ကုသနည်းမတွေ့ရင် ခန္ဓာကိုယ်တစ်ခုလုံး ကျောက်တုံးလို ဖြစ်သွားတော့မယ့် ကောင်လေး

တချို့ကလေးတွေက အရမ်းသနားဖို့ကောင်းလောက်အောင် ရောဂါထူးထူးဆန်းဆန်းတွေ ခံစားနေကြရပါတယ်။ သူတို့တွေရဲ့အနာဂတ်အတွက်ရော ကိုယ့်ခြေထောက်ပေါ် ကိုယ်ရပ်တည်နိုင်ဖို့အတွက်ပါ ဘာမှမလုပ်ရခင်မှာပဲ အဲဒီရောဂါကြီးကြောင့် သေဆုံးရတော့မှာဖြစ်ပါတယ်။ ဂျိုင်ဒန် ရိုဂျာစ် (Jaiden Rogers) ဆိုတဲ့ အသက် (၁၅) နှစ်အရွယ် ဆယ်ကျော်သက်ကောင်လေးဆိုရင်လည်း အသားရေကို မာကျောလာစေတဲ့ Stiff Skin Syndrome ရောဂါကို ခံစားနေရတဲ့အတွက် သူ့အသားရေက တဖြည်းဖြည်းချင်း ကျောက်တုံးလို မာကျောလာနေပါတယ်။ ကုသနည်းမတွေ့ခဲ့ဘူးဆိုရင် သူ့ခန္ဓာကိုယ်တစ်ခုလုံး ကျောက်တုံးလိုဖြစ်သွားတော့မှာဖြစ်ပါတယ်။

ဂျိုင်ဒန် ရိုဂျာစ် (Jaiden Rogers) ကို ကမ္ဘာပေါ်မှာ Stiff Skin Syndrome ရောဂါကို ခံစားနေရတဲ့ တစ်ယောက်တည်းသောပုဂ္ဂိုလ်လို့ ပြောလို့ရပါတယ်။ ဒီရောဂါက သူ့ကို ဝှီးချဲပေါ်မှာပဲ နေစေခဲ့ပြီး သူ့ရဲ့ကျောက်တုံးလိုအသားရေက သူ့အဆုတ်နဲ့နှလုံးကို ဖိမိနေတဲ့အတွက် အင်္ဂါအစိတ်အပိုင်းတွေ ရပ်တန့်တာတွေ ဖြစ်လာနိုင်ချေများနေပါတယ်။ သူ့ရဲ့မိခင် နာတာလီက သူ့သားရဲ့ပေါင်မှာ အသားရေ မာကျောဖုထစ်တွေ ရှိနေတာကို မြင်တွေ့ခဲ့တဲ့အချိန် ၂၀၁၃ခုနှစ်မှာ ရိုဂျာစ် ဒီရောဂါခံစားနေတာကို သိခဲ့ရတာပါ။ နောက်ပိုင်း သူ့ခြေထောက်၊ အစာအိမ်၊ လက်မောင်း၊ လည်ပင်းတွေထိ လျင်လျင်မြန်မြန် ပျံ့နှံ့သွားခဲ့ပါတော့တယ်။

“ဂျိုင်ဒန်ရဲ့အသားရေက ကျောက်တုံးလိုပြောင်းလဲနေပြီး သူ့ခြေထောက်တွေ လှုပ်လို့မရနိုင်အောင် အရမ်းမာကျောလာခဲ့တာပါ။ သူ ကုသလို့မရတော့ရင်၊ ကုသနည်းမရှိရင် သူ့ခန္ဓာကိုယ်တစ်ခုလုံး ကျောက်တုံးလိုဖြစ်သွားလိမ့်မယ်လို့ ဆရာဝန်တွေက ပြောတယ်။ အသားရေက သူ့နှလုံးကို ဖိသလိုဖြစ်လာခဲ့တဲ့အတွက် အသက်ရှုစက်မရှိဘဲ အသက်ရှုလို့မရနိုင်ပါဘူး။ အခြားအင်္ဂါအစိတ်အပိုင်းတွေ မှာလည်း ဖိမိနေတဲ့အတွက် အင်္ဂါအစိတ်အပိုင်းတွေ အလုပ်မလုပ်တာတွေဖြစ်လာပါတယ်။ သူ့ရဲ့အနာဂတ်က မကောင်းတော့ပါဘူး”လို့ နာတာလီက ဆိုပါတယ်။

