ကမ္ဘာ့ပထမဆုံးအဖြစ် မျိုးဗီဇပြုပြင်ထားတဲ့ ဝက်နှလုံးကို အစားထိုးခွဲစိတ်ကုသမှု ခံယူခဲ့တဲ့ အမျိုးသား ကွယ်လွန်သွားပြီလို့ မေရီလန်းတက္ကသိုလ်ရဲ့ ကျန်းမာရေးစင်တာက ထုတ်ပြန်ခဲ့ပါတယ်။ ပြီးခဲ့တဲ့ရက်ပိုင်းအတွင်းမှာ ၅၇ နှစ်အရွယ် အမျိုးသား ဒေးဗစ်ဘန်းနက်ရဲ့ ကျန်းမာရေးအခြေအနေ ဆိုးရွားလာခဲ့ပြီး ပြီးခဲ့တဲ့အင်္ဂါနေ့မှာ ကွယ်လွန်သွားခဲ့တာလို့ ဆိုပါတယ်။ သူ့ကို ကျန်းမာရေး အထူးစောင့်ရှောက်မှုပေးခဲ့ပြီး နောက်ဆုံးအချိန်မှာ မိသားစုနဲ့ စကားပြောဆိုခွင့် ရခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
” ဒေးဗစ်ဘန်းနက် ကွယ်လွန်သွားလို့ ကျွန်တော်တို့ ယူကျုံးမရ ဖြစ်ရပါတယ်။ သူက နောက်ဆုံးအချိန်အထိ တိုက်ပွဲဝင်ခဲ့တဲ့ ရဲစွမ်းသတ္တိရှိသူ လူနာတစ်ယောက်ပါ။ ကျန်ရစ်သူမိသားစုအတွက် ဝမ်းနည်းရပါတယ်” လို့ မေရီလန်းတက္ကသိုလ် ကျန်းမာရေးစင်တာမှာ ဝက်နှလုံးအစားထိုးခွဲစိတ်ပေးခဲ့တဲ့ ခွဲစိတ်ဆရာဝန် ဒေါက်တာ ဂရစ်ဖစ်က ပြောပါတယ်။
ကုသမရတဲ့ နှလုံးရောဂါ ခံစားနေရသူ ဒေးဗစ်ဘန်းနက်ဟာ ဇန်နဝါရီလ ၇ ရက်မှာ မျိုးဗီဇပြုပြင်ထားတဲ့ ဝက်နှလုံး အစားထိုးခွဲစိတ်မှု ခံယူခဲ့တာပါ။ သူ့ရဲ့ဆေးမှတ်တမ်းတွေအရ ဒေးဗစ်ဘန်းနက်ဟာ သာမန်နှလုံးအစားထိုးခွဲစိတ်တာ၊ နှလုံးခုန်စက်တပ်တာတွေ လုပ်မရနိုင်လို့ ဝက်နှလုံးအစားထိုး ခွဲစိတ်မှုဟာ သူ့ရဲ့တစ်ခုတည်းသော ရွေးချယ်စရာ ဖြစ်ခဲ့ရပါတယ်။
လူ့ခန္ဓာကိုယ်က ဝက်နှလုံးကို လက်ခံနိုင်စေဖို့အတွက် မျိုးဗီဇ ၃ ခုကို ဖယ်ရှားခဲ့သလို လူ့နှလုံး မျိုးဗီဇ ၆ ခုကို ထည့်သွင်းပြီး အစားထိုးခွဲစိတ်မှုလုပ်ခဲ့တာပါ။ သီတင်းပတ် တော်တော်ကြာတဲ့အထိ လူ့ခန္ဓာကိုယ်က ငြင်းဆန်မှုလက္ခဏာ တစ်စုံတရာ ပြသခဲ့ခြင်းမရှိဘဲ အစားထိုးခွဲစိတ်ခဲ့တဲ့ ဝက်နှလုံးက ကောင်းကောင်းအလုပ်လုပ်ခဲ့ပါတယ်။
Related news – https://yoyarlay.com/ref-bbc-man-gets-genetically-modified-pig-heart-in-world-first-transplant/
Ref: CNN “Patient who received genetically modified pig heart in groundbreaking transplant surgery dies”
Nz (ရိုးရာလေး)
