ကျွန်းပေါ်မှာထိန်းသိမ်းခံထားရတဲ့ဒုက္ခသည်က ဆုကြေးအများဆုံးရတဲ့ စာပေဆု ၂ ဆု ဆွတ်ခူး

ပါပူဝါနယူးဂီနီနိုင်ငံက ထိန်းသိမ်းရေးစခန်းမှာ ထိန်းသိမ်းခံထားရတဲ့ ဒုက္ခသည်တစ်ဦးဟာ ဩစတြေးလျနိုင်ငံမှာ ဆုကြေးအများဆုံးချီးမြှင့်တဲ့ စာပေဆု ၂ ဆု ဆွတ်ခူးခဲ့လို့ ဩစတြေးလျ ဒေါ်လာ ၁၂၅၀၀၀(အမေရိကန်ဒေါ်လာ ၉၀၀၀၀ ဝန်းကျင်)ရရှိခဲ့ပါတယ်။

ဗစ်တိုးရီးယားပြည်နယ်စာပေဆု(Victorian Prize for Literature)နဲ့ စိတ်ကူးယဉ်စာ​​ပေမဟုတ်တဲ့ စာ​​ပေဆု (Non-Fiction Prize) ဆွတ်ခူးခဲ့တဲ့ ဘာရော့ဇ်ဘူချာနီ(Behrouz Boochani)ဟာ ပြီးခဲ့တဲ့ ကြာသပတေးနေ့က ကျင်းပခဲ့တဲ့ ဗစ်တိုးရီးယားပြည်နယ်ဝန်ကြီးချုပ်ရဲ့စာပေဆုပေးပွဲ(Victorian Premier’s Literary Awards)အခမ်းအနားကို တက်ရောက်နိုင်ခဲ့ခြင်းမရှိပါဘူး။

ကာ့ဒ်နွယ်ဖွား အီရန်နိုင်ငံသား ဂျာနယ်လစ် ဘူချာနီဟာ တရားဝင်ပြည်ဝင်ခွင့်မပါဘဲ ဩစတြေးလျနိုင်ငံကို ဝင်ရောက်ဖို့ ကြိုးစားခဲ့တဲ့အတွက် ၂၀၁၃ ခုနှစ်ကတည်းက မန်နော့စ်(Manus)ကျွန်းမှာ ထိန်းသိမ်းခံထားရသူပါ။ ၂၀၁၇ ခုနှစ်မှာ ဩစတြေးလျနိုင်ငံက ဒေသဆိုင်ရာ စီမံခန့်ခွဲရေးစင်တာကို ပိတ်ပစ်ခဲ့ပေမဲ့ ဘူချာနီအပါအဝင် ဒုက္ခသည် ၆၀၀ ကတော့ ကျွန်းပေါ်က ထိန်းသိမ်းရေးစခန်းတွေမှာ ဆက်ရှိနေခဲ့ပါတယ်။

ဘူချာနီဟာ ထိန်းသိမ်းခံထားရတဲ့ကာလအတွင်း သူ့ဆဲလ်ဖုန်းကို အသုံးပြုပြီး No Friend But the Mountains: Writing from Manus Prison လို့ ခေါင်းစဉ်တပ်ထားတဲ့ စာအုပ်ကို ရေးသားခဲ့ပါတယ်။ အဲဒီစာအုပ်ကို ထုတ်ဝေခဲ့တဲ့ Picador Australia စာအုပ်တိုက်ဟာ ဘူချာနီပို့တဲ့ မက်ဆေ့တွေကိုစုပြီး စာအုပ်ထုတ်ခဲ့တာပါ။ ဒီစာအုပ်ဟာ “အသက်ရှင်လွတ်မြောက်ရေး လှုပ်ရှားမှုရဲ့ မျက်မြင်သက်သေ၊ ကိုယ်တွေ့နဲ့ရင်းထားရတဲ့ စာသား၊ တွန်းလှန်မှုရဲ့ ငိုကြွေးသံ၊ တစ်နယ်တစ်ကျေးမှာ အကျဉ်းကျနေတဲ့ ၅ နှစ်ကာလအတွက် ပြောင်မြောင်တဲ့ သရုပ်ဖော်ပုံတူ”လို့ မှတ်ချက်ပေးခဲ့ပါတယ်။

”ဘူချာနီက အံ့အားသင့်စရာအနုပညာနဲ့ အသုံးအနှုန်းပါးနပ်တဲ့ ဝေဖန်ရေးသီအိုရီကို ပေါင်းစပ်ဖန်တီးနိုင်ခဲ့ပါတယ်။ ဒီစာအုပ်ရဲ့နှလုံးသည်းပွတ်ကတော့ နှိုက်နှိုက်ချွတ်ချွတ်ဝေဖန်လေ့လာမှုနဲ့ မန်နော့စ်အကျဉ်းထောင်သီအိုရီဆိုတဲ့ အသုံးအနှုန်းပါပဲ။ သူဟာ ဩစတြေးလျနိုင်ငံရဲ့လုပ်ရပ်တွေနဲ့ ဩစတြေးလျနိုင်ငံအကြောင်း ပုံစံသစ်​တစ်​မျိုးနဲ့
နားလည်​လာ​အောင်​ ​ပေးစွမ်းနိုင်ခဲ့ပါတယ်။ နှိုက်နှိုက်ချွတ်ချွတ် ဝေဖန်ဆန်းစစ်မှုကနေ စိတ်ကူးယဉ်ဆန်ဆန်​ ​ယူဆချက်​​နဲ့ ကဗျာတွေမှာ ထင်ရှားတဲ့ နောက်ခံအသံတွေ ထည့်သွင်းထားပါတယ်။ အရေးအသားက လှပညက်ညောပြီး ကမ္ဘာတစ်ဝန်းက စာပေယဉ်ကျေးမှုတွေကို ရောစပ်သုံးနှုန်းထားပါတယ်။ ဒါပေမဲ့ ကာ့ဒ်လူမျိုးတွေရဲ့ ရေးဟန်ကို အဓိကသုံးနှုန်းခဲ့ပါတယ်”လို့ စာပေအကဲဖြတ်ဒိုင်တွေက မှတ်ချက်ပေးခဲ့ပါတယ်။

ဩစတြေးလျအစိုးရကတော့ ပင်လယ်ကူးလာမယ့် ရွှေ့ပြောင်းနေထိုင်သူတွေကို လူကုန်​ကူးသူတွေလက်ထဲမှာ အ​သေမခံရ​အောင်​ တားဆီးဖို့အတွက်​ သူတို့ရဲ့ တင်းကျပ်တဲ့နယ်စပ်ကာကွယ်ရေးမူဝါဒကို ဆက်လက်ကျင့်သုံးဖို့ လိုအပ်တယ်လို့ ​ပြော​​နေဆဲပါပဲ။

Ref: CNN
Nz (ရိုးရာ​လေး)