမဲ့ အဲဒီကိစ္စက ဂျပန်ပြည်သူတွေကြားမှာ သဘောထားကွဲလွဲမှုတွေ ဖြစ်စေခဲ့ပါတယ်။ ဂျပန်နိုင်ငံမှာ လိင်ကိစ္စနဲ့ ပြည့်တန်ဆာလုပ်ငန်းအပေါ် သဘောထားက ကွန်ဆာဗေးတစ်အမြင်ဘက် ယိမ်းယိုင်ကြပါတယ်။ ရုပ်သံကြယ်ပွင့်တွေအပါအဝင် လူသိများထင်ရှားတဲ့ ပုဂ္ဂိုလ်တွေကတော့ အခွန်ထမ်းပြည်သူတွေရဲ့ ငွေကြေးကို အသုံးပြုပြီး ပြည့်တန်ဆာတွေအပေါ် ထောက်ပံ့ပေးနေတာကို ဆန့်ကျင်ကန့်ကွက်ကြပါတယ်။ ညလုပ်ငန်း( ပြည့်တန်ဆာအလုပ်ကို ရည်ညွှန်းသုံးနှုန်း)လည်း အလုပ်ပါပဲ #NightWorkISAlsoWork ဆိုတဲ့ တုံ့ပြန်မှုတွေကလည်း လူမှုကွန်ရက်ပေါ်မှာ ပျံ့နှံ့နေပါတယ်။ ဘယ်သူဘယ်ဝါ ခွဲခြားဖော်ပြခြင်းမရှိတဲ့ တွစ်တာအသုံးပြုသူတစ်ယောက်ကတော့ ကျောင်းကိစ္စချေးငွေ ပြန်ပေးဖို့ ပြည့်တန်ဆာလုပ်ငန်းထဲ ဝင်ရောက်ခဲ့တာလို့ ရေးထားပါတယ်။ သူတို့တွေက ဂျပန်အမဲသား (Wagyu) လို တန်ဖိုးကြီး စားစရာတွေစားဖို့ ငွေကြေးအထောက်အပံ့ တောင်းခံနေတာမဟုတ်ဘူး၊ စားသောက်စရိတ်၊ အိမ်လခနဲ့ မီတာခပေးနိုင်ဖို့ တောင်းခံနေရတာပါလို့ ရေးသားထားတဲ့ Tweet တစ်ခုဟာ Likes 9000 နဲ့ ပြန်လည်ဝေမျှသူ ၃၈၀၀ ရှိခဲ့ပါတယ်။

မလိုလားအပ်တဲ့ ရိုက်ခတ်မှုတွေ ကြုံရမှာစိုးရိမ်လို့ ပြည့်တန်ဆာတော်တော်များများက သူတို့ရဲ့အလုပ်အကိုင်နဲ့ ဝင်ငွေကို ဖော်ပြကြခြင်းမရှိပါဘူး။ ပြည့်တန်ဆာလုပ်ငန်းက တရားဝင်တယ်ဆိုရင်တောင် ရှက်ရွံ့စိတ်နဲ့ အမည်းစက်ထင်ကျန်မှာ စိုးရိမ်ကြလို့ မှတ်တမ်းတွေမှာ သူတို့ကိုယ်သူတို့ ပြည့်တန်ဆာလို့ ဖော်ပြကြဖို့ တွန့်ဆုတ်နေတတ်ကြပါတယ်။ မီကာရဲ့မိသားစုကတောင် မီကာ ဘာအလုပ်လုပ်နေလဲဆိုတာ မသိပါဘူး။ အဲဒီလို စာရွက်စာတမ်းမရှိတဲ့အတွက် သူတို့တွေ ငွေကြေးအထောက်အပံ့ရဖို့ အတားအဆီးဖြစ်နေပါတယ်။ သူတို့က အခွန်ပေးဆောင်ရာမှာ သတင်းအချက်အလက်တွေ ချန်ရစ်ထားမိခဲ့တယ်လို့ ဝန်ခံတဲ့ နည်းလမ်းတစ်ခုတော့ ရှိပါတယ်။ ဒါဆိုရင်လည်း ဘေးထွက်ဆိုးကျိုးကတော့ ရှိဦးမှာပါပဲ။ ဗဟိုအစိုးရကတော့ ဘဏ္ဍာရေးထောက်ပံ့မှုဆိုင်ရာ အချက်အလက်တွေကို အကြမ်းဖျင်းရေးဆွဲနေတုန်းပါပဲ။ အဆိုပြုချက်တစ်ရပ်မှာတော့ ကိုရိုနာဗိုင်းရပ်စ် ကပ်ဘေးကြောင့် ဝင်ငွေမရှိတော့တဲ့ အိမ်ထောင်စုတစ်ခုစီတိုင်းကို ယန်း ၃၀၀၀၀၀ (အမေရိကန်ဒေါ်လာ ၂,၇၈၅) ပေးမယ့်အစား လူတစ်ယောက်စီကို ယန်း ၁၀၀,၀၀၀ ပေးမယ်လို့ ဖော်ပြထားပါတယ်။

