ရာသီဥတုပူနေတဲ့အချိန် ဘာလို့ ဖရဲသီး စားပေးသင့်တာလဲ

ပူအိုက်တဲ့ ရာသီမှာ လူတော်တော်များများက ရေမကြာခဏ ဆာတတ်ကြတာကြောင့် ဖရဲသီးကို စားတတ်ကြပါတယ်။ နေပူတဲ့နေ့ရက်တွေမှာဆိုရင် စတိုးဆိုင်တွေမှာကအစ လှည်းလေးတွေအဆုံး ဖရဲသီးတွေ လှီးစိတ်ပြီး ရောင်းနေတာလည်း တွေ့ဖူးကြမှာပါ။

အရည်ရွှမ်းပြီး အရသာလည်း ရှိတဲ့ ဖရဲသီးက ဒီလို ပူအိုက်တဲ့ ရာသီအတွက် ကျန်းမာရေးဆိုင်ရာ ဘယ်လိုအကျိုးကျေးဇူးတွေ ရစေနိုင်လဲဆိုတာကို ပြောပြပေးမယ်နော်။

၁။ ရေဓါတ်ဖြည့်တင်းပေးတယ်။

ရာသီဥတုပူလာရင် ချွေးထွက်လာမယ်။ ဆီးသွားများတဲ့အခါ ခန္ဓါကိုယ်က ရေဓါတ်ဆုံးရှုံးတာ သဘာဝပါပဲ။ ရေဓါတ်ဆုံးရှုံးတဲ့အခါမှာ ကိုယ်လက်မအီမသာဖြစ်တာ၊ လည်ချောင်းခြောက်ပြီး နာတာ၊ ခေါင်းမူးခေါင်းကိုက်တာ၊ နေရထိုင်ရခက်တာ၊ အလုပ်လုပ်ချင်စိတ် မရှိတာ၊ မူးဝေအော့အန်ချင်စိတ်တွေ ဖြစ်လာမှာပါ။

ဖရဲသီးမှာ ရေဓါတ် ၉၂ရာခိုင်နှုန်းပါဝင်တာကြောင့် ရေဓါတ်ခမ်းခြောက်မှုကို ကာကွယ်ပေးနိုင်တယ်။ ဒီလို ပူအိုက်တဲ့ ရာသီမှာ သဘာဝရေသန့်အပြင် ဖြည့်စွက်အစားအစာအနေနဲ့ စားပေးသင့်တဲ့ အစားအစာထဲမှာ ပါဝင်ပါတယ်။

၂။ အာဟာရဓါတ်ပေါင်း များစွာ ပါဝင်ပါတယ်။

ဖရဲသီးမှာ ကယ်လိုရီပမာဏ အလွန်နည်းပြီး ကိုယ်ခန္ဓါအတွက် လိုအပ်တဲ့ ဗီတာမင် A ၊ ဗီတာမင် C ၊ ဗီတာမင် B အုပ်စု၊ ပိုတက်စီယမ်ဓါတ်၊ မဂ္ဂနီဆီယမ်ဓါတ် အစရှိတဲ့ သတ္တုဓါတ်တွေ များစွာ ပါဝင်ပါတယ်။ ရေဓါတ်ဖြည့်တင်းပေးပြီး ဗီတာမင် C ကြောင့် အသားအရေကို ကြည်လင်လန်းဆန်းကာ လှပစေတယ်။ နေရောင်ခြည်ဒဏ်ေကြာင့် အသားအရေပျက်စီးကြမ်းတမ်းလာတာ၊ အိုမင်းရင့်ရော်တာကိုလည်း ကာကွယ်ပေးနိုင်ပါတယ်။

၃။ ကင်ဆာရောဂါတွေကို ကာကွယ်ပေးနိုင်တယ်။

ဖရဲသီးမှာ ကင်ဆာရောဂါတချို့ကို ကာကွယ်ပေးနိုင်တဲ့ အာဟာရဓါတ်ပေါင်းအုပ်စုတွေ ပါဝင်ပါတယ်။ ဒါ့အပြင် ကိုယ်ခန္ဓါအတွက် လိုအပ်တဲ့ ဗီတာမင်နဲ့ သတ္တုဓါတ်များစွာ ပါဝင်တာကြောင့် ကျန်းမာစေတယ်။ အစာကြေစေတယ်။ ကိုယ်တွင်းအင်္ဂါတွေကိုလည်း ကောင်းစွာ အလုပ်လုပ်နိုင်စေဖို့ ကူညီပေးနိုင်ပါတယ်။

၄။ နှလုံးကျန်းမာရေးကို ကောင်းစေတယ်။

နှလုံးရောဂါကြောင့် ရုတ်တရက်သေဆုံးသူတွေ ကမ္ဘာအနှံ့ များသထက် များလာတာကို သိကြမှာပါ။ နေထိုင်စားသောက်မှု ပုံစံအပြင် နေ့စဉ် အစာအာဟာရမျှတစွာ စားသုံးခြင်းဖြင့် နှလုံးရောဂါဖြစ်နိုင်ခြေကို လျှော့ချပေးနိုင်ပါတယ်။

