ဒီနှစ်အတွင်း ကယ်လီဖိုးနီးယားပြည်နယ်မှာ တောမီးလောင်ကျွမ်းခဲ့တဲ့ မြေနေရာအကျယ်အဝန်းက ဧက ၂ သန်းရှိပြီး စံချိန်သစ်တင်ခဲ့ပါတယ်။ အဲဒီအကျယ်အဝန်းဟာ အမေရိကန်နိုင်ငံ ဒယ်လာဝဲပြည်နယ်ထက် ပိုကြီးမားပါတယ်။ လက်ရှိအချိန်အထိလည်း ကယ်လီဖိုးနီးယားပြည်နယ်တစ်ဝန်းမှာ လောင်ကျွမ်းနေတဲ့ တောမီး ၂၄ ခုကို မီးသတ်သမား ၁၄၀၀၀ ကျော်က ငြှိမ်းသတ်နေရတုန်းပဲလို့ ကယ်လီဖိုးနီးယားပြည်နယ် သစ်တောနဲ့ မီးဘေးကာကွယ်ရေးဌာန (Cal Fire)က ထုတ်ပြန်ထားပါတယ်။
![](https://yoyarlay.com/wp-content/uploads/2020/09/8-9-2020-yyl-029.jpg)
ကယ်လီဖိုးနီးယားပြည်နယ်ဟာ စံချိန်တင်အပူလှိုင်းဖြတ်မှု ရင်ဆိုင်နေရပြီး ပြီးခဲ့တဲ့တနင်္ဂနွေနေ့က လော့စ်အိန်ဂျိလိစ်ကောင်တီမှာ စံချိန်တင်အပူချိန်အဖြစ် အပူချိန် ၄၉.၄ ဒီဂရီဆဲလ်စီးယက် ရှိခဲ့ပါတယ်။ အင်္ဂါနေ့ကစပြီး အပူချိန်ကျဆင်းဖွယ်ရှိတယ်လို့ ခန့်မှန်းထားပေမဲ့ လေပြင်းတိုက်ခတ်မှုကြောင့် မီးလောင်ရာလေပင့် အခြေအနေ ကြုံရနိုင်တယ်လို့ အမျိုးသားမိုးလေဝသဌာနက သတိပေးထားပါတယ်။
![](https://yoyarlay.com/wp-content/uploads/2020/09/8-9-2020-yyl-030.jpg)
ကယ်လီဖိုးနီးယားပြည်နယ်မှာ သြဂုတ်လ ၁၅ ရက်နောက်ပိုင်း တောမီးလောင်ကျွမ်းမှု ၁၀၀၀ နီးပါး ဖြစ်ပွားခဲ့ပြီး တောမီးလောင်ကျွမ်းမှု တော်တော်များများကတော့ မိုးကြိုးပစ်ရာကနေ စတင်လောင်ကျွမ်းခဲ့တာပါ။
![](https://yoyarlay.com/wp-content/uploads/2020/09/8-9-2020-yyl-031.jpg)
ပြီးခဲ့တဲ့ သောကြာနေ့က ဆီရီရာတောင်တန်းမှာ စတင်လောင်ကျွမ်းခဲ့တဲ့ Creek Fire တောမီးကတော့ အကြီးမားဆုံး တောမီးလောင်ကျွမ်းမှုဖြစ်ပြီး ဧက ၇၈၀၀၀ ကျော် လောင်ကျွမ်းခဲ့ပြီးပါပြီ။ ပြီးခဲ့တဲ့စနေနေ့က မီးတောက်တွေကြားမှာ ပိတ်မိနေတဲ့ တောင်တက်သမား ၂၀၀ ကျော်ကို ရဟတ်ယာဉ်နဲ့ ကယ်တင်ခဲ့ရပါတယ်။ ကောင်တီ ၅ ခုမှာ အရေးပေါ်အခြေအနေ ကြေညာထားရပြီး လက်ရှိအချိန်မှာ တောင်မတက်ကြဖို့ သတိပေးထားပါတယ်။
Ref: BBC ” Wildfires burn through record area in California as blazes continue to spread”
Nz(ရိုးရာလေး)