သင့်ရဲ့အိပ်စက်ခြင်းအလေ့အထက မှတ်ဉာဏ်ချို့ယွင်းခြင်းဖြစ်နိုင်ခြေပိုများစေတယ်လို့ လေ့လာချက်က ဆို

14-2-2022-yyl8.jpg

မှတ်ဉာဏ်ချို့ယွင်းတာက အသက် ၆၀ နဲ့ အသက် ၆၀ အထက်လူတွေအပေါ် အဓိကသက်ရောက်စေတဲ့ ပြင်းထန်တဲ့စိတ်ပိုင်းဆိုင်ရာကျန်းမာရေးအခြေအနေဖြစ်ပါတယ်။ မှတ်ဉာဏ်ချို့ယွင်းတာရဲ့အစောပိုင်းလက္ခဏာရပ်တွေက မသိမသာဖြစ်ပြီး ရောဂါရှာဖွေဖို့ ခက်သလို အသက်အရွယ်ရလာတဲ့အထိ သတိမပြုမိဘဲ ဖြစ်နေတတ်ပါတယ်။ မှတ်ဉာဏ်ချို့ယွင်းတာဖြစ်ရတဲ့အကြောင်းအရင်းကို အသေအချာမသိရပါဘူး။ သင့်ရဲ့ဘဝနေထိုင်မှုပုံစံကစပြီး သင့်ရဲ့စားသောက်မှုပုံစံအထိ အကြောင်းအရာများစွာက အသက်ကြီးတဲ့အချိန်မှာ ဒီအခြေအနေကို ဖြစ်လာနိုင်ခြေများစေပါတယ်။

မှတ်ဉာဏ်ချို့ယွင်းတာရဲ့အကြောင်းအရင်းတွေက များပြီး အခုဆိုရင် အဲဒီအကြောင်းအရင်းတွေထဲမှာ နောက်ထပ်တစ်ခုကို သုတေသီတွေက ထပ်ထည့်ထားပါတယ်။ မှတ်ဉာဏ်ချို့ယွင်းတာရဲ့ဖြစ်နိုင်ခြေများတဲ့အကြောင်းအရာတွေအပေါ် သုတေသီအဖွဲ့တစ်ဖွဲ့ လုပ်ဆောင်ခဲ့တဲ့ လေ့လာချက်တစ်ခုက လူလတ်ပိုင်းအရွယ်မှာ သင် အိပ်စက်တဲ့ နည်းလမ်းက အသက်ကြီးလာတဲ့အခါ မှတ်ဉာဏ်ချို့ယွင်းတာကို ခံစားရနိုင်ခြေ ၃၀ ရာခိုင်နှုန်း ပိုများတယ်ဆိုတာကို တွေ့ရှိခဲ့ရပါတယ်။

သင့်ရဲ့အိပ်စက်ခြင်းအလေ့အထ၊ အိပ်စက်မှုပုံစံက သင့်ကို ဘယ်လိုအန္တရာယ်ဖြစ်စေနိုင်လဲ

University College London ရဲ့ ဒေါက်တာ ဆဲဗီရင်း ဆာဘီယား (Severine Sabia) ဉီးဆောင်ခဲ့တဲ့ လေ့လာချက်အရ လူလတ်ပိုင်းအရွယ်မှာ ညဘက် သင် အိပ်စက်တဲ့ အိပ်ချိန်ပမာဏက နောက်ပိုင်း အသက်ကြီးလာတဲ့အခါ မှတ်ဉာဏ်ချို့ယွင်းတာလို စိတ်ပိုင်းဆိုင်ရာကျန်းမာရေးအခြေအနေဖြစ်နိုင်ခြေမြှင့်တက်စေတယ်လို့ သိရပါတယ်။ ငယ်ရွယ်တုန်းကအိပ်စက်ခြင်းအလေ့အထဟာ နောက်ပိုင်းမှာ မှတ်ဉာဏ်ချို့ယွင်းတာစတင်ဖြစ်ပေါ်မှုအပေါ် ဘယ်လို သက်ရောက်နိုင်လဲဆိုတာကို ဆန်းစစ်ဖို့ သုတေသနပြုလုပ်ခဲ့ကြတာပါ။

လေ့လာမှုအတွက် UK က အသက် ၅၀ အရွယ်ကစတဲ့ လူ (၈၀၀၀) နီးပါးဆီက ဒေတာအချက်အလက်တွေကို သုတေသီတွေက ဆန်းစစ်ခဲ့ကြပါတယ်။ လေ့လာချက်မှာပါဝင်ခဲ့သူတွေကို လူလတ်ပိုင်းအရွယ်မှာ ညဘက်ကို ဘယ်နှနာရီအိပ်လဲဆိုတဲ့ မေးခွန်းအပါအဝင် မေးခွန်းများစွာ မေးမြန်းခဲ့ပါတယ်။ ပါဝင်သူ ၅၂၁ ဉီးက ပျမ်းမျှအသက် ၇၇ နှစ်မှာ မှတ်ဉာဏ်ချို့ယွင်းတာရှိတယ်ဆိုတာကို တွေ့ရှိခဲ့ရပါတယ်။

