မြန်မာပရိသတ်တွေ ချစ်ခင်အားပေးကြတဲ့ ထိုင်းမင်းသားတွေထဲမှာ ထိပ်တန်းမင်းသားချော James Jirayu လည်း အပါအဝင်ပါပဲ။ James Jirayu မှာ ချစ်သူကောင်မလေးရှိတယ်ဆိုတာကို တချို့ပရိသတ်တွေက သိကြပေမဲ့ တချို့ကတော့ မသိကြပါဘူး။ သူကိုယ်တိုင်ကလည်း အနုပညာအသိုင်းအဝိုင်းကမဟုတ်တဲ့ သူ့ရဲ့ချစ်သူကောင်မလေးကို လူမှုကွန်ယက်ပေါ်မှာ ထုတ်ပြလေ့မရှိပါဘူး။ မကြာသေးခင်ကမှ သူ့ရဲ့အင်စတာဂရမ်Story မှာ ချစ်သူကောင်မလေး Nong Foam နဲ့နှစ်ယောက်အတူရိုက်ထားတဲ့ ပုံတစ်ပုံကို နိုဝင်ဘာ ၇ ရက်နေ့က တင်ဖြစ်ခဲ့ပါတယ်။
အဲဒီပုံက ဖက်ရှင်ပွဲတစ်ပွဲကို တက်ရောက်ခဲ့တဲ့အချိန်မှာ ရိုက်ခဲ့တာဖြစ်ပြီး James က သူ့ချစ်သူကောင်မလေးရဲ့လက်ကို ကိုင်ပြီး လမ်းလျှောက်လာတဲ့ပုံပါ။ နှစ်ယောက်တွဲဓာတ်ပုံကို လူမှုကွန်ယက်ပေါ်ထုတ်ပြတာ ပထမဆုံးပါပဲ။ သူတို့နှစ်ယောက်က ချစ်သူသက်တမ်း (၄) နှစ်ရှိပါပြီ။ အဲဒီပွဲကို James က သူ့ကောင်မလေးအပြင် သူ့ရဲ့အနုပညာရှင်သူငယ်ချင်းတွေနဲ့လည်း တက်ရောက်ခဲ့တာပါ။ အနုပညာရှင်သူငယ်ချင်းတွေနဲ့အတူ ရိုက်ထားတဲ့ အဖွဲ့လိုက်ပုံမှာလည်း သူ့ရဲ့ချစ်သူကောင်မလေးကို မြင်တွေ့ရပါတယ်။
နိုဝင်ဘာ ၈ ရက်နေ့က James Jirayu ဟာ “OMEGA Her Time” ပွဲကို တက်ရောက်တော့ သတင်းထောက်တွေကို သူ ရိုက်ကူးနေတဲ့ ဇာတ်လမ်းတွဲတွေအကြောင်းနဲ့ သူ့နဲ့သူ့ချစ်သူကောင်မလေးတို့ရဲ့ဓာတ်ပုံအကြောင်း အင်တာဗျူးဖြေကြားခဲ့ပါတယ်။ သူ့ကောင်မလေးနဲ့ဓာတ်ပုံအကြောင်းပြောတော့ James က အင်စတာဂရမ်မှာ တင်ဖြစ်ခဲ့တဲ့ သူ့ရဲ့ပထမဆုံးနှစ်ယောက်တွဲပုံဖြစ်တယ်လို့ ဖွင့်ဟခဲ့ပါတယ်။ အဲဒီပုံလေးက ချစ်စရာကောင်းတဲ့အတွက် အင်စတာဂရမ်မှာ တင်ဖြစ်ခဲ့တာဖြစ်ပြီး ဒီဓာတ်ပုံမတင်ခင် သူ့ကောင်မလေးကိုလည်း တင်မယ်ဆိုတာ ပြောခဲ့ပါတယ်တဲ့။ နောက်ထပ်နှစ်ယောက်တွဲပုံတွေ မြင်ရဦးမှာလားလို့ မေးတော့ အခြေအနေဲ့အချိန်အခါပေါ်မူတည်တယ်လို့ ဖြေသွားခဲ့ပါတယ်။
James က ဇာတ်လမ်းတွဲအသစ် (၂) ကားကို ရိုက်ကူးနေပြီး နောက်နှစ်အစောပိုင်းမှာ သူ့ရဲ့ဇာတ်လမ်းတွဲ “To The Moon and Back” ကို ကြည့်ရှုရမှာဖြစ်ပါတယ်။ “We and Us” အမည်ရတဲ့ ဇာတ်လမ်းတွဲကတော့ ၂၀၂၃ ခုနှစ်ကုန်လောက်မှာ ထုတ်လုပ်ပြသဖို့ မျှော်လင့်ရပါတယ်။James Jirayu က ထိုင်းနိုင်ငံရဲ့နာမည်ကြီးမင်းသားတစ်ယောက်ဖြစ်ပြီး သစ္စာရှင်ဇနီးသည် (Padiwaradda)၊ မင်းတစ်ယောက်သာ (Neung Nsi Seung)၊ ဘဝအဆက်ဆက်ထုံးဖွဲ့မယ့်ချစ်ခြင်း (Leh Bupakarn)၊ ငန်းဖြူမလေးရဲ့ချစ်ပုံပြင် (Buang Hong)၊ အချစ်မိုးတွေရွာပေးပါ (Game Sanaeha)၊ အချစ်ဝှက်အကြားမြင်ဆရာမလေး (Payakorn Sorn Ruk)၊ အနှိုင်းမဲ့ချစ်မေတ္တာ(Karat Ruk)၊ သေစေနိုင်သောအချစ်ဂိမ်း (The Deadly Affair) အစရှိတဲ့ လူကြိုက်များတဲ့ဇာတ်လမ်းတွဲတွေမှာပါဝင်သရုပ်ဆောင်ထားပါတယ်။
Ref: ThaiUpdate “James Jirayu gives updates about his new projects and talks about a sweet photo of him with his girlfriend”
WL ( ရိုးရာလေး )