ဖရဲသီးဟာ သွေးတွင်း ကိုလက်စထရောဓါတ်ကို လျှော့ချပေးနိုင်တယ်။ ကယ်လိုရီ ပါဝင်မှုနည်းတဲ့အပြင် သွေးတိုးကျစေနိုင်ပါတယ်။ ဒါ့အပြင် lycopene လို့ ခေါ်တဲ့ ဖရဲသီးမှာ ပါတဲ့ ဓါတ်ပေါင်းတစ်မျိုးဟာ နှလုံးသွေးကြောနံရံ ကျဉ်းမြောင်းတာကို ကာကွယ်ပေးနိုင်တယ်။

၅။ အမြင်အာရုံ မချို့ယွင်းစေဖို့ ကာကွယ်ပေးနိုင်တယ်။

ဒီနေ့ခေတ် ကလေးတွေနဲ့ လူငယ်တွေမှာ တီဗီ၊ ဖုန်း၊ ကွန်ပျူတာ အကြည့်များတဲ့အပြင် ညဘက်တွေမှာ နောက်ကျအိပ်တာကြောင့် အမြင်အာရုံချို့ယွင်းပြီး မျက်စိမှုန်လာတယ်။ ဖရဲသီးကို ပုံမှန်စားပေးရင် မျက်စိမှုန်တာ၊ မျက်စိအမြင်အာရုံ အားနည်းတာကို ကာကွယ်ပေးနိုင်တယ်။ မျက်စိအမြင် ကြည်လင်စေတယ်။ အသက်ကြီးသူတွေမှာ ဖြစ်တတ်တဲ့ အမြင်အာရုံနဲ့ သက်ဆိုင်တဲ့ ရောဂါတွေကိုလည်း ဖြစ်နိုင်ခြေ လျော့ကျစေနိုင်ပါတယ်။

၆။ ကြွက်သား နာကျင်ကိုက်ခဲတာကို ပြေလျော့စေတယ်။

အပြင်ထွက်ပြီး အမြဲသွားလာနေရသူတွေ၊ အားကစား လိုက်စားသူတွေမှာ ကြွက်သားနဲ့ အရိုးအဆစ်တွေ နာကျင်ကိုက်ခဲတတ်တာ သဘာဝပါပဲ။ ဖရဲသီးဟာ ဒီလိုဝေဒနာကို သက်သာစေပြီး နှလုံးခုန်မြန်စေတာကြောင့် ပိုပြီး အမောခံနိုင်လာစေတယ်။ ရေဓါတ်လည်း ပြန်လည်ဖြည့်ပေးနိုင်တာကြောင့် ပူအိုက်တဲ့ ရာသီမှာ ရေဓါတ်ခမ်းခြောက်မှာကိုလည်း ပူစရာမလိုတော့ပါဘူး။

၇။ အရေပြားနဲ့ ဆံသားကို ကျန်းမာလှပစေတယ်။

ဖရဲသီးမှာ ပါဝင်တဲ့ ဗီတာမင် A နဲ့ ဗီတာမင် C ဟာ အသားအရေကို ဖြူစင်ဝင်းပစေပြီး နုပျိုလန်းဆန်းစေတဲ့ အာဟာရဓါတ်တွေ ဖြစ်ပါတယ်။ ဗီတာမင် C က အရေပြားနဲ့ ဦးရေပြားကို သန်စွမ်းစေတယ်။ ဖြူစင်ဝင်းပလာစေတယ်။ ပျက်စီးနေတဲ့ ဆဲလ်တွေကို ပြုပြင်ပေးပြီး ကျန်းမာတဲ့ အသားအရေအတွက် ဗီတာမင် A က ကူညီပေးပါတယ်။

၈။ အစာကြေလွယ်စေတယ်။

ရေဓါတ်နဲ့ အမျှင်ဓါတ် ပါဝင်မှုများလို့ အစာကြေလွယ်စေတယ်။ ဗိုက်ပြည့်သွားစေတာကြောင့် မကြာခဏ အစာစားချင်စိတ်ကို မဖြစ်စေပါဘူး။ ဝမ်းကိုလည်း မှန်စေနိုင်ပါတယ်။ ဒါကြောင့် ရာသီဥတုပူတဲ့ အချိန်မျိုးမှာ ရေဓါတ်များတဲ့ အသီးအနှံတွေ၊ အမျှင်ဓါတ်များတဲ့ ဟင်းသီးဟင်းရွက်တွေကို များများစားသုံးပေးဖို့ အကြံပေးလိုက်ပါတယ်နော်။

Ref : hellosayarwon

ရေးသားသူ Ye Myo Myat
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

Team (ရိုးရာလေး)