ဖိလစ်ပိုင်စျေးဝယ်စင်တာကို စီးနင်းသူ လက်နက်ချ အညံ့ခံ၊ ဓားစာခံအားလုံး ဘေးမသီရန်မခ ပြန်လွတ်မြောက်လာ

yyl-001.jpg

ဖိလစ်ပိုင်နိုင်ငံ မနီလာမြို့က V-Mall စျေးဝယ်စင်တာမှာ ၁၀ နာရီကြာ ဖမ်းဆီးခံခဲ့ရတဲ့ ဓားစာခံတွေ ပြန်လွတ်မြောက်လာပြီး သေနတ်သမားကလည်း လက်နက်ချ အည့ံခံလိုက်ပါပြီ။ သေနတ်သမားဟာ အသက် ၃၂ နှစ်အရွယ်ရှိပြီး အာချီပါရေးလို့ အမည်ရပါတယ်။ သူဟာ Safeguard Armor Security Corporation(SASCOR) ရဲ့ လုံခြုံရေးဝန်ထမ်းဟောင်းတစ်ယောက်ဖြစ်ပါတယ်။ ပြီးခဲ့တဲ့နှစ် ဒီဇင်ဘာလမှာ SASCOR က သူ့ကို စာချုပ်ဖျက်သိမ်းဖို့ ဆွေးနွေးခဲ့ချိန်ကတည်းက ဓားစာခံတွေ ဖမ်းဆီးပြီး လက်တုံ့ပြန်ဖို့ စီစဉ်ခဲ့တာလို့ အာချီပါရေးက ပြောပါတယ်။ သူ့ကို စာချုပ်ဖျက်သိမ်းပြီး အလုပ်က ထုတ်ပယ်ခဲ့တဲ့ဖြစ်ရပ်မှာ အကျင့်ပျက်ခြစားမှုတွေရှိခဲ့တယ်လို့ အာချီပါရေးက စွပ်စွဲခဲ့ပါတယ်။ ဒါပေမဲ့ သူ့ကို အလုပ်ထုတ်ခဲ့တာမဟုတ်ဘဲ တခြားရာထူးတစ်ခုကို ပြောင်းလဲနေရာချခဲ့တာလို့ SASCOR ဘက်က ပြန်တုံ့ပြန်ခဲ့ပါတယ်။

အာချီပါရေးဟာ ဒီနေ့(မတ်လ ၂ ရက်)နံနက် ၁၀ နာရီဝန်းကျင်က ဆန်ဟွမ်မြို့ Greenhills Shopping Complex ထဲမှာရှိတဲ့ V-Mall ကို ဝင်ရောက်ပစ်ခတ်ခဲ့လို့ လုံခြုံရေးအစောင့်အကြပ်တစ်ယောက် ဒဏ်ရာရခဲ့ပြီး V-Mall ဝန်ထမ်း ၃၀ နီးပါးကို ဓားစာခံအဖြစ် ဖမ်းဆီးခဲ့တာပါ။ ဖမ်းဆီးခံထားရတဲ့ ဓားစာခံတွေ ပြန်လွတ်လာစေဖို့အတွက် အာချီပါရေးရဲ့ အထက်အရာရှိ ၆ ယောက်ဟာ သူ့ကို ပြန်တောင်းပန်ခဲ့ရပြီး ရာထူးကနေ နုတ်ထွက်သွားခဲ့ကြပါတယ်။ SASCOR ရဲ့ အထွေထွေမန်နေဂျာ အော်စကာဟာနန်ဒက်ဇ်၊ ကုမ္ပဏီရဲ့ လက်ထောက်ဒါရိုက်တာ ဂရာဗာဒါ၊ SASCOR ရဲ့ လုပ်ငန်းလည်ပတ်ရေးဒါရိုက်တာ လူးဝစ်ဂျူနီယာ၊ Greenhills ရဲ့ လုံခြုံရေးညှိနှိုင်းဆောင်ရွက်ရေးမှူး ကာပါဒိုစီယာတို့လည်း အာချီပါရေးကို တောင်းပန်ခဲ့ပြီး ရာထူးကနေ နုတ်ထွက်သွားခဲ့ကြပါတယ်။ ဒေသစံတော်ချိန် ည ၈ နာရီအချိန်မှာတော့ အာချီပါရေးက ဓားစာခံတွေနဲ့အတူ လက်နက်မပါဘဲ V-Mall ထဲကနေ ပြန်ထွက်လာခဲ့တာပါ။ အာချီပါရေးက သေနတ်နဲ့ ဗုံးကို V-Mall ထဲမှာ ချန်ထားပြီး လက်နက်ချ အည့ံခံမယ်ဆိုရင် သူ့ကို ကာကွယ်ပေးမယ်လို့ အာချီပါရေး လက်နက်မချခင်မှာ ဆန်ဟွမ်မြို့တော်ဝန် ဇာမိုရာက ကတိပေးခဲ့ပါတယ်။

Nz (ရိုးရာလေး)

Share this post

ရိုးရာလေးတွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင်မှ ပြန်လည်ကူးယူဖော်ပြခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဤနေရာတွင်ဖတ်ရှုနိုင်ပါသည်။

Leave a Reply

scroll to top