လီဗာပူးအသင်းဟာ ပရီးမီးယားလိဂ်ပွဲစဉ်(၁၆)ပွဲ ကစားပြီးချိန်မှာတော့ အင်္ဂလန်ထိပ်တန်းလိဂ်သမိုင်းတစ်လျှောက် အကောင်းဆုံးရာသီစတင်နိုင်တဲ့ အသင်းအဖြစ် စံချိန်သစ် ရေးထိုးလိုက်ပါပြီ။ ပွဲစဉ်(၁၆)ပွဲအပြီးမှာ လီဗာပူးက (၁၅)ပွဲနိုင်၊ (၁)ပွဲသရေရလဒ်နဲ့ ရမှတ်(၄၆)မှတ် ရရှိထားပြီး ဒုတိယနေရာက လက်စတာကို (၈)မှတ်၊ လက်ရှိချန်ပီယံ မန်စီးတီးကို (၁၄)မှတ် ဖြတ်နိုင်ခဲ့တယ်။
ပွဲစဉ်(၁၆)ပွဲအပြီး လီဗာပူးရဲ့ ရမှတ်ဟာ ၂၀၀၅-၂၀၀၆ ရာသီက နည်းပြမော်ရင်ဟို ကိုင်တွယ်တဲ့ ပရီးမီးယားလိဂ်ချန်ပီယံ ချဲလ်ဆီးအသင်းထက် (၃)မှတ်ပိုများနေသလို ပြီးခဲ့တဲ့ရာသီက ချန်ပီယံဖြစ်ခဲ့တဲ့ မန်စီးတီးအသင်းထက်လည်း (၅)မှတ်ပိုများပါတယ်။ ၁၉၉၀ ပြည့်နှစ်နောက်ပိုင်း အမှတ်ပေးဖလား ဆွတ်ခူးနိုင်ခဲ့ခြင်းမရှိတဲ့ လီဗာပူးဟာ ဒီရာသီမှာတော့ ပရီးမီးယားလိဂ်ဖလား ဆွတ်ခူးနိုင်မယ်လို့ ရေပန်းစားနေပါတယ်။ ၁၉၇၈-၇၉ ရာသီနဲ့ ၁၉၈၇-၈၈ ရာသီတွေမှာ အမှတ်ပေးဖလား ဆွတ်ခူးခဲ့တဲ့ လီဗာပူးအသင်းက ရမှတ်(၄၀)၊ (၃၉)မှတ်ပဲ ရရှိခဲ့တာပါ။
အင်္ဂလန်အမှတ်ပေးပြိုင်ပွဲသမိုင်းမှာ ပွဲစဉ်(၁၆)ပွဲအပြီး ရမှတ်(၃၈)မှတ်နဲ့အထက် ရရှိခဲ့ပြီးမှ အမှတ်ပေးဖလား ဆွတ်ခူးနိုင်ခြင်းမရှိတဲ့ အသင်းတစ်သင်းပဲရှိပါတယ်။ ဒါကတော့ ၁၉၈၅-၈၆ ရာသီက မန်ယူအသင်းပါပဲ။
Nz (ရိုးရာလေး)
