ကလေးတွေ ပုံပြင်ဖတ်ရတာအဆင်ပြေစေဖို့အတွက် ဘာသာစကားအမျိုးမျိုးနဲ့ ပုံပြင်တွေကို ဖန်တီးပေးနေတဲ့သူ တစ်ယောက်ရှိပါတယ်။ သူကတော့ နိုင်ဂျီးရီးယားနိုင်ငံက ဒိုမီနစ် အွန်ရီကာချီ (Dominic Onyekachi) ဆိုတဲ့ အသက် (၂၃) နှစ်အရွယ်ကောင်လေးဖြစ်ပါတယ်။ သူဟာ သူ့ရဲ့အသက် (၆) နှစ်အရွယ်တူမလေးအတွက် ပုံပြင်တစ်ပုံဖတ်ပြတုန်းကတော့ အာဖရိကန်ပုံပြင်တွေကို ဘာသာစကားအမျိုးမျိုးနဲ့ ဖန်တီးဖို့ စိတ်ကူးမရှိခဲ့ပါဘူး။ သူ့တူမလေးရဲ့ အသေးစား စာကြည့်တိုက်လေးဆီရောက်သွားတော့မှ သူ့ရဲ့စာအုပ် တော်တော်များများက နိုင်ငံခြားဘာသာစကားတွေဖြစ်ပြီး အာဖရိကန်ကိုယ်စားပြုထားတာ နည်းနည်းပဲပါတယ်ဆိုတာကို တွေ့ရှိသွားခဲ့ပါတယ်။
ဒိုမီနစ်က သူတို့ရဲ့ယဉ်ကျေးမှုကို ထင်ဟပ်နေတဲ့ စာအုပ်တွေကို သူ့တူမလေးကို ဖတ်စေချင်ခဲ့ပါတယ်။ ဒါကြောင့် သူ့တူမလေးအတွက် ပုံပြင်တွေ သူကိုယ်တိုင်ရေးသားဖို့ ဆုံးဖြတ်ခဲ့ပါတယ်။ “ကျွန်တော့်တူမလေးအတွက် ပုံပြင်တချို့တလေရေးပေးခဲ့တယ်။ သရုပ်ဖော်ပုံတွေဆွဲဖို့အတွက် ကျွန်တော် သူငယ်ချင်းတွေရှိခဲ့တယ်။ တူမလေးက ဒါကို ကြိုက်တယ်။ ကျောင်းက သူ့သူငယ်ချင်းတွေကလည်း ကြိုက်နှစ်သက်ခဲ့ကြတယ်။ ဒါကြောင့် စာအုပ်တွေပိုရေးဖို့ တွေးမိခဲ့ပြီး ကလေးတော်တော်များများ ဒီစာအုပ်တွေကို တစ်စုတစ်စည်းတည်း ဝင်ရောက်ဖတ်ရှုနိုင်ဖို့ ဒီဂျစ်တယ်နည်းပညာနဲ့ နေရာတစ်ခုဖန်တီးပေးထားပါတယ်”လို့ ဒိုမီနစ်က ပြောပါတယ်။
သူက လေးဂို့စ်မြို့က Balogun Marketကို သွားတော့ အာဖရိကတိုက်ကို ထင်ဟပ်နေတဲ့ ကလေးတွေရဲ့စာအုပ်တွေ မရနိုင်တာက ပိုကြီးတဲ့ပြဿနာဆိုတာကို နားလည်ခဲ့တယ်လို့ ဒိုမီနစ်က ဆိုပါတယ်။ Market မှာ တွေ့ခဲ့တဲ့ အာဖရိကနဲ့ပတ်သက်တဲ့ စာအုပ်တော်တော်များများက အလယ်တန်းကျောင်းရဲ့ ကလေးတွေအတွက်ဖြစ်တယ်ဆိုတာကို သိခဲ့ရပါတယ်။ “ကျွန်တော် စာအုပ်ဆိုင်မှာ တစ်နေ့လုံးကုန်သွားခဲ့တယ်။ စာအုပ် (၂) အုပ်ပဲထွက်လာခဲ့တယ်။ အွန်လိုင်းပေါ်သွားကြည့်တဲ့အခါမှာလည်း ဒီပြဿနာနဲ့ပတ်သက်ပြီး ငြီးငြူနေကြတာတွေလည်း အရမ်းများပါတယ်”လို့ ဒိုမီနစ်က ဆိုပါတယ်။
