အစ္စလာမ်ဘာသာဝင်တွေကို ငရဲကျစေနိုင်တဲ့ K-pop ဂီတကို ရှောင်ကြဉ်ကြဖို့ တရားဟောဆရာ တိုက်တွန်း

တောင်ကိုရီးယားနိုင်ငံရဲ့ K-pop ဂီတက လိင်တူစိတ်ဝင်စားမှုနဲ့ ပွင့်လင်းတဲ့ လိင်မှုကိစ္စကို အသားပေးနေလို့ အစ္စလာမ်ဘာသာဝင်တွေအနေနဲ့ K-pop ဂီတကို ရှောင်ကြဉ်ကြဖို့ အစ္စလာမ် တရားဟောဆရာတစ်ယောက်က တိုက်တွန်းခဲ့ပါတယ်။

အစ္စလာမ်တရားဟောဆရာ ဖူအက်နာရင်ဟာ အင်စတာဂရမ်ပေါ်မှာ ထောက်ခံအားပေးသူ ၅၆၀၀၀ နီးပါးရှိသူပါ။ လိင်တူစိတ်ဝင်စားမှုနဲ့ ပွင့်လင်းတဲ့ ဘဝနေထိုင်မှုပုံစံတွေကို ချပြနေတဲ့ K-pop ဂီတက အစ္စလာမ်ဘာသာဝင်တွေကို ငရဲကျအောင် လုပ်နေတယ်လို့ ဖူအက်နာရင်က ဆိုပါတယ်။ ပြီးခဲ့တဲ့ အင်္ဂါနေ့က ဂျာကာတာမြို့တောင်ပိုင်းက ဗလီမှာ ဖူအက်နာရင်က အခုလို ပြောခဲ့တာပါ။ ဖူအက်နာရင်ဟာ အရင်တုန်းကလည်း ”ကိုရီးယားလှိုင်းတံပိုး”တွေရဲ့ ရိုက်ခတ်မှု ခံနေရပြီလို့ ပြောခဲ့ဖူးသူပါ။

အခုချိန်မှာတော့ ဖူအက်နာရင်က K-pop ဂီတကို ဆန့်ကျင်ရေးလှုပ်ရှားမှုလုပ်နေပြီး သူ့ရဲ့ အတွေးအမြင်၊ အယူအဆ ပျံ့နှံ့သွားစေဖို့အတွက် အင်ဒိုနီးရှားနိုင်ငံက မြို့ (၃၀) ကို သွားရောက်ပြီး ဟောပြောမှုတွေ လုပ်ခဲ့ပါတယ်။ ပြီးခဲ့တဲ့နှစ်ကလည်း စကတ်အတိုတွေ ဝတ်ဆင်ထားတဲ့ Blackpink အဖွဲ့ရဲ့ ရုပ်သံကြော်ငြာတစ်ခုကို အင်ဒိုနီးရှားနိုင်ငံ အမျိုးသားရုပ်သံကော်မရှင်က မသင့်တော်ဘူးလို့ ယူဆတဲ့အတွက် ထုတ်လွှင့်ဖို့ ပိတ်ပင်ခဲ့ဖူးပါတယ်။

Nz (ရိုးရာလေး)