မကြာခင် အာမှုတ်လေနဲ့တိုင်းတာတဲ့ ပထမဆုံး ကိုဗစ်စစ်ဆေးမှုက အမေရိကန်ကို ရောက်ရှိလာတော့မှာပါ။ ဧပြီလ ၁၄ ရက်နေ့က အမေရိကန်အစားအသောက်နဲ့ဆေးဝါးကွပ်ကဲရေးဌာနက ကိုဗစ်ရောဂါအတွက် အာမှုတ်လေအပေါ်အခြေခံစမ်းသပ်တဲ့ ပထမဆုံးကိုဗစ်စစ်ဆေးမှုကို ခွင့်ပြုလိုက်ခြင်းဖြင့် ခြေလှမ်းအသစ် စတင်ခဲ့ပါတယ်။ အဲဒီစစ်ဆေးမှုက COVID-19 ရောဂါရှာဖွေမှုတစ်ခုအဖြစ် လုပ်ဆောင်ဖို့ ဒီဇိုင်းထုတ်ထားခြင်းမဟုတ်ပေမဲ့ သုံးမိနစ်အတွင်း ကူးစက်ခံရနိုင်သူတွေကို သတိပေးတဲ့စမ်းသပ်ကိရိယာတစ်ခုအနေနဲ့ဖြစ်ပါတယ်။ InspectIR စနစ်မှာ positive ပြတဲ့ ဘယ်သူမဆို PCR စစ်ဆေးမှုနဲ့ ရလဒ်အတည်ပြုဖို့ လိုအပ်ပါလိမ့်မယ်။
Frisco, Tex. မှာ အခြေစိုက်တဲ့ InspectIR Systems ကတီထွင်လိုက်တဲ့ စမ်းဆေးမှုက အသက်ရှုလိုက်လို့ ထွက်လာတဲ့ လေတွေကို ခွဲခြမ်းစိတ်ဖြာပြီး SARs-CoV-2 ကူးစက်မှုရဲ့တိကျတဲ့ဓာတုဗေဒလက္ခဏာကို ဖမ်းယူပါတယ်။ ရောဂါပိုးကူးစက်ခံရတဲ့အခါ ကျွန်တော်တို့ရဲ့ဆဲလ်တွေက သွေးလမ်းကြောင်းအတွင်း ဖမ်းယူထားကာ အဆုတ်ဆီရွှေ့ပြောင်းလိုက်တဲ့ လေတွေကိုဖြစ်ပေါ်စေတဲ့ ဇီဝဗေဒဆိုင်ရာ တုံ့ပြန်မှုကို ထုတ်ပေးပါတယ်။
University of North Texas က ဓာတုဗေဒ ပါမောက္ခ Guido Verbeck နဲ့ ပူးပေါင်းလုပ်ဆောင်တဲ့ InspectIR ရဲ့သိပ္ပံပညာအဖွဲ့က COVID-19 ကူးစက်ခံထားရသူတွေနဲ့ မကူးစက်ခံရသူတွေဆီက အသက်ရှူနမူနာတွေရဲ့ဓာတုပရိုဖိုင်တွေကို နှိုင်းယှဥ်ပြီး SAR-CoV-2ကို ဖော်ထုတ်ခဲ့ပါတယ်။ စစ်ဆေးမှုအတွက် အခြေခံအနေနဲ့ ကွဲပြားမှု ၄၁ ခုကို တွေ့ရှိခဲ့ပါတယ်။
