အခုလို မိုးရာသီမှာ ပင်လယ်စာတွေ လှိုင်လှိုင်ပေါ်နေပြီနော်။ အထူးသဖြင့် ပင်လယ်ကမ်းနီး ဒေသတွေမှာဆို ပင်လယ်စာ ရှယ်စားရပါတယ်။ ဒါကြောင့် ရိုးရာလေးပရိသတ်တွေကို ပင်လယ်စာရနံ့လေးမွှေးပြီး ရှူးရှဲအရသာနဲ့ ထိုင်းစတိုင် ပဲကြာဇံသုပ်နည်းလေး ပြောပြချင်ပါတယ်။
ဒီနေ့ချက်မယ့် မီနူးထဲမှာ ထည့်သွင်းစဉ်းစားလိုက်တော့နော် အိမ်ရှင်မတို့ရေ…
ပါဝင်ပစ္စည်းတွေက ပဲကြာဇံ ၁၅ ကျပ်သား၊ ကင်းမွန် ၂၀ ကျပ်သားပုစွန် ၂၀ ကျပ်သား၊ ကြက်သွန်နီ ၃ လုံး၊ ခရမ်းချဉ်သီး ၄ လုံး၊ သံပုရာသီး ၄ လုံး၊ ငရုတ်သီးစိမ်း ၁၀ တောင့်၊ ကြက်သွန်ဖြူ အမွှာကြီး ၇ မွှာ၊ ငံပြာရည် ထမင်းစားဇွန်း ၈ ဇွန်း၊ သကြား ထမင်းစားဇွန်း ၃ ဇွန်း၊ နံနံပင်၊ ပင်စိမ်း တို့ဖြစ်ပါတယ်။
ပြုလုပ်နည်း အဆင့်ဆင့်ကိုကြည့်ရအောင်ပါ
၁။ ပဲကြာဇံကို တစ်နာရီခန့်ရေထဲမှာ ကြိုစိမ်ထားပါ။ ပုစွန်ကို ကျောခွဲပြီး သန့်စင်ထားပါ။ ပြည်ကြီးငါးကို လက်နှစ်ဆစ်ခန့် အရွယ်လှီးပြီး မွှန်းထားပါ။
၂။ ပဲကြာဇံသုပ်အတွက် လိုအပ်တဲ့ ဆော့စ် ပြုလုပ်ဖို့အတွက် ငြုပ်သီးစိမ်း နဲ့ကြက်သွန်ဖြူကို ညက်နေအောင်ထောင်းထားပါ။ ပန်းကန်လုံးထဲမှာ ငံပြာရည် ၊ ငြုပ်သီးစိမ်း နဲ့ ကြက်သွန်ဖြူ ထောင်းပြီးသားထည့်ပြီး သံပုရာရည်ညှစ်ပါ။ သကြားထည့်ပြီးမွှေလိုက်ရင် ဆော့စ်ရပါပြီ။
၃။ ရေစိမ်ထားတဲ့ ပဲကြာဇံတွေကို ရေပူထဲမှာ ၅ စက္ကန့်လောက် ရေနွေးဖျောပေးပါ။ ပဲကြာဇံ အရောင်က အကြည်ရောင် ပြောင်းသွားပြီဆိုရင် ရေအေးဇလုံထဲ ပြောင်းစိမ်ပြီး ခဏထားပါ။ ပြီးတော့မှ ပြန်ဆယ်ကာ ရေစစ်ထားပါ။
၄။ ရေနွေးဆူတဲ့အိုးထဲမှာဆားနည်းနည်းခပ်ပြီး ပြည်ကြီးငါးထည့်ပြုတ်ပါ။ ပြီးတော့မှ ပုစွန်ထည့်ပါ။ စက္ကန့် ၂၀ လောက်ကြာရင် ရေနွေးထဲက ဆယ်ယူပြီး ရေစစ်ထားပါ။
၅။ ဇလုံထဲမှာ ပဲကြာဇံ ၊ ပင်လယ်စာတွေကို ထည့်ပြီး အပေါ်ကနေ ဆော့စ်ဆမ်းပါ။ ဆော့စ်ကနည်းနေတယ်ဆိုရင် ပင်လယ်စာပြုတ်ထားတဲ့ အရည်ဆမ်းလို့ရပါတယ်။
၆။နောက်ဆုံးမှာ လှီးထားတဲ့ ကြက်သွန်ကွင်း နဲ့ ခရမ်းချဉ်သီးထည့်နယ်ပါ။ နံနံပင် ၊ ပင်စိမ်းကြိုက်သူတွေကလည်း အပေါ်က ဖြူးပြီးစားလို့ရပါတယ်။
(အရသာအနေနဲ့ အပေါ့အငံမြည်းပြီး အချဉ်လိုရင် သံပုရာရည် ၊ အငံလိုရင် ငံပြာရည်ထည့်နိုင်ပါတယ်)
ကဲ….စားကောင်းတဲ့ ပင်လယ်စာပဲကြာဇံကို ဆိုင်သွား မစားဘဲ အိမ်မှာပဲ လုပ်စားလိုက်တော့နော်။ Yummy!
Ref: Glass Noodle Seafood Salad
May Moe (ရိုးရာလေး)
