The Wanted အမျိုးသားအဆိုအဖွဲ့ရဲ့အဖွဲ့ဝင်တစ်ယောက်ဖြစ်တဲ့ တွမ် ပါခ်ကာ (Tom Parker) ဟာ ဉီးနှောက်အကျိတ်ကင်ဆာခံစားနေရကြောင်း ပရိသတ်တွေကို အသိပေးပြီး ၂ နှစ် မပြည့်ခင်မှာပဲ ကွယ်လွန်သွားခဲ့ပါတယ်။ သူ သေဆုံးချိန် အသက် ၃၃ နှစ်ရှိပါပြီ။
ပါခ်ကာရဲ့ဇနီး ကဲလ်ဆေး ဟဒ်ဝစ်ခ် (Kelsey Hardwick) နဲ့ သူ့ရဲ့အဖွဲ့သားတွေက သူ့ရဲ့သေဆုံးသွားတယ်ဆိုတာကို ဗုဒ္ဓဟူးနေ့က အင်စတာဂရမ်ပို့စ်နဲ့ အတည်ပြုပေးခဲ့ပါတယ်။ အဆိုတော်က သူ့မိသားစုနဲ့သူ့ရဲ့အဖွဲ့သားတွေ ဝိုင်းဖွဲ့နေတဲ့ ဒီနေ့ နေ့လယ်စာစားချိန်မှာငြိမ်းချမ်းစွာ ကွယ်လွန်ခဲ့ပါတယ်လို့ The Wanted က အင်စတာဂရမ်မှာ ရေးသားခဲ့ပါတယ်။ The Wanted အဖွဲ့သားက ပါခ်ကာကို သူတို့ရဲ့အစ်ကိုလို့ ခေါ်ဝေါ်သုံးနှုန်းခဲ့ပါတယ်။
![](https://yoyarlay.com/wp-content/uploads/2022/03/30-2-2022-yyl20.jpg)
“ကျွန်မတို့ရဲ့နှလုံးသားတွေ ကွဲကြေနေပါတယ်။ တွမ်က ကျွန်မတို့ကမ္ဘာကြီးရဲ့အလယ်ဗဟိုမှာ ရှိခဲ့တာပါ။ သူ့ရဲ့ကူးစက်တတ်တဲ့အပြုံးတွေမရှိတဲ့၊ သူမရှိတဲ့ ဘဝကို စိတ်ကူးကြည့်လို့တောင်မရပါဘူး” လို့ ကဲလ်ဆေးက ကလေး (၂) ယောက်နဲ့အတူရိုက်ထားတဲ့ သူတို့မိသားစုပုံနဲ့အတူ အင်စတာဂရမ်ပို့စ်မှာ ပြောခဲ့ပါတယ်။
![](https://yoyarlay.com/wp-content/uploads/2022/03/30-2-2022-yyl21.jpg)
၂၀၂၀ခုနှစ် အောက်တိုဘာလက ပါခ်ကာဟာ ပြင်းထန်တဲ့ဉီးနှောက်အကျိတ်ကင်ဆာအမျိုးအစားဖြစ်တဲ့ အဆင့် ၄ Glioblastoma ကင်ဆာရောဂါကို ခံစားနေရတယ်ဆိုတာကို ကြေညာခဲ့ပါတယ်။ သတိမေ့မြောတာ (၂) ကြိမ်လောက် ကြုံတွေ့ပြီးတဲ့နောက်မှာ ဉီးနှောက်အကျိတ်ကင်ဆာရှိတယ်ဆိုတာ သိခဲ့ရတာပါ။ ၂၀၂၁ခုနှစ် ဇန်နဝါရီလတုန်းကတော့ ဉီးနှောက်အကျိတ်ရဲ့အရွယ်အစားက သိသိသာသာလျော့ကျသွားခဲ့တယ်လို့ ပါခ်ကာက ပြောခဲ့ပါသေးတယ်။
![](https://yoyarlay.com/wp-content/uploads/2022/03/30-2-2022-yyl22.jpg)
ပါခ်ကာက ၂၀၁၁ခုနှစ်ရဲ့ “Glad You Came” သီချင်းနဲ့ လူသိများတဲ့ The Wanted အဖွဲ့ရဲ့အဆိုတော်တွေထဲက တစ်ဉီးပါ။ မကြာသေးခင်က သူတို့အဖွဲ့က Reunion Tour အကြောင်းနဲ့ အကျော်အကြားဆုံးအယ်လ်ဘမ်အကြောင်း ကြေညာခဲ့ပါတယ်။ UK က ရှိုးတစ်ခုမှာလည်း ပါခ်ကာက ဝှီးချဲမှာထိုင်ပြီး သူ့ရဲ့အဖွဲ့သားတွေနဲ့အတူ စင်ပေါ်မှာ ဖျော်ဖြေတင်ဆက်ခဲ့ပါတယ်။
အခုနှစ်မတ်လအစောပိုင်းမှာ ပါခ်ကာက ဇူလိုင်လမှာ ထုတ်ဝေဖို့ စီစဉ်ထားတဲ့ “ဘယ်အခြေအနေမှာမဆို မျှော်လင့်ချက်ရှာဖွေခြင်းအကြောင်း” စာအုပ်တစ်အုပ်ကို ရေးသားထားတယ်လို့ ကြေညာခဲ့ပါတယ်။
Ref: CNN “Tom Parker, The Wanted singer, has died at 33”
WL (ရိုးရာလေး)