အဲဒီနည်းပညာက မိုဘိုင်းဓာတုဗေဒဓာတ်ခွဲခန်းတစ်ခုအဖြစ် လုပ်ဆောင်တဲ့ သယ်ဆောင်သွားလို့ရတဲ့ ခရီးဆောင်အိတ်တစ်လုံး အရွယ်အစား စက်ပစ္စည်းအစိတ်အပိုင်းတစ်ခုအပေါ် မူတည်ပြီး သုံးမိနစ်ခန့်အတွင်း အလိုအလျောက် ခွဲခြမ်းစိတ်ဖြာမှုကို လုပ်ဆောင်နိုင်ပါတယ်။ FDA က လူပေါင်း ၂၄၀၀ ကျော်ပါဝင်တဲ့ လေ့လာမှုတစ်ခုအပေါ် အခြေခံပြီး ခွင့်ပြုခဲ့တာပါ။ InspectIR စမ်းဆေးမှုက Positive နမူနာရဲ့ ၉၁.၂ ရာခိုင်နှုန်းနဲ့ Negative စစ်ဆေးချက် ၉၉.၃ ရာခိုင်နှုန်းကို မှန်ကန်စွာ ဖော်ထုတ်ခဲ့ပါတယ်။ ဒီရလဒ်တွေက အိုမီခရွန်မျိုးကွဲကူးစက်ခံထားရသူတွေကြားမှာတောင် ထွက်ရှိခဲ့တာပါ။
PCR စမ်းဆေးမှုတွေထက် လူတွေကို အမြန်စစ်ဆေးပေးဖို့ ဆရာဝန်တွေ၊ ဆေးရုံတွေနဲ့ မိုဘိုင်းစမ်းသပ်တဲ့ဆိုဒ်တွေက ဒီနည်းပညာကို အသုံးပြုလိမ့်မယ်လို့ InspectIRရဲ့တွဲဖက်တည်ထောင်သူနဲ့ စီအီးအို တင်မ် ဝင်ချ် (Tim Wing) က မျှော်လင့်ထားပါတယ်။ ပြွန်ထဲကို အသက်ရှုသွင်းလိုက်တာနဲ့ ရောဂါစစ်ဆေးလို့ရတဲ့ စမ်းသပ်ချက်က ကျန်းမာရေးစောင့်ရှောက်ပေးသူတွေအတွက် ပိုပြီး လွယ်ကူမယ်လို့လည်း သူက မျှော်မှန်းထားပါတယ်။
ဒီစစ်ဆေးမှုကို ကျန်းမာရေးစောင့်ရှောက်မှုကျွမ်းကျင်ပညာရှင်တွေက ကြီးကြပ်ဖို့ လိုအပ်တာကြောင့် ဆေးခန်း (သို့) မိုဘိုင်းစမ်းသပ်တဲ့နေရာတွေမှာ လုပ်ဆောင်ရမှာပါ။ ကိရိယာက ဓာတုဗေဒဆိုင်ရာခွဲခြမ်းစိတ်ဖြာမှုကို လုပ်ဆောင်ပြီး အဲဒီနောက် ရလဒ်တွေကို ကျန်းမာရေးစောင့်ရှောက်သူတွေဆီ ပြန်လည်တင်ပြတဲ့ InspectIR က ဒေတာတွေကို ခွဲခြမ်းစိတ်ဖြာပါတယ်။ FDA ကလည်း Positive ရလဒ်တွေကို ပြည်နယ်ကျန်းမာရေးဌာနတွေကို အစီရင်ခံတင်ပြဖို့ လိုအပ်ပါတယ်။
အခုဆို ကျန်းမာရေးစောင့်ရှောက်မှုပညာရှင်တစ်ဦးက စမ်းသပ်မှုကို ကြီးကြပ်ထားတာကြောင့် ကိရိယာကို အလုပ်ခွင်နဲ့ ဆေးခန်းတွေလို အစုလိုက်အပြုံလိုက်နဲ့ အမြန်စမ်းသပ်မှုလိုအပ်တဲ့ နေရာတွေမှာ ထားရှိနိုင်ဖွယ်ရှိပါတယ်။ အပျော်စီးသင်္ဘောလုပ်ငန်းရှင်တွေနဲ့ ဟိုတယ်တွေ အပါအဝင် ခရီးသွား လုပ်ငန်းအဖွဲ့တွေဆီက စိတ်ဝင်စားတဲ့ တောင်းဆိုမှုတွေကို လက်ခံရရှိထားတယ်လို့ တင်မ် ဝင်ချ်က ပြောပါတယ်။
