ယူရို-၂၀၂၀ ပြိုင်ပွဲအတွက် ပထမဆုံးလက်မှတ်ရောင်းချရေးကာလမှာ ယူအီးအက်ဖ်အေထံမှာယူတဲ့ လက်မှတ်အစောင်ရေ (၁၉.၃) သန်းရှိခဲ့ပြီး စံချိန်သစ်တင်နိုင်ခဲ့ပါတယ်။ ယူရို-၂၀၁၆ ပြိုင်ပွဲမတိုင်ခင်က ပထမဆုံးလက်မှတ်ရောင်းချရေးကာလမှာ ယူအီးအက်ဖ်အေထံမှာယူတဲ့လက်မှတ်စောင်ရေ (၁၁) သန်းထိရှိခဲ့ဖူးပါတယ်။
အခုအခါမှာတော့ အဲဒီစံချိန်ကိုချိုးနိုင်ခဲ့ပါပြီ။ ယူအီးအက်ဖ်အေရဲ့ ”ပရိသတ်ဦးစားပေး” လက်မှတ်ရောင်းချရေးမူဝါဒ တစ်စိတ်တစ်ပိုင်းအဖြစ် ဇွန်လ (၁၂) ရက်ကနေ ဇူလိုင်လ (၁၂) ရက်ကြားကာလအတွင်း လက်မှတ်အစောင်ရေ (၁.၅) သန်းနီးပါး ရောင်းချခဲ့ပါတယ်။ ၂၀၂၀ ပြည့်နှစ် ဇူလိုင်လ (၁၂) ရက်နေ့ကျရင် ဝင်ဘလေကွင်းမှာကျင်းပမယ့် ယူရို-၂၀၂၀ ဗိုလ်လုပွဲအတွက် လက်မှတ်မှာယူမှု (၁.၉) သန်းရှိခဲ့တယ်လို့ ယူအီးအက်ဖ်အေက ပြောပါတယ်။ လက်မှတ်အများဆုံးမှာယူကြသူတွေကတော့ ဒေသခံတွေပါပဲ။
စိန့်ပီတာစဘတ်မြို့မှာကျင်းပမယ့် အုပ်စုအဆင့်နဲ့ ကွာတားဖိုင်နယ်ပွဲစဉ်အတွက် လက်မှတ်မှာယူမှုတွေထဲမှာ (၈၁) ရာခိုင်နှုန်းက ရုရှားပရိသတ်တွေဖြစ်ပါတယ်။ ၂၀၂၀ ပြည့်နှစ် ဇွန်လ (၁၂) ရက်နေ့ကနေ ဇူလိုင်လ (၁၂) ရက်နေ့ကြားကျင်းပမယ့် ယူရို-၂၀၂၀ ပြိုင်ပွဲဟာ ယူရိုပြိုင်ပွဲကျင်းပတဲ့ နှစ် (၆၀) ပြည့် အခမ်းအနားဖြစ်ပါတယ်။ အဲဒီအတွက် ပထမဆုံးအကြိမ်အနေနဲ့ ဥရောပတလွှားမှာရှိတဲ့ မြို့ (၁၂) မြို့မှာ ကစားမှာပါ။ လာမယ့်ဒီဇင်ဘာလကျရင် ဒုတိယအသုတ်အဖြစ် လက်မှတ်ရောင်းချသွားမှာဖြစ်ပါတယ်။
Nz (ရိုးရာလေး)
