ရူမေဆာ ဂယ်လ်ဂျီ (Rumeysa Gelgi) ဆိုတဲ့ အသက် ၂၄ နှစ်အရွယ် မိန်းကလေးက အရပ် ၂ မီတာ ၁၅ စင်တီမီတာ (၇ ပေ၊ ၀.၇ လက်မ) ရှိတဲ့အတွက် အမြဲထင်ပေါ်နေခဲ့တာပါ။ အခုဆိုရင် ကမ္ဘာ့အရပ်အရှည်ဆုံးအမျိုးသမီးအဖြစ် တရားဝင်အသိအမှတ်ပြုခံခဲ့ရပါတယ်။ ရူမေဆာကို ကမ္ဘာ့အရပ်အရှည်ဆုံးသက်ရှိအမျိုးသမီးအဖြစ် ဂင်းနစ်မှတ်တမ်းက အခုအပတ်မှာ အတည်ပြုပေးခဲ့တာပါ။ သူဟာ Weaver Syndrome လို့ခေါ်တဲ့ ကြီးထွားနှုန်းမြန်စေတဲ့ ရှားပါးမျိုးရိုးဗီဇရောဂါနဲ့ မွေးဖွားလာခဲ့တာပါ။
![](https://yoyarlay.com/wp-content/uploads/2021/10/15-10-2021yyl02.jpg)
“အခြားသူတွေနဲ့ ကွဲပြားနေတာက သင် ထင်သလောက်မဆိုးဘူး။ အဲဒါက သင့်ကို မမျှော်လင့်ထားတဲ့အောင်မြင်မှုတွေကို ယူဆောင်ပေးနိုင်ပါတယ်”လို့ ရူမေဆာက သတင်းထောက်ကို ဂုဏ်ယူစွာနဲ့ ပြောကြားခဲ့ပါတယ်။ ဒီဂင်းနစ်မှတ်တမ်းက သူ့အတွက် ဒုတိယမြောက်မှတ်တမ်းဖြစ်ပါတယ်။ ၂၀၁၄ခုနှစ် အသက် ၁၈ နှစ်အရွယ်တုန်းကလည်း ရူမေဆာက ကမ္ဘာ့အရပ်အရှည်ဆုံးသက်ရှိဆယ်ကျော်သက်မိန်းကလေးအဖြစ် အသိအမှတ်ပြုခံခဲ့ရပါသေးတယ်။
![](https://yoyarlay.com/wp-content/uploads/2021/10/15-10-2021yyl03.jpg)
ရွေ့လျားဖို့နဲ့ မတ်တပ်ရပ်ဖို့အတွက် ဝှီးချဲ (သို့) မတ်တပ်ရပ်ထောက်တိုင်တို့ကို မှီခိုနေရတဲ့ ရူမေဆာက Weaver Syndrome လို ရှားပါးမျိုးရိုးဗီဇရောဂါအကြောင်း အသိပညာတွေ မျှဝေပေးဖို့အတွက် ဒီဂင်းနစ်မှတ်တမ်းကို အသုံးပြုဖို့ မျှော်လင့်ထားတယ်လို့ ဆိုပါတယ်။ “အားနည်းချက်လို့ထင်တဲ့ကွဲပြားခြားနားမှုတွေနဲ့အခြားအင်္ဂါရပ်တွေကို သင် လိုချင်ရင် အဲဒါကိုအားသာချက်အဖြစ်ပြောင်းပြီး အဲဒါကိုရအောင်ကြိုးစားလို့ရတယ်လို့ ကျွန်မထင်တယ်။ အဲဒါ ကျွန်မ လုပ်ခဲ့တဲ့အတိုင်းပါပဲ”လို့ ရူမေဆာက ပြောပါတယ်။
![](https://yoyarlay.com/wp-content/uploads/2021/10/15-10-2021yyl04.jpg)
ကမ္ဘာ့အရပ်အရှည်ဆုံးအမျိုးသားကတော့ ၂၀၁၈ခုနှစ်က အရပ်် ၂ မီတာ ၅၁ စင်တီမီတာ (၈ ပေ ၂.၈ လက်မ) ရှိတဲ့ တူရကီနိုင်ငံက ဆူတန် ကိုဆန် (Sultan Kosen) ပါ။ ရူမေဆာကတော့ ဆူတန် ကိုဆန်ကို တစ်နေ့ လူချင်းတွေ့ဆုံရဖို့ မျှော်လင့်နေပါတယ်။
Ref: Reuters “World’s tallest woman says it’s OK to stand out”
WL (ရိုးရာလေး)