အခုဆိုရင် နာတာလီနဲ့ သူ့ခင်ပွန်း တင်မ်တို့က သူ့ရင်ဘတ်ထိ ရောဂါမရောက်ခင် ရောဂါပျံ့နှံ့မှုကို နှေးကွေးအောင် ကုသဖို့အတွက် ရိုဂျာစ်ကို အီတလီခေါ်သွားဖို့ ရန်ပုံငွေရှာနေပါတယ်။ “ကျွန်မတို့ သားကို အီတလီခေါ်မသွားရင် သူ အသက်ရှင်မှာမဟုတ်ပါဘူး။ ရောဂါပျံ့နှံ့မှုကို ထိန်းဖို့ သူ ကုသမှုခံယူတဲ့အခါ အသားရေမာကျောတာကနေ ပြေလျော့စေဖို့ ကူညီပေးမယ့် ကုထုံးကို ခံယူသွားရမှာဖြစ်ပါတယ်။ သူက ဒီရောဂါအခြေအနေကို ခံစားရတာ ကမ္ဘာပေါ်မှာ သားတစ်ယောက်တည်းရှိတယ်လို့ ဆရာဝန်တွေက ထင်ခဲ့တာပါ။ သားရဲ့ပေါင်မှာ မာကျောတဲ့အဖုအထစ်တွေကို ကျွန်မတို့ တွေ့တဲ့အခါမှာ ဒီရောဂါရှိတယ်ဆိုတာ သိခဲ့ရတာပါ။ ဘယ်သူမှ ဒီရောဂါဖြစ်မယ်လို့ မထင်ခဲ့မိဘူး။ သားကို ဆရာဝန်ဆီ ခေါ်သွားခဲ့ပြီး ဆေးစစ်ဆေးခဲ့ပါတယ်။

ဆေးစစ်ချက်ထွက်လာတဲ့အချိန်မှာ ဆရာဝန်က ကျွန်မကို ခေါ်ပြောပါတယ်။ ဒါက ဆရာဝန်ဆီက ကျွန်မကြားချင်ခဲ့တဲ့အရာ မဟုတ်ပါဘူး။ အရင်တုန်းက ဒီအခြေအနေကို တစ်ခါမှမကြားခဲ့ဖူးပါဘူး။ ဘာတွေလုပ်ရမယ်ဆိုတာကို ဆရာဝန်တွေ ဆက်ပြောနေတဲ့အထိ ကျွန်မ ဘာမှမတွေးနိုင်ခဲ့တော့ဘူး။ (၃) လအတွင်းမှာပဲ သားရဲ့ခြေထောက်မှာ ရောဂါပျံ့နှံ့သွားခဲ့ပြီး ဝှီးချဲကို အားကိုးခဲ့ရပါတယ်။ ဒါက ကြောက်ဖို့ကောင်းပြီး သားလေး အရမ်းနာကျင်ခဲ့ရတယ်”လို့ နာတာလီက ပြောပါတယ်။

ဂျိုင်ဒန် ရိုဂျာစ်က ဒီရောဂါကို မခံစားရခင်က ဘောလုံးကို ရူးသွပ်ခဲ့သူတစ်ယောက်ပါ။ အခုတော့ သူဟာ ရောဂါပျံ့နှံ့မှုနှေးသွားအောင် ကူညီပေးမယ့် ဓာတုကုထုံးကို ခံယူရတော့ပေမယ့် သူ့ဘဝနောက်ဆုံးထွက်သက်အထိ ဝှီးချဲနဲ့ အချိန်ကုန်သွားရတော့မှာပါ။ သူက ကျောင်းကနေထွက်ခဲ့ပြီး သူ့မိဘတွေက အိမ်မှာပဲ သူ့ကို စာသင်ပေးပါတယ်။ “သားက ရောဂါအကြောင်းပြောရင် အရမ်းတိတ်ဆိတ်နေတာ။ အဲဒီအကြောင်းပြောတာကို မကြိုက်ဘူး။

ဒါပေမဲ့ အဲဒါက နာကျင်တဲ့အတွက် သားလေး ငိုတယ်။ သားက အခြားကလေးတွေလိုပဲ အရမ်းသွက်လက်တာ။ ဒါပေမဲ့ အခုတော့ အကိုက်အခဲပျောက်ဆေးကြောင့် တစ်နေ့ကုန် အိပ်နေတော့တာ။ အမြဲတမ်း ဝှီးချဲနဲ့နေရမှာ။ ကျွန်မတို့ ဒါကိုပြောင်းလဲပစ်လို့မရဘူး။ ဒါပေမဲ့ သူ့ကို အီတလီကို ခေါ်သွားဖို့လိုတယ်။ ဒါမှ ကျွန်မတို့ သူ့အသက်ဆက်ရှည်နိုင်ဖို့ အချိန်ဆွဲထားလို့ရနိုင်မှာ”လို့ ရိုဂျာစ်ရဲ့အမေ နာတာလီက ပြောခဲ့ပါတယ်။

Ref: Ladbible “Boy ‘Turning To Stone’ Will Be Entombed Unless Cure Is Found”

WL (ရိုးရာလေး)