ကိုရိုနာဗိုင်းရပ်စ် ကပ်ဘေးဆိုက်ချိန်မှာ တခြားနိုင်ငံတွေရဲ့ ပြည့်တန်ဆာတွေလည်း အလားတူအခက်အခဲတွေ ကြုံတွေ့နေရပါတယ်။ တချို့နိုင်ငံတွေမှာတော့ ပြည့်တန်ဆာတွေရဲ့ ဝန်ထုပ်ဝန်ပိုးကို အစိုးရက ကြားဝင်ကူညီပေးကြပါတယ်။ ပြည့်တန်ဆာလုပ်ငန်းကို တရားဝင်သတ်မှတ်ပေးတဲ့ လက်တစ်ဆုပ်စာ အာရှနိုင်ငံတွေထဲမှာ ဘင်္ဂလားဒေ့ရှ်နိုင်ငံလည်း ပါပါတယ်။ ဘင်္ဂလားဒေ့ရှ်မှာ ပြည့်တန်ဆာခန်းတွေကို စည်းမျဉ်းထိန်းသိမ်းပြီး လိုင်စင်တွေ ချပေးပါတယ်။ ပြီးခဲ့တဲ့လမှာတော့ ဘင်္ဂလားဒေ့ရှ်အစိုးရက နိုင်ငံတစ်ဝန်းမှာရှိတဲ့ ပြည့်တန်ဆာခန်းတွေကို ပိတ်ဖို့ ညွှန်ကြားခဲ့ပါတယ်။ ပြည့်တန်ဆာ ၂၀၀၀ လောက်ရှိပြီး ဘင်္ဂလားဒေ့ရှ်နိုင်ငံရဲ့ အကြီးဆုံး ပြည့်တန်ဆာခန်းဖြစ်တဲ့ ဒေါ်လက်ဒီယာမြို့က (Daulatdia) ပြည့်တန်ဆာခန်းလည်း ပါပါတယ်။ ပြည့်တန်ဆာခန်းတွေ ပိတ်လိုက်လို့ ပြည့်တန်ဆာတွေအပေါ် သက်ရောက်မှုဒဏ် လျော့နည်းစေဖို့ ဒေါ်လက်ဒီယာမြို့က ပြည့်တန်ဆာတွေကို အိမ်ငှားခ ဆိုင်းငံ့ပေးပြီး တစ်ယောက်ကို ဆန် ၄၄ ပေါင်ကနေ ၆၆ ပေါင်ကြား ဝေပေးခဲ့တယ်လို့ ဒေသခံရဲတပ်ဖွဲ့နဲ့ မီဒီယာတွေက ဖော်ပြပါတယ်။

မလေးရှားမှာတော့ အခကြေးငွေယူတဲ့ လိင်လုပ်ငန်းအားလုံးကို တရားမဝင်ဘူးလို့ သတ်မှတ်ထားပါတယ်။ ဒါပေမဲ့ ကပ်ရောဂါဖြစ်ပွားနေချိန်မှာတော့ ပြည့်တန်ဆာတွေကို ထောက်ပံ့ပေးပါတယ်။ မလေးရှားအစိုးရက အိမ်ရာမဲ့နဲ့ အလုပ်လက်မဲ့သူတွေကို ယာယီနေစရာနေရာနဲ့ လစဉ်ထောက်ပံ့ငွေ ပေးအပ်ခဲ့ပါတယ်။ အဲဒီသူတွေထဲမှာ တော်တော်များများက ပြည့်တန်ဆာတွေပါ။ လက်ရှိအချိန်အထိတော့ ပြည့်တန်ဆာတွေနဲ့ပတ်သက်ပြီး ထိုင်းနိုင်ငံရဲ့ ထောက်ပံ့ကူညီမှုက အပြုသဘောအဆောင်ဆုံးပါပဲ။

