သံဓာတ်ချို့တဲ့ခြင်းက အာဟာရဓာတ်ချို့တဲ့ခြင်းဆိုင်ရာအဖြစ်များတဲ့ရောဂါဖြစ်ပါတယ်။ အထူးသဖြင့် ကိုယ်ဝန်ဆောင်အမျိုးသမီးတွေနဲ့ သံဓာတ်လုံလောက်စွာ မစားသုံးတဲ့လူတွေမှာ အဖြစ်များပါတယ်။ သံဓာတ်ချို့တဲ့ခြင်းက သွေးအားနည်းရောဂါကို ဖြစ်စေနိုင်ပါတယ်။ သင့်ခန္ဓာကိုယ်က ဟီမိုကလိုဗင်ရရှိဖို့ သံဓာတ်မလုံလောက်တဲ့အခါ ဒီလိုဖြစ်လာတတ်ပါတယ်။ ဟီမိုကလိုဗင်ဆိုတာက အောက်ဆီဂျင်ကို ဆဲလ်တစ်ရှုးတွေဆီ သယ်ဆောင်ပေးတဲ့ သွေးနီဥမှာ ပါဝင်တဲ့ ပရိုတင်းဓာတ်ဖြစ်ပါတယ်။
သံဓာတ်ချို့တဲ့ခြင်းက သွေးအားနည်းခြင်းရဲ့ အဖြစ်များဆုံး အမျိုးအစားဖြစ်နေရင်လည်း သံဓာတ်ချို့တဲ့ခြင်းလက္ခဏာရပ်တွေက ပြင်းထန်မှုပေါ်မူတည်ပြီး ပြောင်းလဲပါတယ်။ လူတစ်ယောက်က အလွန်အကျွံသံဓာတ်ချို့တဲ့ခြင်းကို ခံစားရရင် လက္ခဏာရပ်တွေကို သတိပြုမိဖို့ ပိုပြီးခက်ခဲပါတယ်။ ဒါကြောင့် သံဓာတ်ချို့တဲ့ခြင်းရဲ့ အဖြစ်များဆုံးလက္ခဏာရပ်တွေကို စာဖတ်ပရိသတ်တွေ သိရှိစေဖို့အတွက် ဖော်ပြပေးလိုက်ရပါတယ်။
ပင်ပန်းနွမ်းလျလွန်းခြင်းနဲ့ ဒေါသထွက်ခြင်း
ခြေကုန်လက်ပန်းကျသလိုခံစားရခြင်းက သံဓာတ်ချို့တဲ့ခြင်းရဲ့အဖြစ်များဆုံးလက္ခဏာတွေထဲက တစ်ခုပါပဲ။ ပင်ပန်းနွမ်းလျခြင်းက အာရုံစိုက်နိုင်စွမ်းနဲ့ စဉ်းစားနိုင်စွမ်းပေါ်သက်ရောက်မှုရှိပြီး သင့်ကို ဒေါသထွက်စေတယ်ဆိုရင် သတိထားဖို့လိုလာပါပြီ။ သင်က သာမန်ထက် ပင်ပန်းနွမ်းလျပြီး ကောင်းကောင်းအနားယူထားတာတောင် ခြေကုန်လက်ပန်းကျနေသလိုခံစားရရင် သံဓာတ်ချို့တဲ့ခြင်းရှိမရှိစစ်ဆေးဖို့ လိုလာပါပြီ။
အသားရေဖျော့တော့လာခြင်း
သင့်အသားရေအရောင်ဖျော့လာမယ်ဆိုရင် သံဓာတ်ချို့တဲ့တာဖြစ်နိုင်ပါတယ်။ သွေးနီဥထဲမှာ သံဓာတ်ပမာဏနည်းနေရင် အသားရေက ဖျော့တော့လာပြီး သွေးရောင်မရှိဖြစ်တတ်ပါတယ်။ ပိုပြီးသေချာဖို့ဆိုရင် မျက်ရစ်အတွင်းထဲ၊ နှုတ်ခမ်း၊ လက်သည်းတွေကို စစ်ဆေးကြည့်ပါ။ ပုံမှန်ထက် အရောင်ဖျော့နေရင် သံဓာတ်ချို့တဲ့တာဖြစ်နိုင်ပါတယ်။
အသက်ရှုမဝခြင်း
သင်က လှေကားတတ်တဲ့အခါ။ လှုပ်လှုပ်ရှားရှားအရာတွေလုပ်တဲ့အခါ အသက်ရှုမဝသလို ဖြစ်လာရင် သတိထားသင့်ပါတယ်။ အရင်က အဲဒီလိုမဖြစ်ဘဲ အသက်ရှုမဝသလို ခံစားလာရပြီဆိုရင် သံဓာတ်ချို့တဲ့ခြင်းရဲ့လက္ခဏာဖြစ်နိုင်ပါတယ်။
ရင်တုန်ပန်းတုန်ဖြစ်ခြင်း
ပုံမှန်မဟုတ်ဘဲ နှလုံးခုန်မြန်နေသလို ခံစားရရင် သံဓာတ်ချို့တဲ့ခြင်းရဲ့လက္ခဏာရပ်ဖြစ်နိုင်ပါတယ်။ သံဓာတ်ချို့တဲ့လာတဲ့အခါ ဟီမိုကလိုဗင်ပမာဏနည်းသွားတဲ့အတွက် သင့်နှလုံးက အောက်ဆီဂျင်သယ်ဆောင်ဖို့ နှစ်ဆလုပ်ဆောင်ရပါတယ်။ ဒါကြောင့် နှလုံးခုန်မြန်တာ၊ ရင်တုန်ပန်းတုန်ဖြစ်လာရတာဖြစ်ပါတယ်။
မခံမရပ်နိုင်ခြေထောက်နာကျင်ခြင်း
ညဘက်တွေမှာ ခြေထောက်ကြွက်တတ်သလိုခံစားရရင် အထူးသဖြင့် အိပ်စက်နေတဲ့အချိန်၊ လဲလျောင်းနေတဲ့အချိန်တွေမှာ ဒါက သံဓာတ်ချို့တဲ့ခြင်းကြောင့်ဖြစ်နိုင်ပါတယ်။ ြခေထောက်ကြွက်တတ်ခြင်းက သင့်ရဲ့အိပ်စက်ချိန်ကို အနှောင့်အယှက်ဖြစ်စေပါတယ်။ အမြဲလိုလို သံဓာတ်ပမာဏနည်းလာလေလေ လက္ခဏာရပ်တွေက ပိုဆိုးလာလေလေဖြစ်ပါတယ်။
Ref: Are You Suffering From Iron Deficiency? Look For These 5 Signs And Symptoms
WL (ရိုးရာလေး)
