ပရီးမီးယားလိဂ်ပြန်စရင် အသင်းလိုက်အောင်ပွဲခံတာ၊ တံထွေးထွေးတာ၊ ရေဘူးမျှသောက်တာတွေကို ပိတ်ပင်ဖွယ်ရှိ

ပရီးမီးယားလိဂ်ပြိုင်ပွဲ ပြန်စတဲ့အခါ ချမှတ်မယ့် ကျန်းမာရေးစည်းမျဉ်းသစ်တွေအရ ဂိုးသွင်းပြီး အသင်းလိုက်အောင်ပွဲခံတာ၊ တံထွေးထွေးတာ၊ ရေဘူးတွေ မျှသောက်တာ၊ တီရှပ် လဲလှယ်တာတွေကို ပိတ်ပင်သွားမှာပါ။ ပရီးမီးယားလိဂ်ရဲ့ လက်ကျန်ပွဲစဉ် ၉၂ ပွဲကို ပြီးဆုံးအောင် ကစားနိုင်ရေးအတွက် လာမယ့်တနင်္လာနေ့မှာ ပရီးမီးယားလိဂ် အသင်း ၂၀ က မဲခွဲဆုံးဖြတ်ကြမှာဖြစ်ပြီး တစ်နှစ်ကြာ ကျင့်သုံးရဖွယ်ရှိတဲ့ ကျန်းမာရေးနဲ့ သန့်ရှင်းရေးစည်းမျဉ်းတွေကိုလည်း ဆွေးနွေးမှာပါ။

ကိုရိုနာဗိုင်းရပ်စ် ကူးစက်ပျံ့နှံ့မှုကြောင့် မတ်လကစပြီး ဆိုင်းငံ့လိုက်တဲ့ ပရီးမီးယားလိဂ်ပြိုင်ပွဲကို ဇွန်လအလယ်မှာ ပြန်လည်စတင်ဖို့ ဆွေးနွေးနေကြပါတယ်။ ပရီးမီးယားလိဂ်ပြိုင်ပွဲ မစခင် ၃၊ ၄ ပတ်အလိုမှာ ကစားသမားတွေ လိုက်နာရမယ့် လေ့ကျင့်ရေးကွင်းစည်းမျဉ်းတွေကို ချမှတ်မှာပါ။ လေ့ကျင့်ရေးကွင်းမှာရော၊ ပွဲကစားချိန်မှာပါ ကစားသမားတွေအနေနဲ့ တံထွေးထွေးခွင့် ပိတ်ပင်ခံရဖွယ်ရှိပါတယ်။ ကွင်းထဲမှာ တံထွေးထွေးသူတွေကို ဒိုင်တွေက အရေးယူနိုင်ဖွယ်ရှိပါတယ်။ ဂိုးသွင်းပြီးချိန်မှာ အသင်းလိုက် အောင်ပွဲခံတာ၊ ပွဲအပြီးမှာ ဂျာစီလဲလှယ်တာတွေကို ပိတ်ပင်ဖို့ ရှိသလို ပွဲမတိုင်ခင် လက်ဆွဲနှုတ်ဆက်တာ၊ ပွေ့ဖက်တာမျိုးလည်း ပိတ်ပင်ဖွယ်ရှိနေပါတယ်။

Nz (ရိုးရာလေး)