ဓမ္မတာလာတဲ့အချိန်ဆို တချို့မိန်းကလေးတွေအတွက် ငါးရက်တာကို ဖြတ်ကျော်ဖို့ဆိုတာ လွယ်တော့မလွယ်ကူလှပါဘူး။ အဲဒီအချိန်မျိုးမှာ မိန်းကလေးတော်တော်များများက ဗိုက်နာတာ၊ ခေါင်းကိုက်တာ၊ ဓမ္မတာလာချိန်ဖြစ်တတ်တဲ့ အခြားလက္ခဏာရပ်တွေကြောင့် စိတ်မသက်မသာဖြစ်ရပါတယ်။ နာကျင်ကိုက်ခဲမှုကို သက်သာစေဖို့ ဆေးသောက်ကြသလို အခြားကုသနည်းတွေနဲ့လည်း ဖြေရှင်းကြပါတယ်။
ဒါပေမဲ့ ဓမ္မတာလာချိန် နာကျင်ကိုက်ခဲမှုတွေမဖြစ်အောင် ကြိုတင်ကာကွယ်ထားသင့်ပါတယ်။ သင် တစ်နေ့တာ စားသုံးတဲ့အစားအစာမှာ ရေအပြင် တချို့အာဟာရဓာတ်တွေ ပါဝင်တာက နာကျင်ကိုက်ခဲမှုသက်သာအောင် မဖြစ်အောင် ကူညီပေးနိုင်ပါတယ်။ ဒါက ဓမ္မတာလာချိန်နာကျင်ကိုက်ခဲမှုကို ဖြေရှင်းတဲ့ ရိုးရှင်းဆုံးအခြားနည်းလမ်းလည်းဖြစ်ပါတယ်။ တစ်နေ့တာစားသုံးတဲ့အစားအစာမှာ ဘယ်လိုအာဟာရဓာတ်တွေ ပါဝင်သင့်လဲဆိုတာ ဆက်ဖတ်ကြည့်လိုက်ကြရအောင်…။
သံဓာတ်
ဓမ္မတာလာချိန်ဆို စိတ်ရှုပ်ထွေးတာ၊ စိတ်မတည်ငြိမ်ဖြစ်တာ၊ အားနည်းတာတွေဖြစ်စေတဲ့ သံဓာတ်အားနည်းတဲ့ရောဂါဖြစ်လာနိုင်ပါတယ်။ သံဓာတ်အားနည်းတဲ့ရောဂါက ရာသီလာတဲ့ အသက်အရွယ်အပိုင်းအခြားက မိန်းကလေးတွေကြားမှာ အတော်လေးအဖြစ်များပြီး ကျန်းမာအောင်နေထိုင်ဖို့အတွက် သံဓာတ်ပမာဏများအောင်လုပ်ဖို့ အရေးကြီးပါတယ်။ ဒါကြောင့် ပဲအမျိုးမျိုး၊ အနက်ရောင်ချောကလက်၊ အစိမ်းရောင်ဟင်းသီးဟင်းရွက်များ၊ အစေ့အဆံ၊ နေကြာစေ့၊ တိုဖူးတို့ကို နေ့စဉ်စားသုံးပေးသင့်ပါတယ်။
မဂ္ဂနီစီယမ်
မဂ္ဂနီစီယမ်က စိုးရိမ်ပူပန်တာ၊ အိပ်စက်ချိန်မမှန်တာ၊ ခေါင်းကိုက်တာတွေကို သက်သာသွားအောင် ကူညီပေးပြီး ဓမ္မတာလာချိန် နာကျင်ကိုက်ခဲတဲ့ လက္ခဏာတွေကို လျော့ချပေးတဲ့နေရာမှာ အတော်လေးထိရောက်ပါတယ်။ ဒီအာဟာရဓာတ်က နာကျင်ကိုက်ခဲတာကို ဖြစ်စေတဲ့ သားအိမ်ကြွက်သားတွေကို