တံထွေးနဲ့ထွေးခံရပြီး COVID-19 ရောဂါကူးစက်ခံခဲ့ရတဲ့ ဘူတာရုံဝန်ထမ်းအမျိုးသမီး ကွယ်လွန်

COVID-19 ရောဂါရှိတယ်ဆိုတဲ့ အမျိုးသားတစ်ယောက်ရဲ့ တံထွေးနဲ့ထွေးခြင်း ခံခဲ့ရပြီးနောက်မှာ COVID-19 ရောဂါ ကူးစက်ခံခဲ့ရတဲ့ ဘူတာရုံဝန်ထမ်း အမျိုးသမီး ကွယ်လွန်သွားပြီလို့ ဘီဘီစီသတင်းဌာနက ဖော်ပြပါတယ်။ အသက် ၄၇ နှစ်ရှိတဲ့ မူဂျင်ဂါဟာ အသက်ရှူလမ်းကြောင်းဆိုင်ရာ ရောဂါအခံရှိသူပါ။ မတ်လ ၂၂ ရက်က လန်ဒန်မြို့ ဗစ်တိုးရီးယားဘူတာရုံမှာ အလုပ်လုပ်နေတုန်း အမျိုးသားတစ်ယောက်က မူဂျင်ဂါရဲ့အနားကို ချဉ်းကပ်လာပြီး ”ဘာလုပ်နေတာလဲ။ ဘာလို့ ဒီမှာ ရှိနေတာလဲ”လို့ မေးမြန်းခဲ့ပါတယ်။ ” သူက အလုပ်လုပ်နေတာလို့ ပြန်ပြောလိုက်တော့ အဲဒီအမျိုးသားက သူ့မှာ ကိုရိုနာဗိုင်းရပ်စ်ရှိတယ်လို့ ပြောပြီး သူ့ကို တံထွေးနဲ့ထွေးခဲ့တာပါ”လို့ မူဂျင်ဂါရဲ့ခင်ပွန်း ကာတာလေက ပြောပါတယ်။

မူဂျင်ဂါရဲ့ လုပ်ဖော်ကိုင်ဖက် အမျိုးသမီးတစ်ယောက်လည်း တံထွေးနဲ့ ထွေးခံခဲ့ရပါတယ်။ ရက်ပိုင်းအကြာမှာတော့ သူတို့ ၂ ယောက်လုံး COVID-19 ရောဂါကူးစက်ခံရနေပြီလို့ စစ်ဆေးတွေ့ရှိခဲ့တာပါ။ သူတို့ ၂ ယောက်ကို တံထွေးနဲ့ထွေးခဲ့တဲ့ အမျိုးသားကို ခြေရာခံနိုင်ဖို့ စုံစမ်းစစ်ဆေးမှုတွေလုပ်နေတယ်လို့ ဗြိတိန်နိုင်ငံ ပို့ဆောင်ရေးရဲတပ်ဖွဲ့က ပြောပါတယ်။ ဧပြီလ ၂ ရက်မှာ မူဂျင်ဂါကို ဘားနက်ဆေးရုံ တင်ပို့ခဲ့ပြီး အသက်ရှူစက်တပ်ပေးခဲ့ပေမဲ့ နောက်သုံးရက်အကြာမှာ ကွယ်လွန်သွားခဲ့တာလို့ ဆိုပါတယ်။ မူဂျင်ဂါရဲ့ ဈာပနအခမ်းအနားကို အသက် ၁၁ နှစ်အရွယ် သမီးဖြစ်သူအပါအဝင် လူ ၁၀ ယောက်ပဲ တက်ရောက်ခွင့်ရခဲ့ပါတယ်။

Team (ရိုးရာလေး)