ထိုင်းနိုင်ငံမှာ ပြည့်တန်ဆာလုပ်ငန်းကို ပြစ်မှုအဖြစ် သတ်မှတ်ထားပေမဲ့ ပြည့်တန်ဆာလုပ်ငန်းကနေ တစ်နှစ်ကို အမေရိကန်ဒေါ်လာ ၄ ဘီလျံကနေ ၆ ဘီလျံကြား ရရှိနေပြီး အဲဒီပမာဏက ထိုင်းနိုင်ငံ ပြည်တွင်းကုန်ထုတ်လုပ်မှုရဲ့ ၅ ရာခိုင်နှုန်းကနေ ၁၀ ရာခိုင်နှုန်းကြားရှိပါတယ်။ ပြီးခဲ့တဲ့လမှာ ထိုင်းအစိုးရက ဘားတွေ၊ အရွယ်ရောက်ပြီးသူတွေအတွက် ဖျော်ဖြေရေးနေရာတွေကို ပိတ်ပစ်လိုက်ချိန်မှာ ထိုင်းပြည့်တန်ဆာတော်တော်များများ အလုပ်လုပ်ရမယ့်နေရာ ပျောက်ပြီး ဖောက်သည်မရှိတော့ပဲ ဖြစ်သွားပါတယ်။ ပြည့်တန်ဆာတစ်ယောက်ကို မှီခိုစားသောက်နေရသူ ၅ ယောက်ကနေ ၈ ယောက်အထိရှိလို့ လုပ်ငန်းရပ်တန့်သွားချိန်မှာ အိမ်ငှားခနဲ့ စားစရိတ် ဖြေရှင်းဖို့ တက်သုတ်ရိုက်ကြိုးပမ်းရတော့တာပေါ့။

အဲဒါကြောင့် အစိုးရရဲ့ ကပ်ဘေးသက်သာလျော့ပါးစေရေး ထောက်ပံ့မှုအစီအစဉ်အရ အလုပ်လက်မဲ့ ခံစားခွင့်၊ ထောက်ပံ့စရိတ် လျောက်ထားခွင့်ရမယ်လို့ သတင်းကြားကြားချင်း ပြည့်တန်ဆာတော်တော်များများ သက်ပြင်းချနိုင်သွားတာပေါ့။ ” ကျွန်မတို့ ဆူနာမီဘေး၊ ရေဘေးနဲ့ သဘာဝဘေးတွေ ဖြတ်သန်းခဲ့ဖူးပါတယ်။ သဘာဝဘေးကြုံတိုင်း ထောက်ပံ့စရိတ်ရသူစာရင်းမှာ ကျွန်မတို့ မပါပါဘူး။ (ဒီတစ်ခါတော့) အစိုးရရဲ့ ထောက်ပံ့ကူညီမှု ရမယ့်သူစာရင်းမှာ ပြည့်တန်ဆာတွေ ချန်ထားမခံရတော့ပါဘူး”လို့ ထိုင်းနိုင်ငံရဲ့ ပြည့်တန်ဆာအခွင့်အရေး လှုပ်ရှားပေးနေတဲ့ Empower Foundation အဖွဲ့ဝင် ဟီလ်တန်က ပြောပါတယ်။ ထိုင်းအစိုးရက သူတို့အစီအစဉ်ကို စတင်အကောင်အထည်ဖော်နေပြီး တချို့တွေကတော့ အထောက်အပံ့တောင် ရပြီးကြပါပြီ။ ဒါဟာ ပြည့်တန်ဆာတွေကို ပိုကောင်းတဲ့ ကာကွယ်စောင့်ရှောက်မှုလုပ်ပေးဖို့၊ ပိုကောင်းတဲ့ လုပ်ငန်းခွင်ဖန်တီးပေးဖို့၊ ပြည့်တန်ဆာတွေကို လူ့အဖွဲ့အစည်းက လက်ခံဖို့ လှုပ်ရှားခဲ့ကြတဲ့ ဟီလ်တန်တို့လို တက်ကြွလှုပ်ရှားသူတွေအတွက် အောင်ပွဲတစ်ရပ်ပါပဲ။ ” ဒီကပ်ကြီးထဲမှာ ပြည့်တန်ဆာလုပ်ငန်းကို အသိအမှတ်ပြုတယ်ဆိုရင် ကပ်ကြီးလွန်မြောက်သွားရင်လည်း အသိအမှတ်ပြုရမှာပါ။ နောက်ကြောင်းပြန်လှည့်တော့မှာမဟုတ်ပါဘူး”လို့ ဟီလ်တန်က ပြောပါတယ်။

Ref: CNN

Nz (ရိုးရာလေး)