လေ့လာချက်မှာ ဘာတွေ ဖော်ပြထားလဲ

တစ်ညကို အိပ်ချိန်ပမာဏ (၆) နာရီ (သို့) (၆) နာရီထက်နည်းပြီး အိပ်စက်တဲ့သူတွေက နောက်ပိုင်း အသက်အရွယ်ရလာတဲ့အခါ မှတ်ဉာဏ်ချို့ယွင်းခြင်းဖြစ်နိုင်ခြေ ပိုများတယ်ဆိုတာကို လေ့လာချက်က ပိုပြီး ရှင်းလင်းစေပါတယ်။ အဲဒီလူတွေက ညတိုင်း အိပ်ချိန်ပမာဏ (၇) နာရီ၊ (၈) နာရီအိပ်စက်ခဲ့တဲ့ လူတွေနဲ့ယှဉ်ရင် မှတ်ဉာဏ်ချို့ယွင်းခြင်းကို ဖြစ်နိုင်ခြေ ၃၀ ရာခိုင်နှုန်း ပိုများပါတယ်။ အိပ်စက်ခြင်းအလေ့အထနဲ့ မှတ်ဉာဏ်ချို့ယွင်းခြင်းဖြစ်နိုင်ခြေဆက်စပ်မှုရှိတယ်ဆိုတဲ့ လေ့လာချက်က ပထမဆုံးအကြိမ်မဟုတ်ပါဘူး။ အရင်ကလည်း အဲဒါနဲ့ပတ်သက်ပြီး လေ့လာချက်တော်တော်များများ လုပ်ဆောင်ခဲ့ကြပါတယ်။

အိပ်စက်ခြင်းအလေ့အထက ကျန်းမာရေးကို ဘယ်လိုထိခိုက်စေနိုင်လဲ

အိပ်ချိန်မလုံလောက်တာ၊ အိပ်ရေပျက်တာ၊ အိပ်မပျော်တာ၊ ပျမ်းမျှအိပ်ချိန်ထက်ပိုပြီး အချိန်အကြာကြာ အိပ်စက်တာက သင့်ကျန်းမာရေးကို ထိခိုက်စေနိုင်ပါတယ်။ အဝလွန်တာ၊ နှလုံးရောဂါ၊ သွေးတိုးရောဂါ၊ ဆီးချိုရောဂါတွေဖြစ်လာစေနိုင်ပါတယ်။ သင့်ရဲ့စိတ်ပိုင်းဆိုင်ရာကျန်းမာရေးကိုတောင် ထိခိုက်စေနိုင်ပြီး သင့်ကို စိတ်ဆိုးဒေါသထွက်စေကာ စိတ်အလိုမကျဖြစ်စေနိုင်တဲ့အပြင် မှတ်ဉာဏ်ချို့ယွင်းခြင်းလည်း ဖြစ်စေနိုင်ပါတယ်။ မှတ်ဉာဏ်ချို့ယွင်းခြင်းကို ကုသစဉ်မှာတောင် ဒီအခြေအနေကို ထိန်းနို်ငဖို့ အိပ်ရေဝအောင် အိပ်ဖို့ အကြံပြုကြပါတယ်။ တစ်ညကို အိပ်ချိန်ပမာဏ (၇) နာရီ (သို့) (၈) နာရီလောက် အိပ်စက်တာက သင့်စိတ်ကို ရွှင်လန်းစေတယ်။ သင့်ခန္ဓာကိုယ်ကို ခွန်အားပြည့်စေပါတယ်။ နာတာရှည်ရောဂါဖြစ်နိုင်ခြေကို လျော့ချပေးနိုင်ပါတယ်။

မှတ်ဉာဏ်ချို့ယွင်းခြင်းရဲ့အစောပိုင်းလက္ခဏာရပ်တွေ

မှတ်ဉာဏ်ချို့ယွင်းခြင်းရဲ့လက္ခဏာရပ်တွေက စောစီးစွာစတင်ပြလေ့ရှိပါတယ်။ အချိန်မီ သိရှိမယ်ဆိုရင် လက္ခဏာရပ်တွေကို နှေးကွေးအောင် လုပ်နိုင်ပြီး မှတ်ဉာဏ်ချို့ယွင်းမယ့်အခြေအနေကို အလွယ်တကူထိန်းနိုင်မှာဖြစ်ပါတယ်။ ဒါကြောင့် မှတ်ဉာဏ်ချို့ယွင်းခြင်းရဲ့အစောပိုင်းလက္ခဏာရပ်တွေကို သတိထားစောင့်ကြည့်ရမှာဖြစ်ပါတယ်။ လက္ခဏာရပ်တွေကတော့ မှတ်ဉာဏ်ပြဿနာတွေဖြစ်လာခြင်း၊ ရှုပ်ထွေးမှုတွေ၊ ဇဝေဇဝါဖြစ်မှုတွေများလာခြင်း၊ အာရုံစိုက်နိုင်မှုလျှော့နည်းခြင်း၊ ကိုယ်ရည်ကိုယ်သွေး (သို့) အမူအရာပြောင်းလဲခြင်း၊ စိတ်ဓာတ်ကျခြင်း၊ နေ့စဉ်လုပ်ငန်းဆောင်တာတွေ လုပ်နိုင်စွမ်းနည်းခြင်းတို့ပါပဲ။

Ref: TOI “How your sleeping pattern puts you at an increased risk of dementia, as per a study”

WL (ရိုးရာလေး)

Share this post

ရိုးရာလေးတွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင်မှ ပြန်လည်ကူးယူဖော်ပြခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဤနေရာတွင်ဖတ်ရှုနိုင်ပါသည်။

Leave a Reply

scroll to top