ဒါပေမဲ့ COVID-19 အတွက် အာမှုတ်လေနဲ့တိုင်းတာတဲ့ လက်ကိုင်စမ်းသပ်ကိရိယာကတော့ အလုပ်နေရာ၊ ကျောင်းနဲ့ အားကစား သို့မဟုတ် ဖျော်ဖြေရေးနေရာတွေမှာ ပိုမိုကျယ်ပြန့်စွာ အသုံးပြုနိုင်ပါတယ်။ ဒါကြောင့် အခြားသုတေသီတွေက ယာဉ်မောင်းတွေကြား အရက်သေစာသောက်စားမှုကို စစ်ဆေးဖို့ ဥပဒေအရာရှိများ သယ်ဆောင်တဲ့ လက်ကိုင်ကိရိယာနဲ့ ဆင်တူတဲ့ ကိရိယာကို လုပ်ဆောင်နေကြပါတယ်။ တက္ကဆက်တက္ကသိုလ်က ဇီဝအင်ဂျင်နီယာ ရှာလီနီ ပရာဆက် (Shalini Prasad) က စက္ကန့် ၃၀ အတွင်း ရလဒ်တွေကို ပံ့ပိုးပေးတဲ့ အက်ပ်တစ်ခုနဲ့ ချိတ်ဆက်နိုင်တဲ့ တစ်ခုကို တီထွင်ခဲ့ပါတယ်။ နည်းပညာကို လိုင်စင်ရ တက္ကဆက်အခြေစိုက် Sotech Health က လက်ရှိမှာ ကိရိယာအတွက် ခွင့်ပြုချက်ရရှိဖို့ FDA နဲ့အတူ လုပ်ဆောင်နေပါတယ်။
InspectIR ရဲ့ ပူးတွဲတည်ထောင်သူနဲ့ ဥက္ကဋ္ဌ ဂျွန် ရက်တ်မွန် (John Redmond)က “သေးငယ်တဲ့ ကိရိယာက SARS-CoV-2 လက္ခဏာတွေကို ရှာဖွေရာမှာ အာရုံခံနိုင်စွမ်းနဲ့ သီးခြားလက္ခဏာတွေ ဆုံးရှုံးသွာတယ်လို့ သူ့ရဲ့ကုမ္ပဏီရဲ့ကိရိယာနဲ့ နှိုင်းယှဉ်ပြောကြားခဲ့ပါတယ်။ FDA က ဒါ အမှန်ဟုတ်မဟုတ် ဆုံးဖြတ်မှာဖြစ်ပေမဲ့ အခုအချိန်မှာတော့ InspectIR က COVID-19 အတွက် အသက်ရှုလေကို ခွဲခြမ်းစိတ်ဖြာနိုင်တဲ့ တစ်ခုတည်းသော စမ်းသပ်မှုဖြစ်ပါတယ်။ ကုမ္ပဏီက လာမည့်လတွေအတွင်း ဖောက်သည်တွေကို ငှားရမ်းနိုင်ဖို့၊ တစ်နာရီကို စမ်းဆေးမှု ၂၀ လောက် ခွဲခြမ်းစိတ်ဖြာနိုင်ဖို့အတွက် တစ်ပတ်ကို ကိရိယာ ၁၀၀ လောက်ထုတ်လုပ်ဖို့ မျှော်လင့်ထားပါတယ်။ ရောဂါစစ်ဆေးမှုတစ်ခုစီက လျင်မြန်တဲ့ antigen စမ်းသပ်မှုတွေနဲ့ ကုန်ကျစရိတ်အတူတူပါပဲ။
Ref: Time “FDA Authorizes First COVID-19 Breath Test”
WL (ရိုးရာလေး)
