နှစ် ၆၀ တိုင်တိုင် ကလေးတွေကို ခရစ္စမတ်လက်ဆောင်တွေယူဆောင်လာပေးခဲ့တဲ့ ဗြိတိန်ရဲ့သက်တမ်းအကြာဆုံးဆန်တာကလော့စ်

7-12-2022-yyl-02.jpg

ဗြိတိန်နိုင်ငံရဲ့သက်တမ်းအကြာဆုံးဆန်တာကလော့စ်ဖြစ်တဲ့ အမျိုးသားတစ်ဦးဟာ ခရစ္စမတ်ရောက်တိုင်း ကလေးတွေဆီ လက်ဆောင်တွေယူဆောင်လာပေးခဲ့ပါတယ်။ အခုဆို သူ ဆန်တာကလော့စ်ဖြစ်ခဲ့တာ နှစ် (၆၀) ပြည့်မြောက်ခဲ့ပါပြီ။ သူက အသက် ၇၈ နှစ်ရှိပြီဖြစ်တဲ့ ရေးလ် ဟူလ်ဆဲဆိုသူပါ။

ရေးလ်ဟာ ၁၉၆၂ ခုနှစ် အသက် ၁၈ နှစ်ကတည်းက ခရစ္စမတ်ဘိုးဘိုးဝတ်စုံဝတ်ဆင်ပြီး ကလေးတွေကို လက်ဆောင်တွေ ပေးခဲ့တာပါ။ သူက ရွှင်မြူးနေတဲ့ ချစ်စရာဆန်တာကလော့စ် (ခရစ္စမတ်ဘိုးဘိုး) အဖြစ် ဝတ်ဆင်ပြီး ကလေးတွေဆီ လက်ဆောင်တွေယူဆောင်လာပေးဖို့ တစ်နှစ်မှ မပျက်ကွက်ခဲ့ပါဘူး။ ကိုဗစ်ကပ်ရောဂါအတွင်းမှာတောင် အခြားသူတွေနဲ့ ၆ ပေအကွာမှာ နေတဲ့စည်းမျဉ်းကို လိုက်နာပြီး လက်ဆောင်တွေ ယူဆောင်လာပေးခဲ့တာပါ။

သူက ခရစ္စမတ်အချိန်အခါရောက်ရင် ဆန်တာကလော့စ်အဖြစ် ကျောင်းတွေ၊ စူပါမားကတ်နဲ့ကျေးရွာတွေ သွားရောက်လည်ပတ်လေ့ရှိခဲ့ပြီး ပရဟိတအတွက် ပေါင် ၅၅၀၀၀ ကျော် ရန်ပုံငွေရှာပေးခဲ့ပြီးပါပြီ။ အခု သူက ဆန်တာကလော့စ်ဖြစ်ခဲ့တာ နှစ် (၆၀) ပြည့်မြောက်ခဲ့တာကြောင့် ဗြိတိန်မှာရော တစ်ကမ္ဘာလုံးမှာပါ သက်တမ်းအကြာဆုံးဆန်တာကလော့စ်ဖြစ်တယ်လို့ ယုံကြည်ထားပါတယ်။

နှစ် ၆၀ တိုင်တိုင် ဆန်တာကလော့စ်အဖြစ် ရေးလ်လုပ်ဖြစ်ခဲ့တာက သူဟာ ငယ်ဘဝကို ကောင်းကောင်းဖြတ်သန်းခဲ့ရတာမဟုတ်တဲ့အတွက် သူ့လိုငယ်ဘဝနဲ့မတူအောင် အခြားကလေးတွေကို ခရစ္စမတ်အချိန်အခါ တွေ့ကြုံခံစားစေချင်တာကြောင့်ပါ။ ကလေးတွေဆီ ပျော်ရွှင်မှုတွေ ယူဆောင်လာပေးနိုင်တာကြောင့်လည်း ဆန်တာကလော့အဖြစ် လုပ်ဖြစ်ခဲ့ပါတယ်။ သူ ရခဲ့တဲ့ဆုလာဘ်ကတော့ ကလေးတွေရဲ့မျက်နှာပေါ်က ပျော်ရွှင်မှုတွေနဲ့ သူတို့ရဲ့မျက်လုံးထဲမှာ တလက်လက်တောက်ပမှုတွေကို မြင်တွေ့ရတာပါပဲ။

ရေးလ်ဟာ Hope House Children’s Hospices အဖွဲ့အစည်းအတွက်လည်း လွန်ခဲ့တဲ့ နှစ် ၃၀ လုံးရန်ပုံငွေရှာပေးနေခဲ့တာပါ။ ဆန်တာကလော့စ်အဖြစ် ကလေးတွေနဲ့တွေ့ဆုံရတာ နှစ်သက်တဲ့အတွက် သူ့ခန္ဓာကိုယ်က ခွင့်ပြုသရွေ့တော့ ဆန်တာကလော့စ်အဖြစ် ဆက်လုပ်သွားမယ်လို့ ရေးလ်က ပြောပါတယ်။

Ref: TheMirror “Britain’s ‘longest-serving Santa’ celebrates 60th year of bringing Christmas magic to kids”

WL(ရိုးရာလေး)

Share this post

ရိုးရာလေးတွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင်မှ ပြန်လည်ကူးယူဖော်ပြခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဤနေရာတွင်ဖတ်ရှုနိုင်ပါသည်။

Leave a Reply

scroll to top