မေလမှာ ဒိုမီနစ်က သူ့သူငယ်ချင်းနှစ်ဦး ဖာနန်နဲ့ တိုလူလိုပီတို့ရဲ့အကူအညီနဲ့ ကလေးတွေအတွက် ပုံပြင်စာအုပ်တွေ ဝင်ရောက်ဖတ်ရှုလို့ရအောင် ထောက်ပံ့ပေးထားတဲ့ အွန်လိုင်းဝက်ဆိုက် Akiddie ကို စတင်ဖန်တီးခဲ့ပါတယ်။ Akiddie မှာ ကလေးတွေအတွက် ဘာသာစကားအမျိုးမျိုးနဲ့ အာဖရိကသမိုင်းကြောင်းနဲ့ ဇာတ်ကောင်တွေကို အခြေခံထားတဲ့ ပုံပြင်စာအုပ်တွေ ရှိပါတယ်။ လက်ရှိမှာတော့ စာဖတ်သူတွေအတွက် ဖတ်ရှုလို့ရနိုင်တဲ့ စာအုပ် (၂၁) အုပ်ရှိပါတယ်။ အဲဒီထဲက (၅) အုပ်က အခမဲ့ဖတ်ရှုလို့ရပြီး အခြားစာအုပ်တွေကိုတော့ ဝင်ရောက်ဖတ်ရှုနိုင်ဖို့ စာရင်းသွင်းရပြီး လတိုင်း ဒေါ်လာ (၁.၅၅) ပေးဆောင်ဖို့လိုပါတယ်။ အနောက်အာဖရိကမှာ ပြောကြတဲ့ ယိုရူဘာ ဘာသာစကား၊ ဆာဟာရတောင်ပိုင်းမှာပြောကြတဲ့ ဟော်စာ ဘာသာစကား၊ နိုင်ဂျီးရီးယားနိုင်ငံအရှေ့တောင်ပိုင်းမှာ ပြောကြတဲ့ အစ္ဂဘိုဘာသာစကားတွေအဖြစ် စာအုပ်တွေကို ဘာသာပြန်ဆိုထားပါတယ်။
ပုံပြင်စာအုပ်တွေတော်တော်များများရဲ့ ဆိုလိုရင်းက ကျားမတန်းတူညီမျှမှု၊ ဆန်းသစ်တီထွင်မှုနဲ့ ဘဏ္ဍာရေးကျွမ်းကျင်တတ်မြောက်မှုတွေ အကြောင်းဖြစ်ပါတယ်။ Akiddie က စာအုပ်တွေက မူလတန်းနဲ့ အလယ်တန်းတွေအတွက်ဆိုပြီး ပုံစံနှစ်မျိုးနဲ့လာပါတယ်။ မူလတန်းကလေးတွေအတွက် စာအုပ်တွေက ဖတ်ရလွယ်ကူအောင်လုပ်ထားပြီး အလယ်တန်းကလေးတွေအတွက်တော့ စာအုပ်လုံးပိုများပါတယ်လို့ ဒိုမီနစ်က ဆိုပါတယ်။
အခုဆိုရင် Akiddie မှာ အသုံးပြုသူ (၁၂၀၀) ကျော်ရှိနေပြီး လေးဂို့စ်မြို့က စာသင်ကျောင်း (၆) ကျောင်းမှာလည်း အသုံးပြုနေကြပါတယ်။ ဒိုမီနစ်ရဲ့အစီအစဉ်က အာဖရိကနိုင်ငံရဲ့ အခြားနေရာတွေက ကလေးတွေဆီ ပုံပြင်တွေ မျှဝေဖို့နဲ့ ဆက်လက်ဖန်တီးဖို့ပါပဲ။
Ref: CNN “This 23-year-old Nigerian is creating a digital collection of African stories for children in different languages”
WL (ရိုးရာလေး)