ဖြေလျော့ပေးပါတယ်။ ရာသီလာချိန်မှာ မိန်းကလေးအများစုက ချောကလက်ကို အာသီသပြင်းပြကြပါတယ်။ ချောကလက်က မဂ္ဂနီစီယမ်ဓာတ်ပါဝင်မှုများတဲ့ အတွက်ကြောင့်ပါပဲ။ ဒါကြောင့် နာကျင်ကိုက်ခဲတာတွေ သက်သာသွားဖို့ဆိုရင် သီဟိုဠ်စေ့၊ ပဲနို့၊ ဒေါက်ခွရွက်၊ အယ်မွန်စေ့၊ ထောပတ်၊ ငှက်ပျော၊ ပဲအမျိုးမျိုးတို့ကို နေ့စဉ်စားသုံးတဲ့ အစားအစာမှာ ပါဝင်သင့်ပါတယ်။
အမျှင်ဓာတ်
နာကျင်ကိုက်ခဲတာနဲ့ ခေါင်းကိုက်တာတွေအပြင် ဗိုက်အောင့်သလိုဖြစ်တာကလည်း ဓမ္မတာလာချိန်ကိုက်ခဲခြင်းရဲ့ အဖြစ်များတဲ့လက္ခဏာရပ်ဖြစ်ပါတယ်။ အဲဒီလိုဖြစ်တဲ့အခါ သက်တောင့်သက်သာ မဖြစ်သလိုခံစားရတာ၊ စိတ်မရှည်သလို ဖြစ်တာတွေဖြစ်စေပါတယ်။ ဒီအခြေအနေကို ရှောင်ရှားဖို့အတွက် ရာသီလာချိန်မှာကော မလာခင်အချိန်မှာပါ အမျှင်ဓာတ်များများပါအောင် စားသုံးပေးပါ။ အမျှင်ဓာတ်ကြွယ်ဝတဲ့ ပန်းသီး၊ ပဲအမျိုးမျိုး၊ ချီးယားစေ့တို့ကို စားသုံးလို့ရပါတယ်။
ဗီတာမင်ဘီ
ဗီတာမင်ဘီကြွယ်ဝတဲ့ ကြက်ဥ၊ ဘဲဥ၊ ပင်လယ်စာ၊ အစေ့အဆံတို့က နေ့စဉ်စားသုံးပေးသင့်တဲ့ အစားအစာတွေပါပဲ။ အထူးသဖြင့် ဓမ္မတာလာချိန်တွေမှာပါ။ ဗီတာမင်ဘီ ဓာတ်လုံလောက်မယ်ဆိုရင် ဓမ္မတာလာချိန်အတွင်းဖြစ်တတ်တဲ့ လက္ခဏာရပ်တွေအားလုံးကို လျော့ချပေးနိုင်ပါတယ်။
ကယ်လ်စီယမ်
ဓမ္မတာလာချိန်အတွင်း ကယ်စီယမ်ပမာဏများများ စားသုံးပေးသင့်ပါတယ်။ ဒီဓာတ်က ခန္ဓာကိုယ်အတွင်းက နာကျင်ကိုက်ခဲမှုတွေကို လျော့ချပေးပါတယ်။ နွားနို့၊ ဒိန်ချဉ်လို နို့ထွက်အစားအစာတွေ၊ အယ်မွန်စေ့၊ ပန်းဂေါ်ဖီစိမ်းတို့ကို နေ့တိုင်းစားပေးသင့်ပါတယ်။ ဒါက ဓမ္မတာလာချိန်နာကျင်ကိုက်ခဲမှုတွေကို သက်သာစေတဲ့အပြင် အရိုးတွေကိုလည်း သန်မာကြံ့ခိုင်စေပါတယ်။
Ref: Include these 5 nutrients in your diet to reduce menstrual cramps
WL (ရိုးရာလေး)
